ಸಾರ್ವಜನಿಕ ನಲ್ಲಿಗಳಲ್ಲಿ ನೀರು ಪೋಲು

ಲಕ್ಷ್ಮೇಶ್ವರ: ಪಟ್ಟಣದಲ್ಲಿನ ಸವಳು ನೀರಿನ ಸಾರ್ವಜನಿಕ ನಲ್ಲಿ (ನಳ)ಗಳಿಂದ ಹಲವು ವರ್ಷಗಳಿಂದ ನಿರಂತರವಾಗಿ ನೀರು ಚರಂಡಿ ಪಾಲಾಗುತ್ತಿದ್ದರೂ ಈ ಬಗ್ಗೆ ಸಂಬಂಧಪಟ್ಟ ಪುರಸಭೆ, ಜನಪ್ರತಿನಿಧಿಗಳು ಕಂಡೂ ಕಾಣದಂತೆ ಜಾಣ ಮೌನವಹಿಸಿರುವುದು ದುರ್ದೈವದ ಸಂಗತಿ.

ಪಟ್ಟಣಕ್ಕೆ ತುಂಗಭದ್ರಾ ನದಿಯಿಂದ ಪೂರೈಕೆಯಾಗುವ ಕುಡಿಯುವ ನೀರಿನ ಪೈಪ್​ಲೈನ್, ಯಂತ್ರೋಪಕರಣಗಳ ದುರಸ್ತಿಯಿಂದ ವರ್ಷದುದ್ದಕ್ಕೂ 20 ದಿನಕ್ಕೊಮ್ಮೆ ನೀರು ಬರುತ್ತದೆ. ಕುಡಿಯುವ ನೀರು ಸಮರ್ಪಕವಾಗಿ ಕೊಡಲಾಗದ ಪುರಸಭೆ ಸವಳು ನೀರು ಕೊಡುವಲ್ಲಿ ಯಶಸ್ವಿಯಾಗಿದ್ದರೂ ನಲ್ಲಿಗಳ ರಿಪೇರಿ, ನಿರ್ವಹಣೆ, ನಿಯಂತ್ರಣದ ಕೊರತೆಯಿಂದ ನಿತ್ಯ ಹಗಲೂ-ರಾತ್ರಿ ಯಥೇಚ್ಛವಾಗಿ ಪೋಲಾಗುತ್ತಿದೆ.

ಪಟ್ಟಣದಲ್ಲಿನ 90 ಕ್ಕೂ ಹೆಚ್ಚು ಬೋರ್​ವೆಲ್​ಗಳಿಂದ 23 ವಾರ್ಡ್​ಗಳ ಪ್ರಮುಖ ಸ್ಥಳದಲ್ಲಿ ನೂರಾರು ಸಾರ್ವಜನಿಕ ನಲ್ಲಿಗಳ ವ್ಯವಸ್ಥೆ ಮಾಡಲಾಗಿದೆ. ಕ್ಯಾಪ್ ಇಲ್ಲದ, ಒಡೆದ, ಸೋರುವ ನಲ್ಲಿಗಳ ನಿರ್ವಹಣೆ ಇಲ್ಲದ್ದರಿಂದ 27X7 ನೀರು ಹರಿದು ಚರಂಡಿ ಸೇರುತ್ತಿದೆ. ಬೋರ್​ವೆಲ್​ಗಳನ್ನು ಸಾರ್ವಜನಿಕರೇ ಬೇಕಾದ ರೀತಿ ಳಸಿಕೊಳ್ಳುತ್ತಿದ್ದಾರೆ. ಇದು ಪುರಸಭೆಗೆ ಆರ್ಥಿಕ ಹೊರೆಯಾದರೂ ನೀರು ಸಮರ್ಪಕವಾಗಿ ಕೊಡಲು ವಿಫಲವಾಗಿದ್ದರಿಂದ ಇವುಗಳ ನಿಯಂತ್ರಣ, ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗುತ್ತಿಲ್ಲ. ಇನ್ನಾದರೂ ಪುರಸಭೆಯವರು ಸಾರ್ವಜನಿಕ ನಲ್ಲಿಗಳು, ಬೋರ್​ವೆಲ್​ಗಳ ನಿರ್ವಹಣೆ, ನಿಯಂತ್ರಣದ ಜವಾಬ್ದಾರಿ ವಹಿಸಬೇಕು. ಇಲ್ಲದಿದ್ದರೆ ಪುರಸಭೆ ಮತ್ತು ಸಾರ್ವಜನಿಕರು ಸ್ವಯಂಕೃತ ಅಪರಾಧದಿಂದ ಭವಿಷ್ಯದಲ್ಲಿ ನೀರಿನ ಸಮಸ್ಯೆ ಎದುರಿಸಬೇಕಾಗುತ್ತದೆ.