ದೇಶಭಕ್ತರ ಸಂಘ ಕಂಡರೆ ಅಸಹನೀಯವೇಕೆ? ಕಾಂಗ್ರೆಸ್ ವಿರುದ್ಧ ವಿವೇಕಾನಂದ ಡಬ್ಬಿ ತೀವ್ರ ವಾಗ್ದಾಳಿ

‘ದೇಶದಲ್ಲಿ ಎಲ್ಲೇ ಪ್ರಾಕೃತಿಕ ವಿಕೋಪಗಳಾದಾರೂ ಸಂಘ ಪರಿವಾರದ ಕಾರ್ಯಕರ್ತರು ಸ್ವಯಂ ಪ್ರೇರಿತವಾಗಿ ನೆರವಿಗೆ ಬರುತ್ತಾರೆ. ರಾಜ್ಯದ ಹಾಲಿ ಮುಖ್ಯಮಂತ್ರಿಗಳೇ ಸದನದಲ್ಲಿ ನಮಸ್ತೆ ಸದಾ ವಸ್ತಲೇ ಎಂದು ಸಂಘದ ಗೀತೆ ಪಠಿಸುತ್ತಾರೆ. ಬಾಲ್ಯದಲ್ಲಿ ಸಂಘದ ಶಾಖೆಗಳಿಗೆ ತೆರಳಿದ್ದಾಗಿ ಹೇಳಿಕೊಂಡಿದ್ದಾರೆ. ಹೀಗಾಗಿ ಗೃಹ ಸಚಿವರು ತಮ್ಮದೇ ಮುಖ್ಯಮಂತ್ರಿಗಳಿಂದ ಸಂಘದ ಮಹತ್ವ ಅರಿತಗೊಳ್ಳಲಿ ಎಂದು ಶನಿವಾರ ಸುದ್ದಿಗೋಷ್ಠಿಯಲ್ಲಿ ಅವರು ಚಾಟಿ ಬೀಸಿದರು.

ರಾಜ್ಯ ಸರ್ಕಾರ ಕೇವಲ ಆರ್‌ಎಸ್‌ಎಸ್ ಟೀಕಿಸುವುದರಲ್ಲೇ ಕಾಲಹರಣ ಮಾಡುತ್ತಿದೆ. ಅಭಿವೃದ್ಧಿ ಮರೆತಿದೆ. ತನ್ನ ವೈಫಲ್ಯ ಮರೆಮಾಚಲು ಆರ್‌ಎಸ್‌ಎಸ್ ಮುನ್ನೆಲೆಗೆ ತಂದಿದೆ ಎಂದರು.

ದೇಶಭಕ್ತ ಸಂಘಟನೆ ಕಂಡರೆ ಕಾಂಗ್ರೆಸ್ಸಿಗರಿಗೆ ಏಕೆ ಸಹಿಸಲಾಗಲ್ಲ. ಒಳ್ಳೆಯ ಕಾರ್ಯ ಮಾಡಲು ನೋಂದಣಿ ಮಾಡಿಕೊಳ್ಳಬೇಕೆಂದಿಲ್ಲ. ಸಂಘ ತೆರೆದ ಮೈದಾನದಲ್ಲಿ ಇರುವಂಥದ್ದು. ಸಂಘದಲ್ಲಿ ಯಾವುದೇ ರೀತಿಯ ಭೇದ-ಭಾವ ಇಲ್ಲ. ಮಹಾತ್ಮ ಗಾಂಧಿ, ಡಾ.ಬಿ.ಆರ್. ಅಂಬೇಡ್ಕರ್, ಪ್ರಣವ ಮುಖರ್ಜಿ ಅವಂಥವರು ಸಹ ಈ ಸಂಘದ ಚಟುವಟಿಕೆ ಗಮನಿಸಿ ಮೆಚ್ಚುಗೆ ನುಡಿಗಳನ್ನಾಡಿದ ಬಗ್ಗೆ ಚರ್ಚೆಗಳನ್ನು ಕೇಳಿದ್ದೇನೆ ಎಂದರು.

ನರೇಂದ್ರ ಮೋದಿ ನೇತೃತ್ವದ ಸರ್ಕಾರ ಹಿಂದುಳಿದ ವರ್ಗಗಳ ಕಲ್ಯಾಣಕ್ಕಾಗಿ ಸಾಕಷ್ಟು ಶ್ರಮಿಸಿದೆ. 2047 ರ ಭಾರತ ಹೇಗಿರಬೇಕೆಂಬ ವಿಕಸಿತ ಭಾರತ ಪರಿಕಲ್ಪನೆಯೊಂದಿಗೆ ಮೋದಿ ಸರ್ಕಾರ ಕಾರ್ಯ ತತ್ಪರವಾಗಿದೆ. ಶೈಕ್ಷಣಿಕ ಕ್ಷೇತ್ರ, ಕೈಗಾರಿಕೆ, ರೈಲ್ವೆ, ವಿಮಾನ ಯಾನ ಕ್ಷೇತ್ರ ಸೇರಿ ಅನೇಕ ಕ್ಷೇತ್ರಗಳನ್ನು ಅಭಿವೃದ್ಧಿ ಪಡಿಸಲಾಗಿದೆ. ನರೇಂದ್ರ ಮೋದಿ ಅಭಿವೃದ್ಧಿ ಕಾಣಬೇಕಾದರೆ ರಾಷ್ಟ್ರೀಯ ಹೆದ್ದಾರಿ, ವಿಮಾನ ನಿಲ್ದಾಣಗಳನ್ನು ಒಮ್ಮೆ ಕಾಣಿ. ಅದನ್ನು ಬಿಟ್ಟು ವೃಥಾ ಆರೋಪ ನಿಲ್ಲಿಸಿ ಮೋದಿ ಸರ್ಕಾರದ ಸಾಧನೆ ಬಿಚ್ಚಿಡುತ್ತಲೇ ಕಾಂಗ್ರೆಸ್‌ಗೆ ಸವಾಲೆಸೆದರು.

ಮೋದಿ ಸರ್ಕಾರದ ಸಾಧನೆ ಕುರಿತು ಪ್ರಶ್ನಿಸುವವರಿಗೆ ಬಹಿರಂಗವಾಗಿ ಸವಾಲೆಸೆದ ವಿವೇಕಾನಂದ ಡಬ್ಬಿ ಅವರು, ಕಾಂಗ್ರೆಸ್ ಮತ್ತು ಬಿಜೆಪಿಯ ಸಾಧನೆ ಕುರಿತು ಚರ್ಚಿಸಲು ಮಹಾತ್ಮ ಗಾಂಧಿ ಸರ್ಕಲ್‌ಗೆ ಬನ್ನಿ ಎಂದು ಸವಾಲೆಸೆದರು.

ಹಿಂದುಳಿದ ಸಣ್ಣ ಸಮುದಾಯಗಳಿಗೂ ಬಿಜೆಪಿ ಆದ್ಯತೆ ನೀಡಿದೆ. ರಾಜಕೀಯವಾಗಿ ಅನೇಕ ಅವಕಾಶಗಳನ್ನು ನೀಡಿದೆ. ಆದರೆ ಕಾಂಗ್ರೆಸ್ ಈ ಸಮುದಾಯಗಳಿಗೆ ಸಾಕಷ್ಟು ಅನ್ಯಾಯ ಮಾಡಿತು. ಇರುವ ಹಿಂದುಳಿದ ವರ್ಗದ ಮುಖ್ಯಮಂತ್ರಿಯನ್ನೂ ಅಧಿಕಾರದಿಂದ ಕೆಳಗಿಳಿಸಿತು. ಹೀಗಾಗಿ ಹಿಂದುಳಿದ ವರ್ಗಗಳ ಜನ ಬಿಜೆಪಿಯತ್ತ ಮುಖ ಮಾಡುತ್ತಿದ್ದಾರೆ ಎಂದರು.

ಎಸ್‌ಸಿ- ಎಸ್‌ಟಿ ಹಣವನ್ನೂ ಗ್ಯಾರಂಟಿಗೆ ಬಳಸಿ ಆ ಸಮುದಾಯಕ್ಕೆ ಅನ್ಯಾಯ ಮಾಡಿತು. ಆ ಸಮುದಾಯದ ಪ್ರಗತಿಯನ್ನು ಇಪ್ಪತ್ತು ವರ್ಷ ಹಿಂದಕ್ಕೆ ತಳ್ಳಿತು. ಆ ಸಮುದಾಯ ಸಹ ರಾಜಕೀಯವಾಗಿ ಏಳಿಗೆ ಸಾಧಿಸಲಾಗುತ್ತಿಲ್ಲ. ಕೇವಲ ಸಚಿವ ಸ್ಥಾನಕ್ಕೆ ಗುದ್ದಾಡುತ್ತಿದ್ದಾರೆ ವಿನಃ ಸಿಎಂ ರೇಸ್‌ನಲ್ಲಿ ಕಾಣಿಸಿಕೊಳ್ಳುತ್ತಿಲ್ಲ ಎಂದರು.

ಬರುವ ದಿನಗಳಲ್ಲಿ ಜಿಲ್ಲೆಯಲ್ಲಿಯೂ ಹಿಂದುಳಿದ ವರ್ಗದಲ್ಲೇ ಅತೀ ಹಿಂದುಳಿದ ಸಮುದಾಯಗಳ ನಾಯಕರಿಗೆ ವಿಧಾನ ಸಭೆಗೆ ಟಿಕೆಟ್ ನೀಡುವ ನಿಟ್ಟಿನಲ್ಲಿ ಪಕ್ಷದ ವರಿಷ್ಠರಿಗೆ ಒತ್ತಾಯಿಸಲಾಗುವುದೆಂದು ಪ್ರಶ್ನೆಯೊಂದಕ್ಕೆ ಪ್ರತಿಕ್ರಿಯಿಸಿದರು.

ಮುಖಂಡರಾದ ಸಾಬು ಮಾಶಾಳ, ರಾಜು ಬಿರಾದಾರ, ಮಂಜುನಾಥ ಮೀಸೆ, ಈರಣ್ಣ ರಾವೂರ, ರಾಜಕುಮಾರ ಸಗಾಯಿ, ವಿಜಯ ಜೋಷಿ ಇತರರಿದ್ದರು.