ದೇವರಿಗೂ ಕನ್ನಡ ಭಾಷೆ ಕಲಿಸಿದವರು ಬಸವಾದಿ ಶರಣರು; ಡಾ.ಪುರುಷೋತ್ತಮ ಬಿಳಿಮಲೆ

ಇಲ್ಲಿನ ಚಾಣಕ್ಯ ಕಲಾ ಮತ್ತು ವಾಣಿಜ್ಯ ಮಹಾ ವಿದ್ಯಾಲಯದಲ್ಲಿ ಕನ್ನಡ ಅಭಿವೃದ್ಧಿ ಪ್ರಾಧಿಕಾರ, ಕಮಲಾದೇವಿ ಪಾಟೀಲ ಮೆಮೋರಿಯಲ್ ಎಜ್ಯುಕೇಶನಲ್ ಅಸೋಸಿಯೇಶನ್ ಸಹಯೋಗದಲ್ಲಿ ಗುರುವಾರ ಹಮ್ಮಿಕೊಂಡಿದ್ದ ‘ವಿಜಯಪುರ ಜಿಲ್ಲೆ- ನಾಡು ನುಡಿ ಚಿಂತನ’ ಕುರಿತ ರಾಜ್ಯ ಮಟ್ಟದ ವಿಚಾರ ಕಮ್ಮಟ ಉದ್ಘಾಟಿಸಿ ಅವರು ಮಾತನಾಡಿದರು.

ರಾಮಾಯಣ, ಮಹಾಭಾರತ ನಮ್ಮ ಸಂಸ್ಕೃತಿಯ ಅದ್ಭುತ ಪರಂಪರೆಯ ಉದಾಹರಣೆಗಳು. ರಾಮಾಯಣ, ಮಹಾಭಾರತದ ಕರ್ತೃಗಳಿಗೆ ಅಸಮಾನತೆಯ ಗುಣ ಇರಲಿಲ್ಲ, ಆದರೆ ಪರಂಪರೆಯ ಉತ್ತರಾಧಿಕಾರಿಗಳು ಏಕಲವ್ಯನ ಬೆರಳಿನ ಬಳವಳಿ ಎಂಬಿತ್ಯಾದಿ ವಿಷಯಗಳನ್ನು ಸೇರ್ಪಡೆ ಮಾಡಿ ದಿಕ್ಕು ತಪ್ಪಿಸುವ ಕೆಲಸ ಮಾಡುತ್ತಿರುವುದು ನೋವಿನ ಸಂಗತಿ ಎಂದು ಡಾ.ಪುರಷೋತ್ತಮ ಬಿಳಿಮಲೆ ವಿಶ್ಲೇಷಿಸಿದರು.

ಮಹಾಭಾರತವನ್ನು ವ್ಯಾಸರು ಅದ್ಭುತವಾಗಿ ಬರೆದಿದ್ದಾರೆ, ಅವರಿಗೆ ಅಸಮಾನತೆಯ ವಿಚಾರ ಇರಲಿಲ್ಲ, ಯುದ್ಧ ವೇಳೆ 18 ಅಕ್ಷೋಹಿಣಿ ಸೈನ್ಯ ನಾಶವಾಗುವ ಸಂದರ್ಭ ನಿರೂಪಿಸುವಾಗ ‘ಬರೆಯುವುದನ್ನೇ ನಿಲ್ಲಿಸಿದೆ...’ ಎಂದು ಭಾವುಕವಾಗಿ ಹೇಳಿದ್ದಾರೆ. ಏಕಲವ್ಯನ ಬೆರಳು ಬೇಡುವ ಪ್ರಸಂಗ ಮೂಲ ಮಹಾಭಾರತದಲ್ಲಿ ಇಲ್ಲ, ಶಂಭುಕನ ತಲೆ ಕತ್ತರಿಸುವ ಹೀಗೆ ಅನೇಕ ವಿಷಯಗಳನ್ನು ಕಾಲಾನಂತರದಲ್ಲಿ ಸೇರ್ಪಡೆ ಮಾಡಲಾಗಿದೆ, ‘ವಾಟ್ಸಪ್ ಯೂನಿವರ್ಸಿಟಿ’ಯಲ್ಲಿ ಓದುವುದನ್ನು ಬಿಟ್ಟು ಸ್ವತ: ಗ್ರಂಥಾಲಯಕ್ಕೆ ಹೋಗಿ ಓದಿ ಎಂದರು.

ರಾಮಾಯಣ ಒಂದು ಅದ್ಭುತ ಹಾಗೂ ವಿಶಿಷ್ಟಪೂರ್ಣ ಮಹಾಕಾವ್ಯ, ಅಲ್ಲಿ ರಾಮನೇ ಕಥಾನಾಯಕ, ಆತನೇ ಪ್ರಥಮ ಶ್ರೋತೃ, ಈ ರೀತಿಯ ಅದ್ಭುತ ಸಾಹಿತ್ಯ ನಮ್ಮ ನೆಲದ್ದು ಎಂಬ ಹೆಮ್ಮೆ ಇದೆ ಎಂದರು.

ಭಾರತೀಯ ಪ್ರಾದೇಶಿಕ ಭಾಷೆಗಳ ಪೈಕಿ ಕನ್ನಡ ಭಾಷೆಯ ಬೆಳವಣಿಗೆ ಕುಂಠಿತಗೊಳ್ಳುತ್ತಿದ್ದು, ನಮ್ಮ ಭಾಷೆ ಪತನವಾಗದಂತೆ ಎಚ್ಚರ ವಹಿಸಬೇಕು ಎಂದ ಡಾ. ಡಾ.ಪುರುಷೋತ್ತಮ ಬಿಳಿಮಲೆ ಅವರು, ಭಾರತೀಯ ಪ್ರಾದೇಶಿಕ ಭಾಷೆಗಳ ಬೆಳವಣಿಗೆ ವೇಗ ಪ್ರಸಕ್ತ ಶೇ.11ರಿಂದ 12ರಷ್ಟಿದೆ. ಆದರೆ, ಕನ್ನಡ ಭಾಷೆಯ ಬೆಳವಣಿಗೆ ವೇಗ ಶೇ.3.76 ರಷ್ಟಿದೆ. ಕನ್ನಡಿಗರು ಇತರೆ ಭಾಷೆಗಳ ಬಗ್ಗೆ ಗೌರವ ಇಟ್ಟುಕೊಳ್ಳಬೇಕು. ಆದರೆ, ನಮ್ಮ ಭಾಷೆ ಪಥನವಾಗದಂತೆ ಎಚ್ಚರ ವಹಿಸಬೇಕೆಂದರು.

ಶಾಲೆಗಳಲ್ಲಿ ಕನ್ನಡ ನೆಲೆ ತಪ್ಪಿದೆ. ಮುಂದಿನ 10 ವರ್ಷಗಳಲ್ಲಿ ಕನ್ನಡ ತೀವ್ರ ಹಿನ್ನಡೆ ಸಾಧಿಸಲಿದೆ. ಕನ್ನಡದಲ್ಲೇ ಪರಿಪಕ್ವವಾದ ಪದಗಳು ಇರುವಾಗ ಬೇರೆ ಭಾಷೆಯ ಪದಗಳನ್ನು ಬಳಸುವುದು ಯೋಗ್ಯವಲ್ಲ. ರಾಜ್ಯದಲ್ಲಿ ಹೋಟೆಲ್ ಉದ್ಯಮ ಬಹುತೇಕ ಕನ್ನಡೇತರರ ಪಾಲಾಗಿದೆ. ಬಹುಪಾಲು ಕೈಗಾರಿಕೋದ್ಯಮಗಳಲ್ಲಿ ಅನ್ಯ ರಾಜ್ಯಗಳ ಹೊರಗುತ್ತಿಗೆದಾರರು ಹೆಚ್ಚಾಗಿದ್ದಾರೆ. ಇದರಿಂದ ಕನ್ನಡಿಗರ ಉದ್ಯೋಗಕ್ಕೆ ಕುತ್ತಾಗಿದೆ ಎಂದು ಬೇಸರ ವ್ಯಕ್ತಪಡಿಸಿದರು.

ಬೆಂಗಳೂರಿನ ನೇಗಿಲಯೋಗಿ ಟ್ರಸ್ಟ್ ಅಧ್ಯಕ್ಷ ಡಾ.ಎಚ್.ಆರ್. ಸ್ವಾಮಿ ಮಾತನಾಡಿ, ದೇಶದಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಏನನ್ನೂ ಪ್ರಶ್ನಿಸುವ ಪರಿಸ್ಥಿತಿ ಇಲ್ಲವಾಗಿದೆ. ಪ್ರಶ್ನಿಸಿದರೆ ಬದುಕಲು ಸಾಧ್ಯವಿಲ್ಲದಂತಾಗಿದೆ ಎಂದು ಬೇಸರ ವ್ಯಕ್ತಪಡಿಸಿದರು.

ಆದಿಲ್ ಶಾಹಿ ಸಾಹಿತ್ಯ - ಕನ್ನಡ ಅನುವಾದಗಳು ವಿಷಯವಾಗಿ ವಿಶೇಷ ಉಪನ್ಯಾಸ ನೀಡಿದ ಕಲಬುರಗಿ ಸಾರಿಗೆ ಇಲಾಖೆಯ ವಿಶ್ರಾಂತ ಅಧೀಕ್ಷಕ ರಿಯಾಜ್ ಅಹ್ಮದ್ ಬೋಡೆ, ‘ವಿಜಯಪುರ ಆದಿಲ್‌ಶಾಹಿಗಳು ಸಾಹಿತ್ಯ, ಸಂಗೀತ, ಕಲೆಗಳಿಗೆ, ಹಲವು ಭಾಷೆ, ಧರ್ಮ, ಸಂಸ್ಕೃತಿಗೆ ರಾಜಾಶ್ರಯ ನೀಡಿದ್ದರು. ಸ್ವತಃ ರಾಜ, ರಾಣಿಯರೇ ಸಾಹಿತ್ಯ ರಚಿಸಿದ್ದಾರೆ’ ಎಂದು ಹೇಳಿದರು.

ಆದಿಲ್‌ಶಾಹಿಗಳು ವಿಜಯಪುರದಲ್ಲಿ 197 ವರ್ಷ ಆಡಳಿತ ನಡೆಸಿದರೂ ಒಂದೇ ಒಂದು ಹಿಂದು-ಮುಸ್ಲಿಂ ಗಲಾಟೆಗಳು ನಡೆದಿಲ್ಲ. 350 ಪರ್ಷಿಯನ್, ದಖ್ಖನಿ ಹಸ್ತಪ್ರತಿಗಳು ಸಿಕ್ಕಿವೆ. 300 ಪುಸ್ತಕಗಳನ್ನು ಸೂಫಿಗಳು ರಚಿಸಿದ್ದಾರೆ. ಪ್ರತಿ ಗ್ರಂಥಗಳ ಹೆಸರುಗಳು ಸೌಹಾರ್ದತೆಗೆ ಪ್ರತೀಕವಾಗಿದ್ದವು ಎಂದರು.

ಚಾಣಕ್ಯ ಕರಿಯರ್ ಅಕಾಡೆಮಿ ಸಂಸ್ಥಾಪಕ ಎಂ.ಎನ್.ಬಿರಾದಾರ ಮಾತನಾಡಿ,ಕೇಂದ್ರ ಸರ್ಕಾರದ ನೇಮಕಾತಿಯಲ್ಲಿ ಕನ್ನಡಿಗರಿಗೆ ತೀವ್ರ ಅನ್ಯಾಯವಾಗುತ್ತಿದ್ದು, ಯುಪಿಎಸ್‌ಸಿ ಸೇರಿದಂತೆ ಎಲ್ಲ ಸ್ಪರ್ಧಾತ್ಮಕ ಪರೀಕ್ಷೆಗಳನ್ನು ಕನ್ನಡದಲ್ಲಿ ನಡೆಸುವಂತೆ ಕ್ರಮಕೈಗೊಳ್ಳಬೇಕು ಎಂದರು.

ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ನಾಮ ನಿರ್ದೇಶಿತ ಸದಸ್ಯೆ ದಾಕ್ಷಾಯಿಣಿ ಹುಡೇದ, ಬನಶ್ರೀ ಹತ್ತಿ, ಡಾ.ಮದಗೊಂಡ ಬಿರಾದಾರ, ಪ್ರೊ.ವಿ.ಎಂ. ಸುರಪುರ, ಡಾ.ಎಂ.ಎಂ ಪಡಶೆಟ್ಟಿ, ದಾಕ್ಷಾಯಿಣಿ ಬಿರಾದಾರ, ರೇಣುಕಾ ವೈ. ಕೊಣ್ಣೂರ, ಡಾ.ಎಸ್.ಟಿ. ಮೇರವಾಡೆ ಮತ್ತಿತರರಿದ್ದರು.