ವಿಜಯವಾಣಿ ಕಚೇರಿಗೆ ವಿದ್ಯಾರ್ಥಿಗಳ ಶೈಕ್ಷಣಿಕ ಭೇಟಿ

ವಿಜಯವಾಣಿ ಸುದ್ದಿಜಾಲ ಬೆಳಗಾವಿ

ಬೆಳಗಾವಿಯ ಆರ್.ಎನ್.ಶೆಟ್ಟಿ ಪಾಲಿಟೆಕ್ನಿಕ್ ಕಾಲೇಜು ಹಾಗೂ ಚಿಕ್ಕೋಡಿಯ ಕೆಎಲ್‌ಇ ಸಂಸ್ಥೆಯ ಬಸವಪ್ರಭು ಕೋರೆ ಕಲಾ, ವಿಜ್ಞಾನ ಹಾಗೂ ವಾಣಿಜ್ಯ ಮಹಾವಿದ್ಯಾಲಯದ ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರು ಶುಕ್ರವಾರ ಕನ್ನಡದ ನಂ.1 ಪತ್ರಿಕೆ ಬೆಳಗಾವಿ ವಿಜಯವಾಣಿ ಕಚೇರಿ ಹಾಗೂ ಹೊನಗಾ ಕೈಗಾರಿಕಾ ಪ್ರದೇಶದಲ್ಲಿರುವ ವಿಆರ್‌ಎಲ್ ಮೀಡಿಯಾ ಪ್ರಿಂಟಿಂಗ್ ಪ್ರೆಸ್‌ಗೆ ಶೈಕ್ಷಣಿಕ ಭೇಟಿ ನೀಡಿ ಪತ್ರಿಕೆಯ ಕಾರ್ಯ ವಿಧಾನ ತಿಳಿದುಕೊಂಡು ಖುಷಿಪಟ್ಟರು.

ಮೊದಲಿಗೆ ಹಳೇ ಪಿ.ಬಿ. ರಸ್ತೆಯ ದೊಡ್ಡಣ್ಣನವರ ಕಾಂಪೌಂಡ್‌ನಲ್ಲಿರುವ ವಿಜಯವಾಣಿ ಕಚೇರಿಗೆ ಭೇಟಿ ನೀಡಿ, ವರದಿಗಾರಿಕೆ, ಸುದ್ದಿ ಪರಿಷ್ಕರಣೆ, ಪುಟ ವಿನ್ಯಾಸ ಕಾರ್ಯ ವಿಧಾನ ತಿಳಿದುಕೊಂಡರು. ಬಳಿಕ ಹೊನಗಾದಲ್ಲಿರುವ ಪತ್ರಿಕೆಯ ‘ಪ್ರಿಂಟಿಂಗ್ ಪ್ರೆಸ್‌ಗೆ’ ತೆರಳಿ ಪತ್ರಿಕೆ ಮುದ್ರಣ ಕಾರ್ಯ ನೋಡಿ ಸಂತಸಪಟ್ಟರು.

ವಿವಿಧ ಕ್ಷೇತ್ರಗಳ ಸುದ್ದಿಗಳನ್ನು ಹೊತ್ತ ಪತ್ರಿಕೆಯನ್ನು ಜನರಿಗೆ ಚಹಾ ಕುಡಿಯುವ ಮುನ್ನವೇ ತಲುಪಿಸುವ ಪತ್ರಿಕಾಲಯದ ತಂಡದ ಕಾರ್ಯವೈಖರಿ ತಿಳಿದುಕೊಂಡು ಪುಳಕಿತರಾದರು. ‘ಕಾಲೇಜುಗಳಲ್ಲಿ ಇಡುವ ಪತ್ರಿಕೆಯನ್ನು ಸಾಮಾನ್ಯವಾಗಿ ಓದುತ್ತೇವೆ. ಆದರೆ, ಪತ್ರಿಕೆ ಸಿದ್ಧಪಡಿಸುವುದರ ಹಿಂದಿನ ಶ್ರಮ, ಸಿಬ್ಬಂದಿ ಕಾರ್ಯ ವೈಖರಿ ಅಗಾಧ. ಇಂದಿನ ತಂತ್ರಜ್ಞಾನ ಯುಗದಲ್ಲಿ ತಂತ್ರಜ್ಞಾನ ಬಳಸಿಕೊಂಡು ಗುಣಮಟ್ಟದ ಪತ್ರಿಕೆ ಹೊರತರುವಲ್ಲಿ ವಿಜಯವಾಣಿ ಮಾಡುತ್ತಿರುವ ಕಾರ್ಯ ಮಾದರಿಯಾಗಿದೆ. ಜೀವನದಲ್ಲಿ ಸಮಯ ಎಷ್ಟು ಮುಖ್ಯ ಎಂಬುವುದನ್ನೂ ವಿಆರ್‌ಎಲ್ ಮೀಡಿಯಾ ಪ್ರಿಂಟಿಂಗ್ ಪ್ರೆಸ್‌ಗೆ ಭೇಟಿ ನಂತರ ತಿಳಿಯಿತು’ ಎಂದು ವಿದ್ಯಾರ್ಥಿಗಳು ಹರ್ಷ ವ್ಯಕ್ತಪಡಿಸಿದರು.

ಸಂಕೇಶ್ವರ ಕುಟುಂಬದ ಕಾರ್ಯ ಸಮಾಜಕ್ಕೆ ಮಾದರಿ

ಕನ್ನಡ ಪತ್ರಿಕೋದ್ಯಮದಲ್ಲಿ ವಿಜಯವಾಣಿ ಮುಂಚೂಣಿಯಲ್ಲಿದೆ ಎನ್ನುವುದನ್ನು ಕೇಳಿದ್ದೇವು. ಆದರೆ, ಪತ್ರಿಕೆ ಕಾರ್ಯಾಲಯ, ಪ್ರಿಂಟಿಂಗ್ ಯೂನಿಟ್‌ಗೆ ಭೇಟಿ ನೀಡಿ ಅಲ್ಲಿಯ ಕಾರ್ಯ ವೈಖರಿ, ಶ್ರದ್ಧೆ, ಗುಣಮಟ್ಟದ ಕಾರ್ಯಗಳಿಗೆ ಪ್ರತಿಫಲವೆಂಬಂತೆ ವಿಜಯವಾಣಿ ಅಗ್ರಸ್ತಾನದಲ್ಲಿದೆ ಎಂದು ಗೊತ್ತಾಯಿತು. ವಿಆರ್‌ಎಲ್ ಸಮೂಹ ಸಂಸ್ಥೆಗಳ ಸಂಸ್ಥಾಪಕ ಡಾ.ವಿಜಯ ಸಂಕೇಶ್ವರ, ಡಾ.ಆನಂದ ಸಂಕೇಶ್ವರ ಅವರದ್ದು ಸಮಾಜಕ್ಕೆ ಮಾದರಿ ವ್ಯಕ್ತಿತ್ವ. ಅವರು ಕಟ್ಟಿ ಬೆಳೆಸಿರುವ ವಿಆರ್‌ಎಲ್ ಲಾಜಿಸ್ಟಿಕ್, ಸುರಕ್ಷತೆಗೆ ಹೆಸರಾದ ಬಸ್ ಸೇವೆ ಮತ್ತು ನಂಬರ್ 1 ದಿನಪತ್ರಿಕೆ ವಿಜಯವಾಣಿಯನ್ನು ನೋಡಿದಾಗಲೆಲ್ಲ ಅಭಿಮಾನ ಹೆಚ್ಚುತ್ತದೆ. ಕಾಲೇಜಿನ ಪರವಾಗಿ ಧನ್ಯವಾದಗಳು’ ಎಂದು ಶಿಕ್ಷಕರು ವಿದ್ಯಾರ್ಥಿಗಳು ತಿಳಿಸಿದರು.