ಮಹಿಳೆಯ ಖಾತೆ ದುರುಪಯೋಗ ಪಡಿಸಿಕೊಂಡು 1.74 ಕೋಟಿ ರೂ. ವರ್ಗಾವಣೆ

ಹಾವೇರಿ: ಲೋನ್​ ಕೊಡುವುದಾಗಿ ನಂಬಿಸಿ ಹೊಸದಾಗಿ ಬ್ಯಾಂಕ್​ ಖಾತೆ ತೆರೆದು ಅದರ ಮೂಲಕ ಆನ್​ಲೈನ್​ನಲ್ಲಿ ವಂಚಿಸಿದ 1.74 ಕೋಟಿ ರೂ. ಹಣವನ್ನು ವಿವಿಧ ಖಾತೆಗಳಿಗೆ ವರ್ಗಾವಣೆ ಮಾಡಿಕೊಳ್ಳುವ ಮೂಲಕ ಮಹಿಳೆಯೊಬ್ಬರ ಬ್ಯಾಂಕ್​ ಖಾತೆ ದುರುಪಯೋಗ ಪಡಿಸಿಕೊಂಡ ಕುರಿತು ಇಲ್ಲಿಯ ಸೈಬರ್​ ಕೆಂ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಇಲ್ಲಿಯ ಮಹಿಳೆಯೊಬ್ಬರಿಗೆ ಕರೆ ಮಾಡಿದ ನೇಹಾ ಮತ್ತು ಅಮಿತ್​ ಎಂಬ ಅಪರಿಚಿತರು, ಲೋನ್​ ಮಾಡಿಕೊಡುವುದಾಗಿ ನಂಬಿಸಿ ಬ್ಯಾಂಕ್​ವೊಂದರಲ್ಲಿ ಹೊಸದಾಗಿ ಖಾತೆ ತೆರೆಯಿಸಿದ್ದಾರೆ. ನಂತರ ಅವರ ಫೋನ್​ಗೆ ಪುಶ್​ಬುಲೆಟ್​ ಆ್ಯಪ್​ಅನ್ನು ಇನ್​ಸ್ಟಾಲ್​ ಮಾಡಿಸಿ ಅದರ ಮೂಲಕ ಮಹಿಳೆಯ ಖಾತೆಗೆ ಸೈಬರ್​ ವಂಚನೆಯಿಂದ ಬಂದಿದ್ದ 1.74 ಕೋಟಿ ರೂ.ಅನ್ನು ಹಾಕಿದ್ದಾರೆ. ಬಳಿಕ ಅವರ ಖಾತೆ ಮೂಲಕ ತಮ್ಮ ಬೇರೆ ಬೇರೆ ಖಾತೆಗಳಿಗೆ ಹಣ ವರ್ಗಾವಣೆ ಮಾಡಿಕೊಳ್ಳುವ ಮೂಲಕ ಮಹಿಳೆಯ ಖಾತೆ ದುರುಪಯೋಗ ಪಡಿಸಿಕೊಂಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.