ಆ ಬಗೆಯ ಸಮಸ್ಯೆ ಇರುವುದು ನಿಜ. ಆದರೆ, ಸಾರಾಸಗಟಾಗಿ ಎಲ್ಲರೂ ಹಾಗೇ ಎಂಬ ತೀರ್ವನಕ್ಕೆ ಬರಲಾಗದು. ಹೊಸ ಪೀಳಿಗೆಯ ಪಾಲಕರು ಸಹ ತಮ್ಮ ಮಗು ಕನ್ನಡ ಭಾವಗೀತೆ ಕಲಿಯಬೇಕು, ಕನ್ನಡ ಚೆನ್ನಾಗಿ ಮಾತನಾಡಬೇಕು ಎಂದು ಹಂಬಲಿಸುವವರು ಸಾಕಷ್ಟು ಇದ್ದಾರೆ. ಕನ್ನಡದ ಬಗ್ಗೆ ಅಪಾರ ಪ್ರೀತಿ ಹೊಂದಿದವರೂ ಇದ್ದಾರೆ. ಕನ್ನಡದ ಬಗ್ಗೆ ತುಂಬ ಮುಖ್ಯವಾಗಿ ಹಾಗೂ ಯಾರೂ ಅಡ್ಡಿಪಡಿಸಲಾಗದ ಕಾರ್ಯವೊಂದನ್ನು ಎಲ್ಲರೂ ಮಾಡಬಹುದಾಗಿದೆ. ಅದುವೇ, ಮೊದಲು ನಮ್ಮ ಮಕ್ಕಳೊಂದಿಗೆ ಕನ್ನಡ ಮಾತನಾಡಬೇಕು. ಮನೆಯ ಅಂಗಳದ ಎಲ್ಲ ವ್ಯವಹಾರಗಳು, ಆಪ್ತ ಮಾತುಕತೆಗಳು ಕನ್ನಡದಲ್ಲೇ ನಡೆಯಬೇಕು. ನಮ್ಮ ಮಕ್ಕಳನ್ನು ಕನ್ನಡದಲ್ಲೇ ಮುದ್ದಿಸಬೇಕು. ವ್ಯವಹಾರದ ಭಾಷೆ ಕನ್ನಡ ಆಗುವಂತೆಯೇ ಮನೆಯ ಭಾಷೆ ಮತ್ತು ಹೃದಯದ ಭಾಷೆ ಕನ್ನಡವಾಗಬೇಕು. ಇದು ನಿತ್ಯಾನುಷ್ಠಾನವಾಗಬೇಕು. ನಿತ್ಯೋತ್ಸವವಾಗಬೇಕು. ನಿತ್ಯೋತ್ಸವವೆಂದರೆ ಬರೀ ಕಾರ್ಯಕ್ರಮಗಳನ್ನು ಮಾಡುವುದಲ್ಲ. ನಮ್ಮ ಮನೆಯಲ್ಲಿ ಕನ್ನಡವನ್ನು ಚೆನ್ನಾಗಿ ಬಳಸುವುದು, ಬೆಳೆಸುವುದು ನಿಜವಾದ ನಿತ್ಯೋತ್ಸವ. ಇದನ್ನು ಸರ್ಕಾರ ಮಾಡಬೇಕು. ಮತ್ತೊಬ್ಬರು ಮಾಡಬೇಕು ಅಂತೇನಿಲ್ಲ. ಕನ್ನಡ ಮಾತನಾಡಲು ಈ ದಿನ, ಈ ಕ್ಷಣವೇ ಮುಹೂರ್ತವಾಗಲಿ. ಪ್ರತಿನಿತ್ಯ, ಪ್ರತಿಕ್ಷಣ ಕನ್ನಡದ ಜಾಗೃತಿಗಾಗಿ ಹೋರಾಟ ಮಾಡಬೇಕು. ಇದನ್ನು ಪ್ರಜ್ಞಾಪೂರ್ವಕವಾಗಿ ಮಾಡಿದರೆ, ಮುಂದೆ ಅದುವೇ ಅಪ್ರಜ್ಞಾಪೂರ್ವಕವಾಗಿ ಮುಂದುವರಿಯುತ್ತದೆ. ಇದಕ್ಕಾಗಿ ಸಾತ್ವಿಕ ಸಂಕಲ್ಪ ಮಾಡಬೇಕು. ಸ್ನೇಹಿತರೊಂದಿಗೆ, ಶಿಕ್ಷಕರೊಂದಿಗೆ, ಸಾಹಿತಿಗಳೊಂದಿಗೆ ಕನ್ನಡದಲ್ಲೇ ಮಾತನಾಡುತ್ತೇನೆ, ವ್ಯವಹರಿಸುತ್ತೇನೆ ಎಂದು. ನಿತ್ಯ ವ್ಯವಹಾರ ಭಾಷೆಯಾಗಿ ಬಳಸಿದರೆ ಅದು ಎಲ್ಲ ಕಡೆ ಹಬ್ಬುತ್ತದೆ. ಅಭಿಮಾನ ಕೂಡ ಸಾಂಕ್ರಮಿಕವಾಗುತ್ತದೆ!
