ಆ ಕಾಲದಲ್ಲೇ ಜಿಲ್ಲೆಯಲ್ಲಿ ಒಟ್ಟು 136 ಅರಣ್ಯ ಪಂಚಾಯಿತಿಗಳು ಹಾಗೂ ಕುಮಟಾ ತಾಲೂಕೊಂದರಲ್ಲೇ 13 ಅರಣ್ಯ ಪಂಚಾಯಿತಿ ಸ್ಥಾಪನೆಯಾಗಿದ್ದವು. ಆದರೆ, ದೇಶದ ಕಾನೂನು ಬದಲಾವಣೆ ಇನ್ನಿತರ ಕಾರಣಕ್ಕೆ ಜಿಲ್ಲೆಯಲ್ಲಿ ಮಾತ್ರವಲ್ಲದೇ ಇಡೀ ದೇಶದಲ್ಲೇ ಅರಣ್ಯ ಪಂಚಾಯಿತಿಗಳು ಅಳಿದು ಹೋಗಿವೆ. 1960 ದಶಕದಲ್ಲಿ ಹೊಸ ಅರಣ್ಯ ಕಾಯ್ದೆ ಜಾರಿಗೆ ಬಂದಾಗ ಗ್ರಾಮದ ಉಸ್ತುವಾರಿಯಲ್ಲಿದ್ದ ಅನೇಕ ಅರಣ್ಯ ಪ್ರದೇಶಗಳು ನಾಶವಾಗುತ್ತಿರುವುದನ್ನು ಮನಗಂಡು, ಅರಣ್ಯ ಪಂಚಾಯಿತಿಗಳನ್ನು ರದ್ದುಪಡಿಸಿ, ಅರಣ್ಯ ಭೂಮಿಯನ್ನು ಪುನಃ ಇಲಾಖೆಗೆ ವರ್ಗಾಯಿಸುವಂತೆ 1979 ರಂದು ಅಂದಿನ ಜಿಲ್ಲಾಧಿಕಾರಿ ಆದೇಶಿಸಿದ್ದರು. ಆದರೆ ಹಳಕಾರಿನ ಜನ ಮಾತ್ರ ಸುಮಾರು 10 ವರ್ಷ ಕಾನೂನು ಸಮರ ನಡೆಸಿ, 1989 ರಲ್ಲಿ ಐತಿಹಾಸಿಕ ಜಯ ದಾಖಲಿಸಿ, ಅರಣ್ಯ ಪಂಚಾಯಿತಿ ಉಳಿಸಿಕೊಂಡರು. ಬಳಿಕ 1998ರಲ್ಲಿ ತನ್ನದೇ ಆದ ಕಚೇರಿ ಕಟ್ಟಡ ನಿರ್ಮಿಸಿಕೊಂಡಿದೆ. ಸಾಮಾಜಿಕ ಹಾಗೂ ಶೈಕ್ಷಣಿಕ ಕಾಳಜಿಗೆ ಅರಣ್ಯದ ಕೆಲ ಪ್ರದೇಶವನ್ನು ಗ್ರಾಮದ ಒಟ್ಟಾಭಿಪ್ರಾಯದಿಂದ ನೀಡಿದ್ದು ಬಿಟ್ಟರೆ ಒಂದಿಂಚೂ ಅತಿಕ್ರಮಣ ಈವರೆಗೂ ನಡೆಯಲು ಬಿಟ್ಟಿಲ್ಲ.
