ವಿಜಯವಾಣಿ ಸುದ್ದಿಜಾಲ ಬೆಂಗಳೂರು ಗ್ರಾಮಾಂತರ
ದೊಡ್ಡಬಳ್ಳಾಪುರ ಮತ್ತು ಚಿಕ್ಕಬಳ್ಳಾಪುರ ನಗರ ಜನತೆಯ ಜೀವ ಜಲಕ್ಕೆ ಆಸರೆಯಾಗಿರುವ ಜಕ್ಕಲಮಡುಗು ಜಲಾಶಯದಲ್ಲಿ 3 ಅಡಿಗಳಷ್ಟು ನೀರು ಹರಿದು ಬಂದಿದೆ.
ಕಳೆದ ವಾರದಿಂದ ಸುರಿದ ಮಳೆಯಿಂದಾಗಿ ಜಲಾಶಯಕ್ಕೆ ಮಳೆ ನೀರು ಹರಿಯುತ್ತಿದ್ದು, ಬರಿದಾಗುವತ್ತ ಸಾಗಿದ್ದ ಜಲಾಶಯದ ಒಡಲಿಗೆ ಮಳೆರಾಯ ತುಸು ಚೇತರಿಗೆ ತರಿಸಿದ್ದಾನೆ. ಜಲಾಶಯ ಬರಿದಾಗಲಿದ್ದು, ಮುಂದಿನ ದಿನಗಳಲ್ಲಿ ಅವಳಿ ನಗರಗಳಾದ ದೊಡ್ಡಬಳ್ಳಾಪುರ ಹಾಗೂ ಚಿಕ್ಕಬಳ್ಳಾಪುರ ಜನರ ಕುಡಿವ ನೀರಿಗೆ ತೀವ್ರ ಸಮಸ್ಯೆ ಎದುರಾಗಲಿದೆ ಎಂಬ ಆತಂಕ ತುಸು ದೂರವಾದಂತಾಗಿದೆ.
ಕೈ ಕೊಟ್ಟ ಮಳೆ: ಕಳೆದ ಬಾರಿ ಮಳೆ ಕೈಕೊಟ್ಟಿದ್ದರಿಂದ ಜಕ್ಕಲಮೊಡಗು ಜಲಾಶಯದಲ್ಲಿ ಗಣನೀಯಮಟ್ಟದಲ್ಲಿ ನೀರು ಕುಸಿತ ಕಂಡಿತ್ತು. ಇದರಿಂದ ಜಲಾಶಯವನ್ನೇ ಅವಲಂಬಿಸಿರುವ ಎರಡೂ ನಗರಗಳ ನಿವಾಸಿಗಳಿಗೆ ಸಹಜವಾಗಿ ಆತಂಕ ಎದುರಾಗಿತ್ತು, ಕುಡಿವ ನೀರು ಪೂರೈಸುವ ನಗರ ಸಭೆ ಅಧಿಕಾರಿಗಳು ಚಿಂತೆಗೀಡಾಗಿದ್ದರು. ಏತನ್ಮಧ್ಯೆ ಕೆಲ ದಿನಗಳಿಂದ ಸುರಿದ ಮಳೆಗೆ ನೀರಿನ ಹರಿವು ಹೆಚ್ಚಾಗಿರುವುದು ತುಸು ನೆಮ್ಮದಿ ತರಿಸಿದೆ.
22 ಅಡಿಗೆ ಕುಸಿದಿತ್ತು: ಜಕ್ಕಲಮೊಡಗು ಜಲಾಶಯ 64 ಅಡಿಗಳವರೆಗೆ ನೀರು ಸಂಗ್ರಹಣಾ ಸಾಮರ್ಥ್ಯ ಹೊಂದಿದೆ. ಆದರೆ ಮಳೆ ಕೊರತೆಯಿಂದ ಡೆಡ್ಸ್ಟೋರೆಜ್ ಸೇರಿ ನೀರಿನ ಮಟ್ಟ 22 ಅಡಿಗೆ ಕುಸಿದಿತ್ತು. ಮಳೆ ನೀರಿನಿಂದ ಇದೀಗ 22ರಿಂದ 23 ಅಡಿಗಳವರೆಗೆ ನೀರಿನ ಮಟ್ಟ ಏರಿಕೆ ಕಂಡಿದೆ. ಇಷ್ಟು ಮಟ್ಟದ ನೀರು ಶೇಕರಣೆಯಾಗಿರುವುದರಿಂದ ಸುಮಾರು 1 ತಿಂಗಳವರೆಗೆ ಎರಡೂ ನಗರಗಳಿಗೆ ನೀರು ಪೂರೈಸಲು ತೊಂದರೆಯಾಗುವುದಿಲ್ಲ ಎಂಬುದು ನಗರಸಭೆ ಅಧಿಕಾರಿಗಳ ಸಮಾಧಾನವಾಗಿದೆ. ಇದರ ನಡುವೆ ಇನ್ನು ಕೆಲವು ದಿನ ಮಳೆಯಾಗಲಿದೆ ಎಂಬ ಹವಾಮಾನ ಇಲಾಖೆಯ ವರದಿ ಹಾಗೂ ಮುಂದಿನ ಮಳೆಗಾಲದಲ್ಲಿ ನಿರೀಕ್ಷಿತ ಮಳೆಯಾಗಲಿದೆ ಎಂಬ ಭರವಸೆ ಹಿನ್ನೆಲೆಯಲ್ಲಿ ಮತ್ತೊಮ್ಮೆ ಈ ಬಾರಿ ಜಲಾಶಯ ತುಂಬಿ ಹರಿಯಲಿದೆ ಎಂಬುದು ಜನರ ಆಶಾಭಾವನೆಯಾಗಿದೆ.
