ನಗರದ ವ್ಯಾಪ್ತಿಯಲ್ಲಿ ಉತ್ತಮ ಮಳೆಯಾದಾಗ ಸಂಪೂರ್ಣ ತುಂಬಿ ತುಳುಕುವ ಬೋಗಾದಿಯ 22 ಎಕರೆ ಜಾಗದಲ್ಲಿರುವ ಬೋಗಾದಿ ಕೆರೆ ನಗರದ ಜೀವನಾಡಿಯಂತಿದೆ. ಇದನ್ನು ಉತ್ತಮ ಸ್ಥಿತಿಯಲ್ಲಿ ಕಾಪಾಡಿಕೊಳ್ಳುವ ಉದ್ದೇಶದಿಂದ 7 ಕೋಟಿ ರೂ. ವೆಚ್ಚದಲ್ಲಿ ಯೋಜನೆ ರೂಪಿಸಲಾಗಿದೆ. ಇದಲ್ಲದೆ 8 ಎಕರೆ ಜಾಗದಲ್ಲಿರುವ ನಗರದ ದಟ್ಟಗಳ್ಳಿ 3ನೇ ಹಂತದಲ್ಲಿರುವ ಅಯ್ಯಜಯ್ಯನ ಹುಂಡಿ ಕೆರೆ ಅಭಿವೃದ್ಧಿಗೆ 4.5 ಕೋಟಿ ರೂ. ವೆಚ್ಚದ ಯೋಜನೆ ಸಿದ್ಧಪಡಿಸಲಾಗಿದೆ. ಎರಡೂ ಕೆರೆಗಳಲ್ಲಿ ಹೂಳೆತ್ತುವುದು, ಪಾಥ್ವೇ ನಿರ್ಮಾಣ, ಕೆರೆ ಏರಿ ಬಲವರ್ಧನೆ, ಅರಣ್ಯೀಕರಣ, ಓಪನ್ ಜಿಮ್, ಮಕ್ಕಳ ಆಟದ ಉಪಕರಣ ಅಳವಡಿಸುವುದು, ವಿದ್ಯುದ್ದೀಕರಣ, ಪೋಷಕ ಕಾಲುವೆ ಹಾಗೂ ರಾಜಕಾಲುವೆಗಳ ಅಭಿವೃದ್ಧಿ, ಮೂಲಸೌಕರ್ಯ ಒದಗಿಸುವ ಕಾಮಗಾರಿ ಕೈಗೊಳ್ಳಲಾಗುತ್ತಿದೆ. ಬೋಗಾದಿ ಕೆರೆಗೆ ಯುಜಿಡಿ ನೀರು ಬಂದು ಸೇರುವಲ್ಲಿ ಎಸ್ಟಿಪಿ ಅಳವಡಿಸಲು ನಿರ್ಧರಿಸಲಾಗಿದೆ.
