ಕಳೆದ ತಿಂಗಳು ಸೆಪ್ಟೆಂಬರ್ 4ರಂದು ಆಯೋಜಿಸಿದ್ದ 13ನೇ ವಾರ್ಷಿಕ ಘಟಿಕೋತ್ಸವದಲ್ಲಿ ನಾನಾ ಕ್ಷೇತ್ರಗಳ ಗೌರವ ಡಾಕ್ಟರೇಟ್ ಪದವಿಗಾಗಿ ಸೂಕ್ತ ಸಾಧಕರ ಸ್ವವಿವರ ಪಡೆಯಲು ದಿನಾಂಕ ನಿಗದಿಪಡಿಸುವ ಕುರಿತು, ತಗಲುಬಹುದಾದ ವೆಚ್ಚದ ಪಟ್ಟಿಯನ್ನು ಅನುಮೋದಿಸುವ ಕುರಿತು, ಪ್ರದಾನ ಮಾಡಲಿರುವ ನಾನಾ ಪದವಿಗಳ ರ್ಯಾಂಕ್ಗಳ ಮತ್ತು ಚಿನ್ನದ ಪದಕ ಪಡೆದವರ ಪಟ್ಟಿ ತಯಾರಿಸಲು, ನಾನಾ ಸಮಿತಿ ರಚಿಸಲು, ಗಣ್ಯರ ಸ್ವವಿವರ ಪರಿಶೀಲಿಸಲು ತಜ್ಞರ, ಪರಿಶೀಲನಾ ಸಮಿತಿ ರಚನೆ, ಮುಖ್ಯ ಅತಿಥಿಗಳ ನಾಮನಿರ್ದೇಶನ ಸೇರಿದಂತೆ ಕಳೆದ ತಿಂಗಳು ನಡೆದಿದ್ದ ಸಿಂಡಿಕೇಟ್ ಸಭೆಯಲ್ಲಿ ಚರ್ಚಿಸಲಾಗಿತ್ತು. ಅಲ್ಲದೆ, ಘಟಿಕೋತ್ಸವದ ನಾನಾ ಕಾರ್ಯಕ್ರಮದ ವೆಚ್ಚಗಳಿಗಾಗಿ 60 ಲಕ್ಷ ರೂ. ಕೂಡ ಅನುಮೋದನೆ ಪಡೆಯಲಾಗಿತ್ತು. ಒಂದು ದಿನದ ಘಟಿಕೋತ್ಸವಕ್ಕೆ ಇಷ್ಟು ಹಣ ಏಕೆ ?. ದುಂದು ವೆಚ್ಚಕ್ಕೆ ಅಥವಾ ಅಕ್ರಮ ಎಸಗಲು ಕಾರಣವಾಗಲಿದೆ ಎಂದು ಕೆಲ ಸಿಂಡಿಕೇಟ್ ಸದಸ್ಯರು ಅಕ್ಷೇಪ ವ್ಯಕ್ತಪಡಿಸಿದ್ದರು. ಇದಕ್ಕೆ ಘಟಿಕೋತ್ಸವ ಪೂರ್ಣಗೊಂಡ ನಂತರವೇ ಕಳೆದ ಎರಡು ವಾರ್ಷಿಕೋತ್ಸವದ ಲೆಕ್ಕಪತ್ರಗಳನ್ನು ಮಂಡಿಸುವುದಾಗಿ ಕುಲಪತಿ ತಿಳಿಸಿದ್ದರು ಎಂಬುದಾಗಿ ಮೂಲಗಳು ತಿಳಿಸಿದವು. ಆದರೆ, ಘಟಿಕೋತ್ಸವ ಮುಗಿದ ಒಂದು ತಿಂಗಳು ಕಳೆದರೂ ಎರಡು ಘಟಿಕೋತ್ಸವದ ಒಂದು ಲೆಕ್ಕಪತ್ರ ಕೂಡ ಮಂಡನೆಯಾಗದೆ ಇರುವುದು ಅನುಮಾನ ಮೂಡಿಸಿದೆ.
