ಎಲ್ಲರ ಹೃದಯ ಕದ್ದ ಗೋಪಿಲೋಲ

ವಿಜಯವಾಣಿ ಸುದ್ದಿಜಾಲ ಬೆಳಗಾವಿ

ರಾಜ್ಯದ ನಂ.1 ಕನ್ನಡ ದಿನಪತ್ರಿಕೆ ವಿಜಯವಾಣಿ, ಎಸ್‌ಎಸ್‌ಬಿ ಇಂಜಿನಿಯರ್ ಮತ್ತು ಕಂಟ್ರ್ಯಾಕ್ಟರ್, ಬಿ.ಎಸ್.ಚನ್ನಬಸಪ್ಪ ಮತ್ತು ಸನ್ಸ್, ಜಯಭಾರತ ಫೌಂಡೇಷನ್, ಬಾಲ ಸಂಜೀವಿನಿ ಚಿಕಿತ್ಸಾಲಯ ಹಾಗೂ ಅನ್ನಪೂಣೇಶ್ವರಿ ಥಾಲಿ ರೆಸ್ಟೋರೆಂಟ್ ಸಹಯೋಗದಲ್ಲಿ ಶನಿವಾರ ಹಮ್ಮಿಕೊಂಡಿದ್ದ ಕೃಷ್ಣವೇಷ ಫ್ಯಾನ್ಸಿ ಡ್ರೆಸ್ ಸ್ಪರ್ಧೆ ಅರ್ಥಪೂರ್ಣವಾಗಿ ಜರುಗಿತು.

ನಗರದ ಕೃಷ್ಣ ದೇವರಾಯ ವೃತ್ತ ಬಳಿಯ ಅನ್ನಪೂಣೇಶ್ವರಿ ಥಾಲಿ ರೆಸ್ಟೋರೆಂಟ್ ಅಯೋಧ್ಯೆ ಸಭಾಂಗಣದಲ್ಲಿ ಹಮ್ಮಿಕೊಂಡಿದ್ದ ಸ್ಪರ್ಧೆಗೆ ರಾಷ್ಟ್ರೀಯ ಹೆದ್ದಾರಿ ವಿಶೇಷ ಭೂ ಸ್ವಾಧೀನಾಧಿಕಾರಿ ರಾಜಶ್ರೀ ಜೈನಾಪುರ ಗಿಡಕ್ಕೆ ನೀರು ಹಾಕುವ ಮೂಲಕ ಚಾಲನೆ ನೀಡಿದರು.

ಮನ ಸೆಳೆದ ಕೃಷ್ಣ: ಅಯೋಧ್ಯ ಸಭಾಭವನ ನಂದಗೋಕುಲದಂತಾಗಿತ್ತು. ಎಲ್ಲಿ ನೋಡಿದರಲ್ಲಿ ಧೋತಿ, ಸೊಂಟಕ್ಕೆ ಪಟ್ಟಿ, ತಲೆಯಲ್ಲಿ ನವಿಲು ಗರಿ ಸಿಕ್ಕಿಸಿಕೊಂಡ ಕಿರೀಟ, ಕೊರಳಲ್ಲಿ ಮಣಿ ಹಾರ, ಕೈಯಲ್ಲೊಂದು ಕೊಳಲು, ಮೈತುಂಬ ಆಭರಣ ಸರಗಳ ಮಾಲೆ, ರೇಷ್ಮೆ ಪಂಚೆ, ತೋಳುಬಂಧಿ, ಕೈನಲ್ಲಿ ಬೆಣ್ಣೆ ಕುಡಿಕೆ ಹಿಡಿದು ಪುಟಾಣಿ ಮಕ್ಕಳು ಹೆಜ್ಜೆಹಾಕುವ ದೃಶ್ಯಗಳು ನೆರೆದವರನ್ನು ದ್ವಾಪರಯುಗಕ್ಕೆ ಕರೆದುಕೊಂಡು ಹೋಗುವಂತಿದ್ದವು.

ಮಳೆ ಲೆಕ್ಕಿಸದೆ ಬಂದ ಮಕ್ಕಳು:

ಜಿಟಿಜಿಟಿ ಮಳೆ ನಡುವೆಯೂ ರಾಣಿ ಚನ್ನಮ್ಮ ನಗರ, ವಡಗಾವಿ, ವಿಶ್ವೇಶ್ವರಯ್ಯ ನಗರ, ಸಮರ್ಥ ನಗರ, ವೀರಭದ್ರನಗರ, ಕುಮಾರಸ್ವಾಮಿ ಬಡಾವಣೆ, ಬೈಲಹೊಂಗಲ, ಚ.ಕಿತ್ತೂರು ಸೇರಿ ವಿವಿಧ ತಾಲೂಕುಗಳಿಂದ ಮಕ್ಕಳು ಆಗಮಿಸಿ ಎಲ್ಲರ ಗಮನ ಸೆಳೆದರು. ಮನೆ ಕಂದಮ್ಮಗಳ ತುಂಟಾಟಗಳನ್ನು ಕುಟುಂಬ ಸದಸ್ಯರು, ಗಣ್ಯರು ಕಣ್ತುಂಬಿಕೊಂಡು ಹರಸಿ ಹಾರೈಸಿದರು.

ವಿಜಯವಾಣಿ ಸ್ಥಾನಿಕ ಸಂಪಾದಕ ಮಹೇಶ ವಿಜಾಪುರ, ಪ್ರಸಾರಾಂಗ ವಿಭಾಗದ ವ್ಯವಸ್ಥಾಪಕ ರಘುವೀರ ಕುಲಕರ್ಣಿ, ಬಿ.ಎಸ್. ಚನ್ನಬಸಪ್ಪ ಆ್ಯಂಡ್ ಸನ್ಸ್‌ನ ವ್ಯವಸ್ಥಾಪಕ ಈರಣ್ಣ ಶಿವಶಟ್ಟಿ, ಎ.ಜಾಮಾದಾರ, ತೀರ್ಪುಗಾರರಾದ ಜ್ಯೋತಿ ಮುತ್ತೂರ, ಅಜಿತ್ ಅವರಾದ್ಕರ, ಮೋನಿಕಾ ಬೆಳಗಾವಂಕರ್ ಇತರರಿದ್ದರು. ನಗದು ಬಹುಮಾನ ವಿತರಣೆ

ಕೃಷ್ಣವೇಷ ಫ್ಯಾನ್ಸಿ ಡ್ರೆಸ್ ಸ್ಪರ್ಧೆಯ 0 ರಿಂದ 5 ವರ್ಷದ ವಿಭಾಗದಲ್ಲಿ ಪ್ರಥಮ ಪೂರ್ಣಾ ಹೆಗಡೆ, ದ್ವಿತೀಯ ಶ್ರೀಶಾ ಭಸ್ಮೆ, ತೃತೀಯ ಸನ್ವಿತ ಚಿಕ್ಕಬಾಗೇವಾಡಿ ಬಹುಮಾನ, 6ರಿಂದ 12ವರ್ಷದ ವಿಭಾಗದಲ್ಲಿ ಪ್ರಥಮ ಆಧ್ಯಾ ಕಾಡಗೌಡರ, ದ್ವಿತೀಯ ಶ್ರೀಶಾಂತ ಕಾಡಣ್ಣವರ, ತೃತೀಯ ಶ್ರೀನಿಧಿ ಕಾಡಣ್ಣವರ ಬಹುಮಾನ ಪಡೆದುಕೊಂಡರು. ಸ್ಪರ್ಧೆಯಲ್ಲಿ ಪಾಲ್ಗೊಂಡಿದ್ದ ಎಲ್ಲ ಮಕ್ಕಳಿಗೂ ಪ್ರಮಾಣ ಪತ್ರ, ಬಿ.ಎಸ್.ಚನ್ನಬಸಪ್ಪ ಮತ್ತು ಸನ್ಸ್‌ನಿಂದ ಕೊಪನ್ ನೀಡಲಾಯಿತು.

ವಿಜಯವಾಣಿ ಕಾರ್ಯಕ್ಕೆ ಮೆಚ್ಚುಗೆ

ವಿಜಯವಾಣಿ ದಿನಪತ್ರಿಕೆ ಸಮಾಜಮುಖಿ ಕೆಲಸಗಳನ್ನು ನಿರಂತವಾಗಿ ಮಾಡಿತ್ತ ಬರುತ್ತಿರುವುದು ಹೆಮ್ಮೆ ವಿಷಯವಾಗಿದೆ. ಕೃಷ್ಣವೇಷ ಫ್ಯಾನ್ಸಿ ಡ್ರೆಸ್ ಸ್ಪರ್ಧೆ ಆಯೋಜಿಸುವ ಮೂಲಕ ಭಾರತೀಯ ಸಂಸ್ಕೃತಿ ಎತ್ತಿ ಹಿಡಿಯುವ ಕೆಲಸ ಮಾಡಿದೆ. ಈ ಸ್ಪರ್ಧೆಯಲ್ಲಿ ಭಾಗವಹಿಸಿರುವ ಮಕ್ಕಳಿಗೆ ನ್ಯಾಯ, ನೀತಿ, ಧಾರ್ಮಿಕತೆಯ ಮಹತ್ವನ್ನು ಹೆತ್ತವರು ತಿಳಿಸಿದರೆ ಮಾತ್ರ ಇಂತಹ ಕಾರ್ಯಕ್ರಮಗಳಿಗೆ ಮಹತ್ವ ಬರುತ್ತದೆ. ದ್ವಾಪರಯುಗದ ಶ್ರೀಕೃಷ್ಣನ ಎಲ್ಲ ಸ್ಥಳಗಳನ್ನು ನೋಡಿ ಬಂದಿದ್ದೇನೆ. ಈಗಲೂ ಕೃಷ್ಣ ಜೀವಂತವಾಗಿದ್ದಾನೆ. ನಮ್ಮನ್ನೆಲ್ಲ ಕಾಯುತ್ತಿದ್ದಾನೆ ಎಂಬುವುದನ್ನು ಕೃಷ್ಣವೇಷದ ಮಕ್ಕಳೇ ಸಾಕ್ಷಿ ಎಂದು ರಾಷ್ಟ್ರೀಯ ಹೆದ್ದಾರಿ ವಿಶೇಷ ಭೂ ಸ್ವಾಧೀನಾಧಿಕಾರಿ ರಾಜಶ್ರೀ ಜೈನಾಪುರ ತಿಳಿಸಿದರು.