ನೆಮ್ಮದಿಯಿಂದ ಬದುಕು ಸಾಗಿಸುತ್ತಿದ್ದ ಚಿತ್ರನಗರಿ ಪಕ್ಕದಲ್ಲಿರುವ ಸಾಬರಹುಂಡಿ ಗ್ರಾಮಸ್ಥರಿಗೆ ಆತಂಕ ಪ್ರಾರಂಭವಾಗಿದೆ. ಉದ್ದೇಶಿತ ಚಿತ್ರನಗರಿ ನಿರ್ಮಾಣ ನಿಗದಿಪಡಿಸಿರುವ ಸನಿಹದಲ್ಲೇ ಸಾಬರಹುಂಡಿ ಗ್ರಾಮವಿದೆ. ಸಾಬರಹುಂಡಿ ಗ್ರಾಮ ಇರುವ ಬಗ್ಗೆ ಆಧಾರ್ ಕಾರ್ಡ್, ಗುರುತಿನ ಚೀಟಿ, ರೇಷನ್ ಕಾರ್ಡ್, ಮನೆಗಳು ಸಹ ಇವೆ. ಆದರೆ, ಈ ಗ್ರಾಮ ಇರುವ ಬಗ್ಗೆ ಸಮೀಪದ ಹುಳಿಮಾವು ಗ್ರಾಮ ಪಂಚಾಯಿತಿ ಅಧಿಕಾರಿಗಳು, ಕಂದಾಯ ಅಧಿಕಾರಿಗಳು, ತಾಲೂಕು ಪಂಚಾಯಿತಿ ಅಧಿಕಾರಿಗಳಿಗೆ ಮಾಹಿತಿ ಇಲ್ಲ. ಸುಮಾರು ಹತ್ತಕ್ಕೂ ಹೆಚ್ಚು ಕುಟುಂಬದ ನೂರಾರು ಬಡ ಮುಸ್ಲಿಮರು ಪೂರ್ವಜರ ಕಾಲದಿಂದಲೂ ಇದೇ ಜಾಗದಲ್ಲಿ ವ್ಯವಸಾಯ ಹಾಗೂ ಕೂಲಿ ಮಾಡಿ ಜೀವನ ಸಾಗಿಸುತ್ತಿದ್ದಾರೆ. ಜಮೀನಿಗೆ ಸಂಬಂಧಿಸಿದ ಪಹಣಿಗಳಲ್ಲಿ ಗ್ರಾಮಸ್ಥರ ಹೆಸರು ನಾಪತ್ತೆಯಾಗಿ ಭೂಸ್ವಾಧೀನ ಪ್ರಕ್ರಿಯೆ ಎಂದು ಬದಲಾಗಿದ್ದು ಇವರ ಗಮನಕ್ಕೂ ಕೂಡ ಬಂದಿಲ್ಲ. ಭೂಸ್ವಾಧೀನ ಪ್ರಕ್ರಿಯೆ ಬಳಿಕ ಇವರನ್ನ ಚಿಂತೆಗೀಡು ಮಾಡಿಬಿಟ್ಟಿದೆ. ಅದರಲ್ಲೂ ಈಗ ಚಿತ್ರನಗರಿ ಕಾಮಗಾರಿ ಪ್ರಗತಿಯಲ್ಲಿದೆ. ಕಾಂಪೌಂಡ್ ನಿರ್ಮಾಣವಾಗುತ್ತಿರುವ ಸ್ಥಳದಲ್ಲಿ ಸಾಬರಹುಂಡಿ ಗ್ರಾಮಸ್ಥರಿಗೆ ಸೇರಿದ ಸುಮಾರು 53 ಎಕರೆ ಜಮೀನು ನಮಗೆ ಸೇರಬೇಕು. ಅಧಿಕಾರಿಗಳು ಪ್ರಸ್ತುತ ಉಳುಮೆ ಮಾಡಲು ಸಹ ಬಿಡುತ್ತಿಲ್ಲ. ಜತೆಗೆ ರಾತ್ರೋರಾತ್ರಿ ನುಗ್ಗಿ ಜೆಸಿಬಿ ಮೂಲಕ ಮನೆಗಳನ್ನು ಧ್ವಂಸ ಮಾಡುತ್ತಾರೆ. ಕೇಳಲು ಹೋದರೆ ಮಕ್ಕಳು, ವೃದ್ಧರು ಎನ್ನದೆ ಹಲ್ಲೆ ಮಾಡುತ್ತಾರೆ ಎಂದು ಇಲ್ಲಿನ ನಿವಾಸಿಗಳು ಅಳಲು ತೋಡಿಕೊಂಡಿದ್ದಾರೆ.
