‘ಇಂಡಿಗೊ’ ಅವಾಂತರಕ್ಕೆ ಹೊಣೆ ಯಾರು? ಕಬ್ಬು-ಮೆಕ್ಕೆಜೋಳ ಬೆಳೆಗಾರರ ಸಮಸ್ಯೆಗೇನು ಕಾರಣ? ಕೇಂದ್ರದ ವೈಫಲ್ಯ-ರಾಜ್ಯದಿಂದ ನಿರ್ವಹಣೆ, ಬಿಜೆಪಿ ವಿರುದ್ಧ ಸಚಿವ ಎಂ.ಬಿ. ಪಾಟೀಲ ವಾಗ್ದಾಳಿ

ಇಂಡಿಗೊ ವಿಮಾನ ಸಂಚಾರದ ಅವಾಂತರದಿಂದಾಗಿ ಪ್ರಯಾಣಿಕರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಇದಕ್ಕೆ ಕೇಂದ್ರ ಸರ್ಕಾರ ತರಾತುರಿಯಲ್ಲಿ ತೆಗೆದುಕೊಂಡ ನಿರ್ಧಾರ ಹಾಗೂ ಮಾಡಿರುವ ಆದೇಶವೇ ಕಾರಣ. ಪೈಲಟ್‌ಗಳ ಕೆಲಸದ ಅವಧಿ ನಿಗದಿಪಡಿಸಿದ್ದರ ಬಗ್ಗೆ ನಮ್ಮ ಅಭ್ಯಂತರವಿಲ್ಲ. ಆದರೆ, ಎಲ್ಲರನ್ನೂ ವಿಶ್ವಾಸಕ್ಕೆ ತೆಗೆದುಕೊಳ್ಳದೇ ಸುಸೂತ್ರವಾಗಿ ಪರಿಸ್ಥಿತಿ ನಿಭಾಯಿಸದ ಹಿನ್ನೆಲೆ ಜನ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಇದೀಗ ಆದೇಶ ಹಿಂಪಡೆದಿದ್ದೇಕೆ?ಎಂದು ಶನಿವಾರ ಸುದ್ದಿಗಾರರಿಗೆ ಅವರು ಪ್ರತಿಕ್ರಿಯಿಸಿದರು.

ವಿಮಾನ ನಿಲ್ದಾಣಗಳಲ್ಲಿ ಜನ ಕಣ್ಣೀರು ಸುರಿಸುತ್ತಿದ್ದಾರೆ. ಕೆಲವು ನಿಲ್ದಾಣದಲ್ಲೇ ನಿದ್ರೆಗೆ ಜಾರಿದ್ದಾರೆ. ಅಲ್ಲೇ ಊಟ ಮಾಡಿ ಮಲಗುತ್ತಿದ್ದಾರೆ. ಸಂಕಷ್ಟ ನೋಡಲಾಗುತ್ತಿಲ್ಲ. ಇದೇ ಮೋದಿ ತಂದ ಅಚ್ಛೇ ದಿನ್ ಎಂದು ಲೇವಡಿ ಮಾಡಿದರು.

ಇನ್ನು ಕಬ್ಬು ಬೆಳೆಗಾರರ ಸಮಸ್ಯೆ, ಮೆಕ್ಕೆಜೋಳದ ಬೆಲೆ ನಿರ್ಧಾರಗಳೆಲ್ಲವೂ ಕೇಂದ್ರ ಸರ್ಕಾರಕ್ಕೆ ಸಂಬಂಧಿಸಿದ್ದು. ಕಬ್ಬು ಬೆಳೆಗೆ ಸಂಬಂಧಿಸಿದಂತೆ ಎಫ್‌ಆರ್‌ಪಿ ನಿರ್ಧಾರ ಮಾಡಬೇಕಿರುವುದು ಕೇಂದ್ರ ಸರ್ಕಾರ. ಕೇವಲ ಜಾರಿ ಮಾಡುವುದಷ್ಟೇ ರಾಜ್ಯ ಸರ್ಕಾರದ ಪಾತ್ರ. ರಾಜ್ಯದಲ್ಲಿ ಕಬ್ಬು ಬೆಳೆಗಾರರು ಹೋರಾಟ ನಡೆಸಿದಾಗ ಕೇಂದ್ರ ಸರ್ಕಾರ ನೆರವಿಗೆ ಬಂತಾ? ಕೇಂದ್ರ ಸರ್ಕಾರ ಏನು ಕೊಟ್ಟಿದೆ? ಒಂದು ರೂಪಾಯಿ ಸಹ ಕೊಟ್ಟಿಲ್ಲ. ಎಂಎಸ್‌ಪಿ 41 ಮಾಡಬೇಕೆಂದು ಬಿಜೆಪಿಯ ನಾಯಕರೇ ಕೇಂದ್ರ ಸರ್ಕಾರಕ್ಕೆ ಪತ್ರ ಬರೆದಿದ್ದಾರೆ. ಆದರೂ ಕಾರ್ಯಗತಗೊಂಡಿಲ್ಲ. ಶೇ.50ರಷ್ಟು ಇಥೆನಾಲ್ ಖರೀದಿ ಮಾಡುತ್ತಿಲ್ಲ. ಸಿಎಂ ಸಿದ್ದರಾಮಯ್ಯ ಸಹ ಪ್ರಧಾನಿ ಅವರನ್ನು ಭೇಟಿ ಮಾಡಿ ಮನವಿ ಕೊಟ್ಟರು. ಏನಾದರೂ ಪ್ರತಿಕ್ರಿಯೆ ಬಂತಾ? ಮೆಕ್ಕೆಜೋಳ ಬೆಲೆ ಪ್ರತಿ ಟನ್‌ಗೆ 2200ರಿಂದ 2400 ನಿಗದಿ ಮಾಡಿದವರು ಯಾರು? ಕೇಂದ್ರ ಸರ್ಕಾರ ಕೊಡಬೇಕಲ್ಲವಾ? ಕೊಟ್ಟಿಲ್ಲ. ಹೀಗಾಗಿ ಕೇಂದ್ರ ಸರ್ಕಾರದ ಇಂಥ ಅನೇಕ ವೈಫಲ್ಯ ನಾವು ನಿಭಾಯಿಸುವ ಪರಿಸ್ಥಿತಿ ಎದುರಾಗಿದೆ ಎಂದರು.

ಕಬ್ಬು ಬೆಳೆಗಾರರ ಹೋರಾಟ ಸ್ಥಳದಲ್ಲಿ ನಿದ್ದೆ ಮಾಡುವ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಕೇಂದ್ರ ಸರ್ಕಾರಕ್ಕೆ ಒತ್ತಾಯಿಸಿ ನ್ಯಾಯ ಕೊಡಿಸಬೇಕಲ್ಲವೇ? ವಿಜಯಪುರದಲ್ಲಿ ಟ್ರಾೃಕ್ಟರ್ ರ‌್ಯಾಲಿ ಮಾಡುವ ಬಿಜೆಪಿ ನಾಯಕರು ಕೇಂದ್ರ ಸರ್ಕಾರದ ಬಳಿ ಹೋಗಿ ಹೋರಾಟ ನಡೆಸಲು ನೋಡೋಣ ಎಂದು ಹರಿಹಾಯ್ದ ಎಂ.ಬಿ. ಪಾಟೀಲರು, ಇವರಿಗೆಲ್ಲ ನಾಚಿಕೆಯಾಗಬೇಕು ಎಂದರು.

ಬೆಳಗಾವಿಯ ಚಳಿಗಾಲ ಅಧಿವೇಶನದಲ್ಲಿ ಸ್ವಾಭಾವಿಕವಾಗಿ ಉತ್ತರ ಕರ್ನಾಟಕ ಭಾಗದ ಸಮಸ್ಯೆಗಳ ಕುರಿತು ಚರ್ಚಿಸಲಾಗುವುದು. ಈಗಾಗಲೇ ಸಿಎಂ ಹಾಗೂ ಕಾನೂನು ಸಚಿವರು ಉತ್ತರ ಕರ್ನಾಟಕದ ಸಮಸ್ಯೆಗಳ ಬಗ್ಗೆ ಚರ್ಚೆ ಮಾಡಿದ್ದಾರೆ. ಪರಿಹಾರ ಕಲ್ಪಿಸುವ ಕೆಲಸವಾಗಲಿದೆ ಎಂದರು.

ಬಿಜೆಪಿ ಶಾಸಕ ಜನಾರ್ಧನ ರೆಡ್ಡಿ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ ಸಚಿವ ಎಂ.ಬಿ. ಪಾಟೀಲರು, ಜನಾರ್ಧನ ರೆಡ್ಡಿ ಇತಿಹಾಸ ಇಡೀ ಜಗತ್ತಿಗೇ ಗೊತ್ತಿದೆ. ಅವರೊಬ್ಬ ಲೂಟಿಕೋರ, ದರೋಡೆಕೋರ, ಅಂಥವರ ಬಗ್ಗೆ ಮಾತನಾಡಲ್ಲ ಎಂದರು.

ಮುಂದುವರಿದು, ಈ ಬಾರಿ ಚುನಾವಣೆಯಲ್ಲಿ ಜನಾರ್ಧನ ರೆಡ್ಡಿ ಸೋಲುತ್ತಾರೆ. ಓಬಳಪುರಂ ಗಣಿಗಾರಿಕೆಯಲ್ಲಿ ದೇವಸ್ಥಾನವನ್ನೂ ಬಿಡದ ಈತನಿಗೆ ದೇವರ ಶಾಪವಿದೆ. ವಿಜಯಪುರದಲ್ಲಿ ರೈತರ ಸೋಗು ಹಾಕಿ ಟ್ರಾೃಕ್ಟರ್ ರ‌್ಯಾಲಿ ನಡೆಸುವ ಜನಾರ್ಧನ ರೆಡ್ಡಿ ಗಣಿ ಹಗರಣದಲ್ಲಿ ಎಷ್ಟು ರೈತರನ್ನು ಮುಳುಗಿಸಿದ್ದಾನೆ ಪುಣ್ಯಾತ್ಮ ಎಂಬುದು ಜಗತ್ತಿಗೆಲ್ಲ ಗೊತ್ತಿದೆ ಎಂದು ಹರಿಹಾಯ್ದರು.

ಸಚಿವ ಸತೀಶ ಜಾರಕಿಹೊಳಿ ಹಾಗೂ ಡಿಸಿಎಂ ಡಿ.ಕೆ. ಶಿವಕುಮಾರ ಭೇಟಿಯಾದರೆ ತಪ್ಪೇನು? ನಾನು ಸಹ ಡಿಸಿಎಂ ಅವರನ್ನು ಭೇಟಿಯಾಗಿದ್ದೇನೆ? ಹಬ್ಬದ ಉಡುಗೊರೆ ಕೊಟ್ಟಿದ್ದೇನೆ, ಸಿಹಿ ಹಂಚಿದ್ದೇನೆ. ಕಾಂಗ್ರೆಸ್‌ನಲ್ಲಿ ಎಲ್ಲರಿಗೂ ಸಚಿವರಾಗುವ ಅರ್ಹತೆ ಇದೆ. ಅವರವರ ಅನುಯಾಯಿಗಳು ತಮ್ಮ ನಾಯಕ ಸಿಎಂ ಆಗಲಿ ಎಂದು ಬಯಸುವುದು ಸಹಜ. ಅನುಯಾಯಿಗಳ ಘೋಷಣೆಗೆ ಅನ್ಯ ಅರ್ಥ ಕಲ್ಪಿಸಬೇಕಿಲ್ಲ. ಸಿದ್ದರಾಮಯ್ಯ, ಡಿ.ಕೆ. ಶಿವಕುಮಾರ, ಪರಮೇಶ್ವರ ಎಲ್ಲರೂ ನಮ್ಮ ನಾಯಕರೇ. ನಾವೆಲ್ಲ ಒಟ್ಟಾಗಿದ್ದೇವೆ. ಬಿಜೆಪಿಯೇ ಒಡೆದು ಛಿದ್ರವಾಗಿದೆ. ಅಲ್ಲಿ 20 ಬಣಗಳಿವೆ. ಆರ್.ಅಶೋಕ ಅವರ ಬದಲಿಗೆ ಲೂಟಿಕೋರ ಜನಾರ್ಧನ ರೆಡ್ಡಿಯನ್ನು ಪ್ರತಿಪಕ್ಷ ನಾಯಕ ಮಾಡಿ ಸುಮ್ಮನೆ ಎಂದು ಲೇವಡಿ ಮಾಡಿದರು.