ಪರಿಷತ್ನ ಅಧ್ಯಕ್ಷರಾದವರು ಸಾಹಿತಿಗಳಾಗಿದ್ದರೆ, ನಿಜವಾದ ಓದುಗರಾಗಿದ್ದರೆ, ಸಾಹಿತ್ಯೇತರರನ್ನು ಸಮ್ಮೇಳನಾಧ್ಯಕ್ಷರನ್ನಾಗಿ ಮಾಡುವ ನಿರ್ಧಾರ ಕೈಗೊಳ್ಳುವುದಿಲ್ಲ. ಸಾಹಿತ್ಯದ ಗಂಧವೇ ಗೊತ್ತಿರದವರು ಇಂತಹ ನಿರ್ಧಾರ ಮಾಡುವರು. ಭಾಷಿಕ ಲೋಕ ಕಟ್ಟಬೇಕಾದ ಜವಾಬ್ದಾರಿ ಲೇಖಕರ ಮೇಲಿದೆ. ಪಂಪ, ಕುಮಾರವ್ಯಾಸ ಅವರಂತಹ ಕವಿಗಳ ಸಾಹಿತ್ಯಗಳನ್ನು ಬರೆಯದಿದ್ದರೆ ಕನ್ನಡವಿಲ್ಲ ಎಂದ ಅವರು, ಸರ್ಕಾರಿ ಶಾಲೆಗಳನ್ನು ಉಳಿಸುವುದೇ ಆದರೆ ಸಮ್ಮೇಳನಕ್ಕೆ ನೀಡುವ ಹಣವನ್ನು ಅವುಗಳ ಉದ್ದಾರಕ್ಕೆ ಬಳಕೆ ಮಾಡಲಿ. ಸಾಹಿತ್ಯ ಸಮ್ಮೇಳನ ತನಗೆ ತಾನೇ ಒಂದು ವೈಭವದ ಸಂಭ್ರಮ. ಸಮ್ಮೇಳನದಲ್ಲಿ ಹೆಚ್ಚಾಗಿ ಭಾಗವಹಿಸುವವರು ಶಿಕ್ಷಕರೇ ಆಗಿದ್ದಾರೆ. ಪ್ರಾಥಮಿಕ ಶಾಲೆಯಿಂದ ಹಿಡಿದು ಉನ್ನತ ವ್ಯಾಸಂಗ ನೀಡುವ ಶಿಕ್ಷಕರು ಪ್ರತಿನಿಧಿ ಶುಲ್ಕ ಪಾವತಿಸಿ ಭಾಗಿಯಾಗುತ್ತಾರೆ. ಕಾರ್ಮಿಕ ವಲಯ, ರೈತರು, ಆಟೋ ಚಾಲಕರು, ಬಸ್ ಚಾಲಕರು ಸೇರಿದಂತೆ ಅನೇಕರು ಕನ್ನಡದ ಮೇಲಿನ ಅಭಿಮಾನದಿಂದ ಭಾಗವಹಿಸುತ್ತಾರೆ ಎಂದರು.
