ಇಂದಿರಾ ಕ್ಯಾಂಟೀನ್​ಗೆ ನೀರಿನ ಸಂಕಷ್ಟ; ಜಲಮಂಡಳಿಗೆ 3.58 ಕೋಟಿ ರೂ. ಬಾಕಿ ನೋಟಿಸ್ ಕೊಟ್ಟರೂ ಪ್ರಯೋಜನ ಇಲ್ಲ

ಅನುದಾನವಿಲ್ಲದೆ ಬೀಗ ಹಾಕುವ ಸ್ಥಿತಿಗೆ ಬಂದು ನಿಂತಿರುವ ಇಂದಿರಾ ಕ್ಯಾಂಟೀನ್​ಗಳಿಗೆ ಈಗ ನೀರಿನ ಸಂಕಷ್ಟ ಎದುರಾಗಿದೆ. ಜಲಮಂಡಳಿಗೆ ಒಟ್ಟು 3.58 ಕೋಟಿ ರೂ. ನೀರಿನ ಬಿಲ್ ಬಾಕಿ ಉಳಿಸಿಕೊಂಡಿರುವುದು ಇದಕ್ಕೆ ಕಾರಣ. ಸಿದ್ದರಾಮಯ್ಯ ಸರ್ಕಾರದ ಅವಧಿಯಲ್ಲಿ ನಗರದ ಎಲ್ಲ ವಾರ್ಡ್​ಗಳಲ್ಲಿ ಇಂದಿರಾ ಕ್ಯಾಂಟೀನ್ ಸ್ಥಾಪನೆ ಮಾಡಲಾಗಿದೆ. ಬಿಬಿಎಂಪಿ ವ್ಯಾಪ್ತಿಯಲ್ಲಿರುವ 174 ಕ್ಯಾಂಟೀನ್​ಗಳ ಪೈಕಿ 146 ಕ್ಯಾಂಟೀನ್​ಗಳಿಗೆ ಜಲಮಂಡಳಿ ಕಾವೇರಿ ನೀರು ಸರಬರಾಜು ಮಾಡುತ್ತಿದೆ. ಆದರೆ, ಈವರೆಗೂ ನೀರಿನ ಬಿಲ್ ಪಾವತಿಯಾಗಿಲ್ಲ.

ಅನುದಾನ ಇಲ್ಲದೆ ಸೊರಗಿದ ಕ್ಯಾಂಟೀನ್: 174 ಸ್ಥಿರ ಮತ್ತು 18 ಮೊಬೈಲ್ ಇಂದಿರಾ ಕ್ಯಾಂಟೀನ್​ಗಳಿವೆ. 2017-18ರಲ್ಲಿ 4.6 ಕೋಟಿ ಮಂದಿ, 2018-19ರಲ್ಲಿ 7.70 ಕೋಟಿ ಹಾಗೂ 2019-20ರಲ್ಲಿ 2.70 ಕೋಟಿ ಜನ ಕ್ಯಾಂಟೀನ್​ನಲ್ಲಿ ಆಹಾರ ಸೇವಿಸಿದ್ದಾರೆ.

ಯೋಜನೆ ಅನುಷ್ಠಾನಕ್ಕೆ ಸರ್ಕಾರ 2017-18ರಲ್ಲಿ 100 ಕೋಟಿ ರೂ. ನೀಡಿತ್ತು. ಆದರೆ, ಅನುಷ್ಠಾನದ ವೇಳೆ ಬಿಬಿಎಂಪಿ ಹೆಚ್ಚುವರಿಯಾಗಿ 24.37 ಕೋಟಿ ರೂ. ವ್ಯಯಿಸಿದೆ. 2018-19ರಲ್ಲಿ 115 ಕೋಟಿ ರೂ. ಬಿಡುಗಡೆ ಮಾಡಿತ್ತಾದರೂ 145 ಕೋಟಿ ರೂ. ವೆಚ್ಚವಾಗಿದೆ. ಉಳಿದ 21.67 ಕೋಟಿ ರೂ. ಬಿಬಿಎಂಪಿಯೇ ಭರಿಸಿದೆ.

ಗುತ್ತಿಗೆದಾರರದ್ದೇ ಹೊಣೆಗಾರಿಕೆ

ನೀರು, ವಿದ್ಯುತ್ ಸೇರಿ ಯಾವುದೇ ಸೌಲಭ್ಯ ಪಡೆದು ಕೊಂಡಿದ್ದರೂ ಗುತ್ತಿಗೆದಾರರೇ ನಿರ್ವಹಿಸಬೇಕು. ಟೆಂಡರ್​ನ ಷರತ್ತಿನ ಪ್ರಕಾರ, ಕ್ಯಾಂಟೀನ್ ನಿರ್ವಹಣೆಗೆ ಸಂಬಂಧಿಸಿದ ಬಿಲ್​ಗಳನ್ನು ಅವರೇ ಪ್ರತಿ ತಿಂಗಳು ಪಾವತಿಸಬೇಕು. ಈ ಹಿನ್ನೆಲೆಯಲ್ಲಿ ಬಿಲ್ ಪಾವತಿಸುವಂತೆ ಗುತ್ತಿಗೆದಾರರಿಗೆ ಜಲಮಂಡಳಿ ಅಧಿಕಾರಿಗಳು ಸಾಕಷ್ಟು ಬಾರಿ ಪತ್ರ ಬರೆದಿದ್ದರೂ ಪ್ರಯೋಜನವಾಗಿಲ್ಲ. ಈ ಹಿನ್ನೆಲೆಯಲ್ಲಿ ನೀರಿನ ಸಂಪರ್ಕ ಕಡಿತಗೊಳಿಸಲು ನಿರ್ಧರಿಸಿತ್ತು. ಆದರೆ, ಸಾಮಾನ್ಯ ಜನರಿಗೆ ತೊಂದರೆಯಾಗುವ ಕಾರಣ ಹಿಂದೇಟು ಹಾಕುತ್ತಿದೆ.

| ವಿಜಯ್ ಮಡಿವಾಳ ಬೆಂಗಳೂರು