ಏಕೀಕರಣದ ರೂವಾರಿಗಳಿಗೇಕಿಲ್ಲ ಸ್ಮಾರಕ?

ವಿಜಯಪುರ ನಗರದ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಮುಖ್ಯ ಕಚೇರಿ.

Published on:

01 Nov 2025, 12:00 pm

ಪ್ರಮುಖ ಮುಖ್ಯಾಂಶಗಳು

ಕನ್ನಡ ಕಟ್ಟಿ ಬೆಳೆಸಿದವರಿಗಿಲ್ಲವೇ ಗೌರವ
ಹಲಸಂಗಿ ಗೆಳೆಯರ ಬಳಗದ ಪ್ರತಿಷ್ಟಾನಕ್ಕೆ ಹಿನ್ನಡೆ
ಸ್ವತಂತ್ರ ಸೌಧ ನಿರ್ಮಾಣಕ್ಕೆ ಬೇಡಿಕೆ

ವಿಜಯಪುರ: ಕನ್ನಡ ರಾಜ್ಯೋತ್ಸವದ ದಿನಾಚರಣೆ ಸಮೀಪಿಸುತ್ತಿದ್ದಂತೆ ಕರ್ನಾಟಕದ ಏಕೀಕರಣದ ರೂವಾರಿಗಳು, ಸಾಹಿತಿಗಳು, ಕಲಾವಿದರು ಸೇರಿದಂತೆ ನಾಡು-ನುಡಿಗೆ ಸಂಬಂಧಿಸಿದ ಅಂಶಗಳ ಚರ್ಚೆಯೇ ಮುನ್ನೆಲೆಗೆ ಬರಲಿದ್ದು, ಆ ಸಾಲಿನಲ್ಲೀಗ ಹಲಸಂಗಿ ಗೆಳೆಯರ ಬಳಗದ ಸ್ಮಾರಕ ನಿರ್ಮಾಣ ಕೂಡ ಸೇರ್ಪಡೆಯಾಗಿದೆ.

ಕರ್ನಾಟಕದ ಗಡಿ ಪ್ರದೇಶದಲ್ಲಿ ಕನ್ನಡದ ಹಣತೆ ನಿರಂತರವಾಗಿ ಬೆಳಗುವಂತೆ ಮಾಡಲು ಅಹರ್ನಿಶಿ ದುಡಿದ ಹಲಸಂಗಿ ಗೆಳೆಯರ ಬಳಗದ ಸ್ಮಾರಕ ನಿರ್ಮಾಣದ ಕನಸು ಮತ್ತೆ ಚಿಗುರೊಡೆದಿದ್ದು, ಕನ್ನಡ ರಾಜ್ಯೋತ್ಸವದ ಸುಸಂದರ್ಭದಲ್ಲಿ ಅದಕ್ಕೊಂದು ಸ್ಪಷ್ಟ ರೂಪುರೇಷೆ ಸಿಗುವುದೇ ಎಂಬ ಆಶಾಭಾವ ಕನ್ನಡಾಭಿಮಾನಿಗಳಲ್ಲಿ ಮನೆ ಮಾಡಿದೆ.

ಕರ್ನಾಟಕದ ಏಕೀಕರಣಕ್ಕೆ ತಮ್ಮದೇಯಾದ ಕೊಡುಗೆ ನೀಡಿದ್ದಲ್ಲದೇ ಮರಾಠಿಮಯವಾಗಿದ್ದ ಗಡಿ ಪ್ರದೇಶದಲ್ಲಿ ಕನ್ನಡದ ದೀಪ ಬೆಳಗಿಸಿದ ಹಲಸಂಗಿ ಗೆಳೆಯರ ಬಳಗದ ಹೆಸರಿನಲ್ಲಿ ಪ್ರತ್ಯೇಕ ಸ್ಮಾರಕ ನಿರ್ಮಿಸಬೇಕೆಂಬ ಬೇಡಿಕೆ ಬಹುದಿನಗಳಿಂದಲೂ ಜೀವಂತವಾಗಿದ್ದು, ಇದೀಗ ಆ ಬೇಡಿಕೆ ಈಡೇರಿಸುವ ನಿಟ್ಟಿನಲ್ಲಿ ಜಿಲ್ಲೆಯ ಜನಪ್ರತಿನಿಧಿಗಳು ಪ್ರಾಮಾಣಿಕ ಪ್ರಯತ್ನ ಮಾಡಬೇಕಿದೆಯಲ್ಲದೇ ದಿನಾಚರಣೆ ಸಂದರ್ಭ ಸ್ಪಷ್ಟ ನಿರ್ಧಾರ, ರೂಪುರೇಷೆ ಹಾಗೂ ಅನುದಾನದ ಭರವಸೆ ಘೋಷಿಸಬೇಕೆಂಬ ಕೂಗು ಬಲಗೊಂಡಿದೆ.

ಗೆಳೆಯರ ಬಳಗದ ವಿಶೇಷತೆ: ಇಂಡಿ ತಾಲೂಕಿನಲ್ಲಿ ಹುಟ್ಟಿ ಕನ್ನಡ ಸಾಹಿತ್ಯ ಲೋಕಕ್ಕೆ ಅಪಾರ ಕೊಡುಗೆ ನೀಡಿದವರು ಹಲಸಂಗಿ ಗೆಳೆಯರ ಬಳಗದ ಸದಸ್ಯರು. ಜಾನಪದ, ನಾಟಕ, ಶಿಶು ಸಾಹಿತ್ಯ, ತತ್ವಶಾಸ್ತ್ರ ಹೀಗೆ ಸಾಹಿತ್ಯದ ಅನೇಕ ಪ್ರಕಾರಗಳಿಗೆ ತಮ್ಮದೇಯಾದ ಕೊಡುಗೆ ನೀಡಿದವರೆಂದರೆ ಡಾ. ಸಿಂಪಿ ಲಿಂಗಣ್ಣ, ಶ್ರೀರಂಗ, ಮಧುರ ಚೆನ್ನರು, ಪಿ. ಧೂಲಾಸಾಹೇಬ, ರೇವಪ್ಪ ಕಾಪ್ಸೆ ಅವರು. ಇನ್ನು ಗುರುದೇವ ರಾನಡೆ ಅವರು ಕೂಡ ತತ್ವಶಾಸ್ತ್ರದ ಮೂಲಕ ಈ ಭಾಗದಲ್ಲಿ ಗಡಿ ಅಭಿವೃದ್ಧಿ, ಕನ್ನಡ ಸಾಹಿತ್ಯದ ಉಳಿವಿಗೆ ಶ್ರಮಿಸಿದ್ದಾರೆ.

ಧಾರವಾಡದ ದ.ರಾ. ಬೇಂದ್ರೆಯವರ ಗೆಳೆಯರ ಬಳಗದ ಗುಂಪಿಗೆ ಸಮನಾಂತರವಾಗಿ ಮಧುರ ಚೆನ್ನರು ಹಲಸಂಗಿ ಗೆಳೆಯರ ಬಳಗ ಸ್ಥಾಪಿಸಿದರು. ಇವರ ಸಹವರ್ತಿಯಾಗಿ ಸಿಂಪಿ ಲಿಂಗಣ್ಣ ಸಹ ಕನ್ನಡ ಸಾಹಿತ್ಯ ಲೋಕ ಶ್ರೀಮಂತಗೊಳಿಸುವ ನಿಟ್ಟಿನಲ್ಲಿ ಶ್ರಮಿಸಿದರು. ಬೀಸುಕಲ್ಲು ಹಾಡು, ಹಂತಿ ಪದಗಳು, ಗೀಗಿ ಪದಗಳು, ಪಾರಿಜಾತದಂಥ ನಾಟಕ ಪ್ರಕಾರಗಳ ಉಳಿವು ಮತ್ತು ಬೆಳವಣಿಗೆಯಲ್ಲಿ ಈ ಗೆಳೆಯರ ಕೊಡುಗೆ ಅನನ್ಯ.

ಪ್ರತಿಷ್ಟಾನ ಸ್ಥಾಪನೆ: ೨೦೧೩ ಜ.೧೦ ರಂದು ಹಲಸಂಗಿ ಗೆಳೆಯರ ಪ್ರತಿಷ್ಟಾನ ಸ್ಥಾಪಿಸಲಾಗಿದೆ. ಆ ಮೂಲಕ ಗೆಳೆಯರ ಬಳಗದ ಸಾಹಿತ್ಯ ಪ್ರಕಟಣೆ, ವಿಚಾರ ಸಂಕಿರಣ, ಪ್ರಶಸ್ತಿ ಪ್ರದಾನ ಮತ್ತಿತರರ ಕಾರ್ಯಕ್ರಮ ರೂಪಿಸಿಕೊಂಡು ಬರಲಾಗುತ್ತಿದೆ. ಪ್ರತಿಷ್ಟಾನಕ್ಕೆ ಜಿಲ್ಲಾಧಿಕಾರಿಯೇ ಅಧ್ಯಕ್ಷರಾಗಿದ್ದು, ೧೦ ಜನ ಸದಸ್ಯರಿದ್ದಾರೆ. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಾಯಕ ನಿರ್ದೇಶಕರು ಸದಸ್ಯ ಕಾರ್ಯದರ್ಶಿಗಳಿದ್ದಾರೆ. ಒಟ್ಟು ೧೨ ಜನರನ್ನೊಳಗೊಂಡ ಆಡಳಿತ ಮಂಡಳಿಯಿದ್ದು, ಸಾಹಿತ್ಯ ಪರ ಚಟುವಟಿಕೆ ಹಮ್ಮಿಕೊಂಡು ಬರಲಾಗುತ್ತಿದೆ.

ಆದರೆ, ಪ್ರತಿಷ್ಟಾನಕ್ಕೆ ತನ್ನದೇ ಆದ ಸ್ವಂತ ಕಟ್ಟಡವಿಲ್ಲದ ಕಾರಣ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಕಚೇರಿಯಲ್ಲಿಯೇ ಒಂದು ಪ್ರತ್ಯೇಕ ಕೊಠಡಿ ತೆರೆಯಲಾಗಿದೆ. ಕೆಲವು ಪುಸ್ತಕಗಳಿರಿಸಿದ್ದು ಬಿಟ್ಟರೆ ಹೇಳಿಕೊಳ್ಳುವಂಥ ವ್ಯವಸ್ಥೆ ಅಲ್ಲಿಲ್ಲ. ಹೀಗಾಗಿ ಸ್ವತಂತ್ರವಾದ ಆಡಳಿತ ಕಚೇರಿ ಒಳಗೊಂಡ ಭವ್ಯ ಸ್ಮಾರಕ ನಿರ್ಮಾಣದ ಅಗತ್ಯವಿದೆ.

ಸ್ಮಾರಕ ನಿರ್ಮಾಣ ಪ್ರಕ್ರಿಯೆ ವಿಳಂಬ: ಮಧುರ ಚೆನ್ನರು ಹಾಗೂ ಸಿಂಪಿ ಲಿಂಗಣ್ಣನವರ ಸಾಹಿತ್ಯಕ್ಕೆ ಸಂಬAಽಸಿದ ಗ್ರಂಥಾಲಯ, ಮಧುರ ಚೆನ್ನರ ಬದುಕಿಗೆ ಸಂಬಂಧಿಸಿದಂತೆ ಒಂದು ಮ್ಯೂಸಿಯಂ, ಸಂಶೋಧನಾ ಗ್ರಂಥಗಳ ಪ್ರದರ್ಶನ, ಗೆಳೆಯರ ಬಳಗದ ಸಾಹಿತ್ಯವನ್ನು ಅನ್ಯ ಭಾಷೆಗೆ ತರ್ಜುಮೆಗೊಳಿಸುವುದು, ವಿಚಾರ, ಜೀವನ ಮತ್ತು ಸಾಹಿತ್ಯಕ್ಕೆ ಸಂಬಂಧಿಸಿದ ಗ್ರಂಥಗಳನ್ನು ಪ್ರಕಟಿಸುವುದು, ವ್ಯಾಸಂಗ ವಿಸ್ತರಣಾ ಶಾಖೆಗಳನ್ನು ವ್ಯವಸ್ಥಿತಗೊಳಿಸುವುದು, ಸಾಹಿತ್ಯ ಅಧ್ಯಯನಕ್ಕಾಗಿ ಕೋರ್ಸ್ಗಳನ್ನು ಆರಂಭಿಸುವುದು, ಗೋಷ್ಠಿಗಳು, ಕವನ ವಾಚನ, ನಾಟಕಗಳ ಪ್ರದರ್ಶನ ಹಾಗೂ ವಿಚಾರ ಸಂಕಿರಣ ನಡೆಸಬೇಕೆಂಬುದು ಪ್ರತಿಷ್ಟಾನದ ಧ್ಯೇಯೋದ್ಧೇಶಗಳು. ಆದರೆ, ಸ್ವತಂತ್ರವಾದ ಆಡಳಿತ ಕಚೇರಿ ಹಾಗೂ ಭವ್ಯ ಸ್ಮಾರಕ ಇಲ್ಲದ ಕಾರಣ ಪ್ರತಿಷ್ಟಾನದ ಎಲ್ಲ ಚಟುವಟಿಕೆಗಳಿಗೆ ಹಿನ್ನಡೆಯಾಗುತ್ತಿದೆ. ಹೀಗಾಗಿ ಭವ್ಯ ಸ್ಮಾರಕ ನಿರ್ಮಿಸಬೇಕೆಂಬುದು ಕನ್ನಡಾಭಿಮಾನಿಗಳ ಆಶಯ.

ಹಲಸಂಗಿ ಗೆಳೆಯರ ಬಳಗದ ಪ್ರತಿಷ್ಟಾನಕ್ಕೆ ಜಿಲ್ಲಾಽಕಾರಿಗಳೇ ಅಧ್ಯಕ್ಷರು. ಹೀಗಾಗಿ ಪ್ರತ್ಯೇಕ ಆಡಳಿತ ಕಚೇರಿ ಸ್ಥಾಪನೆಗೆ ಜಾಗ ಗುರುತಿಸಲು ಹಿಂದಿನ ಜಿಲ್ಲಾಽಕಾರಿಗಳು ವಿಜಯಪುರ ತಹಸೀಲ್ದಾರ್‌ಗೆ ನಿರ್ದೇಶನ ನೀಡಿದ್ದರೆ. ಪತ್ರ ವ್ಯವಹಾರ ಕೂಡ ಆಗಿದೆ. ಒಂದು ಕೋಟಿ ಅನುದಾನ ಕೋರಿ ಪ್ರಸ್ತಾವನೆಯೂ ಸಲ್ಲಿಸಲಾಗಿದೆ. ಗೆಳೆಯರ ಬಳಗದ ಸದಸ್ಯರ ಮೂರ್ತಿ ಪ್ರತಿಷ್ಟಾಪನೆ, ಮೆಮೊರಿಯಲ್ ಹಾಲ್ ‌, ಸಭಾಭವನ ಒಳಗೊಂಡ ಸ್ಮಾರಕ ನಿರ್ಮಿಸಲು ಸಿದ್ಧತೆ ನಡೆದಿದೆ. ಹಲಸಂಗಿಯಲ್ಲಿ ಮಧುರ ಚೆನ್ನರ ಸ್ಮಾರಕ ಅಭಿವೃದ್ಧಿ ಆಗುತ್ತಿದೆ. ಗಡಿ ಅಭಿವೃದ್ಧಿ ಪ್ರಾಽಕಾರದಿಂದ ೧೦ ಲಕ್ಷ ಮಂಜೂರಾಗಿದೆ. ಐದು ಲಕ್ಷ ಮೊದಲ ಕಂತಿನಲ್ಲಿ ಕೊಡಲಾಗಿದೆ.

| ಸಂತೋಷ ಬೋವಿ ಸಹಾಯಕ

ನಿರ್ದೇಶಕರು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ

ವಿಜಯಪುರ