ಮಹಿಳಾ ಫುಟ್ಬಾಲ್​ ತಂಡಕ್ಕೆ ಉಡುಪಿ ಮೂಲದ ಫಿಸಿಯೊ

ಉಡುಪಿ: ಇಪ್ಪತ್ತರ ಒಳಗಿನ ಹರೆಯದ ಯುವತಿಯರ ಫುಟ್ಬಾಲ್​ ತಂಡ 2026ರಲ್ಲಿ ಥೈಲ್ಯಾಂಡಿನಲ್ಲಿ ಜರುಗಲಿರುವ ಏಷಿಯಾ ಕಪ್​ ಫುಟ್ಬಾಲ್​ ಪಂದ್ಯಾಟಕ್ಕೆ ಸಿದ್ಧತೆ ನಡೆಸುತ್ತಿದ್ದು, ಉಡುಪಿ ಮೂಲದ ವಲ್ಲರಿ ಪೆಜತ್ತಾಯ ರಾವ್​ ಫಿಸಿಯೊ ಆಗಿ ಆಯ್ಕೆಯಾಗಿದ್ದಾರೆ.

ರಾಜೀವ್​ ಗಾಂಧಿ ವಿವಿಯಲ್ಲಿ ಸ್ಪೋರ್ಟ್ಸ್​ ಸೈನ್ಸ್​ನಲ್ಲಿ ಸ್ನಾತಕೋತ್ತರ ಪದವಿ ಪಡೆದಿರುವ ವಲ್ಲರಿ ಅವರು, ಖೇಲೋ ಇಂಡಿಯಾ ಸ್ಪರ್ಧೆಯಲ್ಲಿ ಕರ್ನಾಟಕ ರಾಜ್ಯ ತಂಡದಲ್ಲಿ ಫಿಸಿಯೊ ಆಗಿ ಸೇವೆ ಸಲ್ಲಿಸಿದ್ದರು. ಇದನ್ನು ಗಮನಿಸಿದ ಆಲ್​ ಇಂಡಿಯಾ ಫುಟ್ಬಾಲ್ಡ ಫೆರೇಶನ್​ ಏಷಿಯಾ ಕಪ್​ ಫುಟ್ಬಾಲ್​ ತಂಡಕ್ಕೆ ನೇಮಕಗೊಳಿಸಿದೆ.

ಏಷಿಯಾ ಕಪ್​ ಪಂದ್ಯಾಟಕ್ಕೆ ಮುನ್ನ ಆಗಸ್ಟ್​ ತಿಂಗಳಲ್ಲಿ ಮ್ಯಾನ್ಮಾರ್​ನಲ್ಲಿ ನಡೆಯಲಿರುವ ಅರ್ಹತಾ ಪಂದ್ಯದಲ್ಲಿ ಉತ್ಕಷ್ಟ ಪ್ರದರ್ಶನವನ್ನು ನೀಡಬೇಕಾಗಿದೆ. ಇಂಡೋನೇಷಿಯಾ, ತುರ್ಕಮೆನಿಸ್ತಾನ್​ ಹಾಗೂ ಮ್ಯಾನ್ಮಾರ್​ ಜೊತೆ ಅಧಿಕೃತ ಪಂದ್ಯಾಟದಲ್ಲಿ ಗೆಲುವು ದಾಖಲಿಸಬೇಕಿದೆ. ಇದಕ್ಕಾಗಿ ಹುಡುಗಿಯರ ತಂಡ ಕಠಿಣ ಅಭ್ಯಾಸದಲ್ಲಿ ನಿರತವಾಗಿದ್ದು, ಮೇ 25ರಿಂದ ಬೆಂಗಳೂರಿನ ಪಡುಕೋಣೆ ದ್ರಾವಿಡ್​ ಸ್ಪೋರ್ಟ್ಸ ಸೆಂಟರ್​ನಲ್ಲಿ ವಿಶೇಷ ತರಬೇತಿ ಪ್ರಾರಂಭವಾಗಿದ್ದು, ಆ.15ರವರೆಗೆ ನಡೆಯಲಿದೆ.

ತಾಷ್ಕೆಂಟಿನಲ್ಲಿ ವಿಜಯ

ಒಟ್ಟು 24 ಸದಸ್ಯರನ್ನು ಹೊಂದಿರುವ 20ರ ಒಳಗಿನ ಹರೆಯದ ಭಾರತೀಯ ಹುಡುಗಿಯರ ಫುಟ್ಬಾಲ್​ ತಂಡ ದೆಹಲಿ, ಮಣಿಪುರ, ಜಾರ್ಖಂಡ್​, ಓರಿಸ್ಸಾ ರಾಜ್ಯದ ಪ್ರತಿಭಾವಂತ ಆಟಗಾರನ್ನು ಹೊಂದಿದ್ದು, ಜಾಗತಿಕಮಟ್ಟದಲ್ಲಿ ಹೆಸರುಗಳಿಸಿರುವ ಸ್ವೀಡನಿನ ಜೋಕೀಂ ಅಲೆಕ್ಸಾಂಡರ್ಸನ್​ ಮಾರ್ಗದರ್ಶನ ಹಾಗೂ ತರಬೇತಿ ನೀಡುತ್ತಿದ್ದಾರೆ. ಜುಲೈ 10ರಿಂದ 17ರವರೆಗೆ ಉಜ್ಬೇಕಿಸ್ತಾನದ ತಾಷ್ಕೆಂಟಿನಲ್ಲಿ ವಿಶೇಷ ಪ್ರದರ್ಶನ ನೀಡಿದ ಈ ತಂಡ ಎರಡು ಸೌಹಾರ್ದ ಪಂದ್ಯಾಟದಲ್ಲಿ ಮೊದಲ ಪಂದ್ಯದಲ್ಲಿ 1&-1 ಅಂತರದಲ್ಲಿ ಸಮಬಲ ಸಾಧಿಸಿತು. ಎರಡನೇ ಪಂದ್ಯದಲ್ಲಿ ಬಲಿಷ್ಠ ಉಜ್ಬೇಕಿಸ್ತಾನದ ವಿರುದ್ಧ 4-&1 ಅಂತರದಲ್ಲಿ ರೋಚಕ ವಿಜಯವನ್ನು ದಾಖಲಿಸಿದೆ. ಈ ಫುಟ್ಬಾಲ್​ ತಂಡದ ದೈಹಿಕಕ್ಷಮತಾ ತಜ್ಞರಾಗಿ ವಲ್ಲರಿ ರಾವ್​ (ಫಿಸಿಯೊ)ತಂಡದ ಜೊತೆಗಿದ್ದರು.

ಉಡುಪಿ ಒಳಕಾಡು ಮೂಲದ ಪ್ರಸ್ತುತ ಬೆಂಗಳೂರಿನಲ್ಲಿ ನೆಲೆಸಿರುವ ವಾದಿರಾಜ ಹಾಗೂ ಸಹನಾ ಪೆಜತ್ತಾಯ ಪುತ್ರಿ ವಲ್ಲರಿ ಪೆಜತ್ತಾಯ ರಾವ್​ ಅವರು ಡಾ.ವಿಶಾಕ್​ ರಾವ್​ ಅವರನ್ನು ವಿವಾಹವಾಗಿದ್ದು, ಬೆಂಗಳೂರಿನಲ್ಲಿ ನೆಲೆಸಿದ್ದಾರೆ.