ಶಿವರಾಜ ಎಂ. ಬೆಂಗಳೂರು ಗ್ರಾಮಾಂತರ
ಈ ಬಾರಿಯ ಚಿಕ್ಕಬಳ್ಳಾಪುರ ಲೋಕಸಭಾ ಚುನಾವಣಾ ಕಣದಲ್ಲಿ ಕಾಂಗ್ರೆಸ್ ಹಾಗೂ ಬಿಜೆಪಿ-ಜೆಡಿಎಸ್ ಮೈತ್ರಿ ಅಭ್ಯರ್ಥಿಗಳ ಬಲಾಬಲ ಪ್ರದರ್ಶನದಲ್ಲಿ ನಾರಿ ಶಕ್ತಿ ಎದ್ದು ಕಾಣುತ್ತಿದೆ. ಚುನಾವಣಾ ರ್ಯಾಲಿ, ಮನೆ ಮನೆ ಪ್ರಚಾರದಲ್ಲಿ ಮಹಿಳೆಯರ ಸಂಖ್ಯೆಯೇ ಹೆಚ್ಚು ಕಂಡುಬರುತ್ತಿರುವುದು ವಿಶೇಷವಾಗಿ ಗಮನ ಸೆಳೆಯುತ್ತಿದೆ.
ಚುನಾವಣಾ ದಿನ ಹತ್ತಿರವಾಗುತ್ತಿದ್ದಂತೆ ಲೋಕಸಮರ ಕಣ ರಂಗೇರುತ್ತಿದ್ದು, ಎರಡೂ ಕಡೆಯಲ್ಲಿ ಅಬ್ಬರ ಮತ ಪ್ರಚಾರ ಕಂಡುಬರುತ್ತಿದೆ. ಎರಡೂ ಕಡೆಯ ಅಭ್ಯರ್ಥಿಗಳು ಮಹಿಳೆಯರ ಮನಗೆಲ್ಲಲು ಆದ್ಯತೆ ನೀಡುತ್ತಿದ್ದು ಪ್ರಚಾರಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳೆಯರನ್ನೇ ಕರೆತರುವ ಕಸರತ್ತು ನಡೆಸುತ್ತಿದ್ದಾರೆ.
ಖರ್ಚು ಕಡಿಮೆ: ಚುನಾವಣಾ ರ್ಯಾಲಿಗಳಿಗೆ, ಮನೆ ಮನೆ ಪ್ರಚಾರಕ್ಕೆ ಪುರುಷರನ್ನು ನಿಯೋಜಿಸಿದರೆ ಖರ್ಚು ಜಾಸ್ತಿ ಎಂಬುದು ಮತ್ತೊಂದು ಪ್ರಮುಖ ಕಾರಣವಾಗಿದೆ. ಚುನಾವಣಾ ಪ್ರಚಾರಕ್ಕೆ ಪುರುಷರನ್ನು ಕರೆತಂದರೆ ಅವರಿಗೆ ಏನಿಲ್ಲವೆಂದರೂ ತಲೆಗೆ ದಿನಕ್ಕೆ 500ರಿಂದ 1 ಸಾವಿರ ರೂ. ಕೊಡಬೇಕು. ಜತೆಗೆ ಉಪಹಾರ-ಊಟ, ಬೀಡಿ-ಸಿಗರೇಟಿನ ಖರ್ಚು ಜತೆಗೆ ಮದ್ಯ ಸೇವನೆಗೂ ಖರ್ಚು ಭರಿಸಬೇಕು ಎಂಬ ಪರಿಸ್ಥಿತಿ ಇದೆ. ಬೈಕ್, ಕಾರು ಮತ್ತಿತರ ಸ್ವಂತ ವಾಹನಗಳಲ್ಲಿ ಬರುತ್ತೇವೆ, ಇದಕ್ಕೆ ಪೆಟ್ರೋಲ್ ದರ ಹೆಚ್ಚಿಗೆ ಕೊಡಬೇಕು ಎಂಬ ಬೇಡಿಕೆ ಇರುತ್ತದೆ. ಆದರೆ ಮಹಿಳೆಯರನ್ನು ಕರೆತಂದರೆ ಇವೆಲ್ಲ ಖರ್ಚು ಉಳಿತಾಯವಾಗುತ್ತದೆ. ಮಹಿಳೆಯರಿಗೆ ತಲೆಗೆ 200ರೂ ಕೊಟ್ಟರೂ ಸಾಕು, ಯಾವುದೇ ಇನ್ನಿತರ ಬೇಡಿಕೆ ಇಡದೆ ಪ್ರಚಾರದಲ್ಲಿ ತೊಡಗುತ್ತಾರೆ. ಆಯಾ ಸ್ಥಳೀಯ ಮುಖಂಡರ ನೇತೃತ್ವದಲ್ಲಿ ಸಮೂಹ ಸಾರಿಗೆ ವ್ಯವಸ್ಥೆ ಮಾಡಿದರೆ ಸಾಕು, ಏನೊಂದೂ ಬೇಡಿಕೆ ಇಲ್ಲದೆ ಮಹಿಳೆಯರು ಪ್ರಚಾರದಲ್ಲಿ ಪಾಲ್ಗೊಳ್ಳುತ್ತಾರೆ ಎಂಬುದು ರಾಜಕೀಯ ಮುಖಂಡರ ಲೆಕ್ಕಾಚಾರವಾಗಿದೆ. ಈ ಹಿನ್ನೆಲೆಯಲ್ಲಿ ಗ್ರಾಮೀಣ ಪ್ರದೇಶಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಈ ಬಾರಿ ಮತಪ್ರಚಾರದಲ್ಲಿ ಮಹಿಳೆಯರು ಕಂಡುಬರುತ್ತಿದ್ದಾರೆ.
