ವಿವಿ ಅಧೀನ ಏಳು ಪಶು ವೈದ್ಯಕೀಯ ಕಾಲೇಜು (ಬೀದರ್, ಶಿವಮೊಗ್ಗ, ಬೆಂಗಳೂರು, ಹಾಸನ, ಗದಗ, ಅಥಣಿ, ಪುತ್ತೂರು), ಎರಡು ಹೈನು ವಿಜ್ಞಾನ ಕಾಲೇಜು (ಬೆಂಗಳೂರು, ಕಲಬುರಗಿ), ಮಂಗಳೂರಿನಲ್ಲಿ ಒಂದು ಮೀನುಗಾರಿಕೆ ಕಾಲೇಜಿದೆ. 10 ವಿವಿಧ ಜಾನುವಾರು ಸಂಶೋಧನಾ ಮತ್ತು ಮಾಹಿತಿ ಕೇಂದ್ರಗಳಿವೆ. ಕೊಡಗು, ಶಿವಮೊಗ್ಗದಲ್ಲಿ ವಿಶೇಷ ಸಂಶೋಧನಾ ಸಂಸ್ಥೆಗಳಿವೆ. ತುಮಕೂರು, ಹಾವೇರಿ, ಹಾಸನ, ಯಾದಗಿರಿ ಮತ್ತು ಚಾಮರಾಜನಗರದಲ್ಲಿ ತಲಾ ಒಂದು ಪಾಲಿಟೆಕ್ನಿಕ್ ಕಾಲೇಜು ಕಾರ್ಯನಿರ್ವಹಿಸುತ್ತಿವೆ. ಹೆಬ್ಬಾಳ, ಹೆಸರಘಟ್ಟ, ಅಂಕೋಲಾದಲ್ಲಿ ಮೀನುಗಾರಿಕೆ ಸಂಶೋಧನಾ ಮತ್ತು ಮಾಹಿತಿ ಕೇಂದ್ರಗಳಿವೆ. ವಿಜಯಪುರ, ಮಂಗಳೂರಿನಲ್ಲಿ ಕೃಷಿ ವಿಜ್ಞಾನ ಕೇಂದ್ರಗಳಿವೆ. ಈ ಎಲ್ಲ ಕೇಂದ್ರಗಳಲ್ಲಿನ ಶೇ.70ರಷ್ಟು ಶಿವಮೊಗ್ಗದಲ್ಲಿ ಸ್ಥಾಪಿಸುವ ಹೊಸ ವಿವಿಗೆ ಹಾಗೂ ಉಳಿದವುಗಳನ್ನು ಬೀದರ್ ವಿವಿಯಲ್ಲಿ ಮುಂದುವರಿಸುವ ಬೇಡಿಕೆ ಮಂಡಿಸಲಾಗಿದೆ. ತವರಿನವರ ಈ ಬೇಡಿಕೆಗೆ ಸ್ಪಂದಿಸಲು ಸಿಎಂ ಜತೆ ಅವರ ಪುತ್ರರಾದ ರಾಘವೇಂದ್ರ, ವಿಜಯೇಂದ್ರ ಸಹ ಒಲವು ತೋರಿಸಿದ್ದಾರೆ ಎನ್ನಲಾಗಿದೆ. ಇದು ವಿವಿ ಇಬ್ಭಾಗ ಸನ್ನಿಹಿತ ಎಂಬ ಚರ್ಚೆಗೆ ಕಾರಣವಾಗಿದೆ.
