ಹಿರಿಯಡಕ ವ್ಯಾಪ್ತಿಯ ತೋಟಗಳಿಗೆ ನೀರು ಪೂರೈಸಲು ಅವಕಾಶ ನೀಡಿದರೆ ಉಡುಪಿ ನಗರಕ್ಕೆ ಕೊರತೆಯಾಗಬಹುದು ಎಂಬ ಕಾರಣಕ್ಕೆ ಸ್ವರ್ಣಾ ನದಿ ಎಡ, ಬಲದಂಡೆಯ ಸುಮಾರು 68 ಪಂಪ್ಸೆಟ್ಗಳ ವಿದ್ಯುತ್ ಸಂಪರ್ಕವನ್ನು ಜಿಲ್ಲಾಡಳಿತ ಸ್ಥಗಿತಗೊಳಿಸಿದೆ. ವಾರಕ್ಕೆ 1 ದಿನ ಮಾತ್ರ ನೀರು ಪಡೆಯಲು ಅವಕಾಶ ನೀಡಲಾಗಿದೆ. ಪರಿಣಾಮ 400 ಹೆಕ್ಟೆರ್ ಬೆಳೆಗೆ ನೀರಿನ ಸಮಸ್ಯೆ ಎದುರಾಗಿದೆ. ಈ ಪ್ರದೇಶದಲ್ಲಿ ಪ್ರಮುಖ ಬೆಳೆಗಳಾದ ತೆಂಗು, ಅಡಕೆ, ಬಾಳೆ, ಕಾಳುಮೆಣಸಿಗೆ ನೀರಿನ ಅಗತ್ಯ ಹೆಚ್ಚಿರುವುದರಿಂದ ಅಧಿಕ ನೀರಿಲ್ಲದೆ ಬೆಳೆಗಳು ಸೊರಗಲಾರಂಭಿಸಿವೆ. ಹೈನುಗಾರಿಕೆಗೂ ನೀರಿನ ಬಿಸಿ ತಟ್ಟಿದ್ದು, ಜಾನುವಾರುಗಳಿಗೆ ಕುಡಿಯುವ ನೀರು, ಮೇವಿಗೂ ಕುಂದುಂಟಾಗುವ ಸಾಧ್ಯತೆಯಿದೆ. ಹೀಗಾಗಿ ವಾರಕ್ಕೆ 2 ದಿನ ನದಿಯಿಂದ ನೀರು ಪಡೆಯಲು ಅವಕಾಶ ನೀಡಬೇಕು ಎಂಬುದು ರೈತರ ಮನವಿ.
