ಬದುಕಿನ ಹೆಜ್ಜೆ ಗುರುತು: ಕವಲಗಿಯವರು ಮೂಲತಃ ಬಸವನಬಾಗೇವಾಡಿ ತಾಲೂಕಿನ ಉತ್ನಳ ಗ್ರಾಮದವರು. ತಂದೆ ಶಾಂತಪ್ಪ, ತಾಯಿ ನೀಲಮ್ಮ. ಇಬ್ಬರೂ ಕೃಷಿಯಿಂದಲೇ ಬದುಕು ಕಟ್ಟಿಕೊಂಡವರು. ಕಠಿಣ ಪರಿಶ್ರಮದಿಂದ ಉನ್ನತ ಗುರಿ ತಲುಪಿ ಸಮಾಜಕ್ಕೆ ಕೊಡುಗೆ ಸಲ್ಲಿಸಬೇಕು ಎಂಬ ಕನಸು ಕಂಡವರು. ಉತ್ನಾಳದ ಸರ್ಕಾರಿ ಶಾಲೆಯಲ್ಲಿ ಪ್ರಾಥಮಿಕ ಶಿಕ್ಷಣ, ದಿಂಡವಾರ ಗ್ರಾಮದಲ್ಲಿ 5ರಿಂದ 7ರವರೆಗೆ, 8 ರಿಂದ 10ನೇ ತರಗತಿ ತಾಯಿಯ ತವರು ಇಂಗಳೇಶ್ವರದಲ್ಲಿ ಮುಗಿಸಿ, ವಿಜಯಪುರದಲ್ಲಿ ಬಿಎಸ್ಸಿ ಪದವಿ, ಇಳಕಲ್ ಎಸ್.ಆರ್.ಕಂಠಿ ಕಾಲೇಜಿನಲ್ಲಿ ಬಿಇಡಿ ಶಿಕ್ಷಣ ಮುಗಿಸಿ, ಆಲಮಟ್ಟಿಯ ಸಂಗಮ ನರ್ಸರಿ ಸ್ಕೂಲ್ನಲ್ಲಿ ಶಿಕ್ಷಕರಾಗಿ ಸೇರಿ, 1994ರಲ್ಲಿ ಸಿಕ್ಯಾಬ್ ಸ್ಕೂಲ್ನಲ್ಲಿ ಶಿಕ್ಷಕರಾಗಿ ಸೇರಿದರು. ಅಲ್ಲಿಯೇ ಶಿವಾನಂದ ಕೆಲೂರರ ಪರಿಚಯವಾಗಿ ಇಬ್ಬರ ಗುರಿಯೂ ಒಂದೇ ಆಗಿದ್ದರಿಂದ 1996ರಲ್ಲಿ ವಿಶ್ವ ಕಲ್ಯಾಣ ಎಜ್ಯುಕೇಷನ್, ಕಲ್ಚರಲ್ ಆ್ಯಂಡ್ ಸೋಷಿಯಲ್ ಅಸೋಸಿಯೇಷನ್ ಹೆಸರಲ್ಲಿ ಟ್ರಸ್ಟ್ ಸ್ಥಾಪಿಸಿ, ಅದರಡಿಯಲ್ಲಿ "ಎಕ್ಸಲೆಂಟ್ ಕೋಚಿಂಗ್ ಕ್ಲಾಸ್'' ಆರಂಭಿಸಿ ವಿಜಯಪುರವಷ್ಟೇ ಅಲ್ಲ ರಾಜ್ಯಾದ್ಯಂತ ಮನೆಮಾತಾದರು.
