ಬೆಂಗಳೂರು: ಪಾಲಿಕೆ ವ್ಯಾಪ್ತಿಯಲ್ಲಿ ಪ್ರತಿನಿತ್ಯ 5 ಸಾವಿರ ಟನ್ಗಿಂತಲೂ ಕಸ ಉತ್ಪಾದನೆಯಾಗುತ್ತಿದ್ದು, ಕಸ ಸುರಿಯಲು ಮಿಟ್ಟಗಾನಹಳ್ಳಿಯಲ್ಲಿ ಗುರುತಿಸಲಾಗಿರುವ ಕ್ವಾರಿ ಭರ್ತಿಯಾಗುತ್ತಿದ್ದು, ಮತ್ತೊಮ್ಮೆ ಕಸ ವಿಲೇವಾರಿ ಸಮಸ್ಯೆ ಉಂಟಾಗುವ ಸಾಧ್ಯತೆಯಿದೆ. 1.3 ಕೋಟಿ ಜನಸಂಖ್ಯೆ ಹೊಂದಿರುವ ರಾಜಧಾನಿಯಲ್ಲಿ 5 ಸಾವಿರ ಟನ್ ಕಸ ಉತ್ಪಾದನೆಯಾದರೂ, 2,200 ಮೆ.ಟನ್ ಕಸ ಮಾತ್ರ ಸಂಸ್ಕರಣೆಯಾಗಿ ವಿಲೇವಾರಿಯಾಗುತ್ತಿದೆ. ಉಳಿದ 2,400 ಮೆ.ಟನ್ಗಿಂತ ಹೆಚ್ಚು ಕಸವನ್ನು ತಾತ್ಕಾಲಿಕವಾಗಿ ಕಸ ಸುರಿಯುವ ಸ್ಥಳಗಳನ್ನು ಗುರುತಿಸಿ ಸುರಿಯಲಾಗುತ್ತಿದೆ. ಈಗಾಗಲೇ ಸಾವಿರಾರು ಟನ್ ಕಸವನ್ನು ಅವೈಜ್ಞಾನಿಕವಾಗಿ ಹೊರ ವಲಯದ ಗುಂಡಿಗಳು, ಬಯಲು ಪ್ರದೇಶಗಳು ಹಾಗೂ ಕಲ್ಲು ಕ್ವಾರಿಯಲ್ಲಿ ಸುರಿಯಲಾಗಿದೆ.
