ಅಂತೂ ಇಂತೂ... ಟೊಮ್ಯಾಟೊಗೆ ಬೆಲೆ ಬಂತು...

ಕೃಷ್ಣಮೂರ್ತಿ ಪಿ.ಎಚ್. ಮಾಯಕೊಂಡ

ದೀಪಾವಳಿ ನಂತರ ಎಲ್ಲ ತರಕಾರಿಗಳ ಹೋಲ್​ಸೇಲ್ ದರ ಏರಿಕೆಯಾಗುತ್ತಿದ್ದು ರೈತರ ಮೊಗದಲ್ಲಿ ಹರ್ಷ ತಂದಿದೆ.

ದಾವಣಗೆರೆ ತರಕಾರಿ ಮಾರುಕಟ್ಟೆಯಲ್ಲಿ ಟೊಮ್ಯಾಟೊ ಪ್ರತಿ 23 ಕೆಜಿ ಬಾಕ್ಸ್​ಗೆ 350 ರಿಂದ 400 ರೂ.ಗೆ ಖರೀದಿಯಾಗುತ್ತಿದೆ. ಕಳೆದ ವಾರ ಟೊಮ್ಯಾಟೊ, ಮೆಣಸಿನಕಾಯಿ, ಹೀರೆ, ಜವಳಿ, ಬೀನ್ಸ್ ದರ ಕುಸಿತ ಕಂಡಿದ್ದವು. ಆದರೆ ಪ್ರಸ್ತುತ ಮಾರುಕಟ್ಟೆಯಲ್ಲಿ ಹೋಲ್ ಸೇಲ್ ದರ ಹೆಚ್ಚಾಗುತ್ತಿವೆ ಎನ್ನುತ್ತಾರೆ ತರಕಾರಿ ವರ್ತಕರು.

ದಾವಣಗೆರೆ ತಾಲೂಕಿನ ಆನಗೋಡು, ಮಾಯಕೊಂಡ, ಅಣಜಿ ಹೋಬಳಿಗಳ ಹಲವು ಗ್ರಾಮಗಳ ಕೃಷಿಕರು ಬೋರ್​ವೆಲ್ ನೀರಾವರಿಗೆ ಟೊಮ್ಯಾಟೊ ಬೆಳೆದಿದ್ದು, ಇದರ ಬೆಲೆ ಏರುಗತಿಯಲ್ಲಿ ಸಾಗುತ್ತಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಕೆಜಿಗೆ 15 ರಿಂದ 20 ರೂ.ಗೆ ಮಾರಾಟವಾಗುತ್ತಿದೆ. ಈ ಬೆಳವಣಿಗೆಯಿಂದ ಇನ್ನೂ ದರದಲ್ಲಿ ಏರಿಕೆಯಾಗಬಹುದು ಎನ್ನುವ ನಿರೀಕ್ಷೆಯಲ್ಲಿದ್ದಾರೆ ರೈತರು.

ಸಸಿ ನಾಟಿ, ಗೂಟ ಹಾಕುವುದು, ವಯರ್ ಹುರಿಕಟ್ಟುವುದು, ಕಳೆ ಕೀಳುವುದು, ರಸಗೊಬ್ಬರ, ಕೀಟನಾಶಕ, ಕೂಲಿ ಕಾರ್ವಿುಕರ ಖರ್ಚು ಸೇರಿ ಕಟಾವಿನವರೆಗೆ ಒಂದು ಎಕರೆ ಜಮೀನಿನಲ್ಲಿ ಟೊಮ್ಯಾಟೊ ಬೆಳೆಯಲು 90 ಸಾವಿರದಿಂದ ಒಂದು ಲಕ್ಷ ರೂ. ಖರ್ಚಾಗುತ್ತದೆ.

ಹಾಗಾಗಿ ತರಕಾರಿ, ಹಣ್ಣು, ಹೂವು ಬೆಳೆಗೆ ಸರ್ಕಾರ ಬೆಂಬಲ ಬೆಲೆ ನಿಗದಿಗೊಳಿಸುವ ಮೂಲಕ ರೈತರಿಗೆ ನೆರವಾಗಬೇಕು. ಜತೆಗೆ ಅತಿ ಹೆಚ್ಚು ತರಕಾರಿ, ಹಣ್ಣು, ಹೂವು ಬೆಳೆಯುತ್ತಿರುವ ಆನಗೋಡು, ಮಾಯಕೊಂಡ, ಅಣಜಿ ಹೋಬಳಿಗಳಲ್ಲಿ ಕೋಲ್ಡ್ ಸ್ಟೋರೇಜ್ ಘಟಕಗಳನ್ನು ನಿರ್ಮಾಣ ಮಾಡಬೇಕು ಎನ್ನುವುದು ಈ ಭಾಗದ ಕೃಷಿಕರ ಬಹುದಿನದ ಬೇಡಿಕೆಯಾಗಿದೆ.