ರಾಷ್ಟ್ರಕ್ಕಾಗಿ ಜಾತಿ-ಪ್ರಾದೇಶಿಕ ಭಿನ್ನತೆ ಬದಿಗೊತ್ತಿ, ಹಿಂದೂ ಸಮಾವೇಶದಲ್ಲಿ ಚಕ್ರವರ್ತಿ ಸೂಲಿಬೆಲೆ ಅಮೋಘ ಭಾಷಣ

ನಗರದ ಸುಭಾಷಚಂದ್ರ ಬೋಸ್ ವೃತ್ತದಲ್ಲಿರುವ ಸಾಯಿಗಾರ್ಡನ್‌ನಲ್ಲಿ ಹಿಂದೂ ಸಮ್ಮೇಳನ ಸಂಚಲನಾ ಸಮಿತಿಯಿಂದ ಗುರುವಾರ ಸಂಜೆ ಆಯೋಜಿಸಿದ್ದ ಬೃಹತ್ ಹಿಂದೂ ಸಮಾವೇಶವನ್ನುದ್ದೇಶಿಸಿ ಮಾತನಾಡಿದ ಅವರು, ಭಾರತದಲ್ಲಿ ಮದುವೆ ಮತ್ತು ರಾಜಕಾರಣದಲ್ಲಿ ಜಾತಿ ವಿಚಾರಗಳು ಉದ್ಭವಿಸುತ್ತಿವೆಯಾದರೂ ಅಸಲಿಗೆ ಹಿಂದೂಗಳೆಲ್ಲರೂ ಒಗ್ಗಟ್ಟಾಗಿದ್ದಾರೆ. ಈ ಒಗ್ಗಟ್ಟಿನ ಫಲವೇ ಇಂದು ಭಾರತದ ಚಿತ್ರಣ ಬದಲಾಗಿದೆ ಎಂದರು.

ಹಿಂದೂಗಳು ಒಗ್ಗಟ್ಟಾಗಿದ್ದರಿಂದಲೇ ರಾಮಮಂದಿರದ ನಿರ್ಮಾಣ ಸಾಧ್ಯವಾಯಿತು. ಕಾಶಿ-ಮಥುರಾ ಕೂಡಾ ಪುನರುಜ್ಜೀವನಗೊಳ್ಳುವ ದಿನಗಳು ದೂರವಿಲ್ಲ. ಕಾಶಿಯಲ್ಲಿ ಈಗಿರುವ ವಿಗ್ರಹ ಮೂಲ ವಿಗ್ರಹವಲ್ಲ. ಅಹಲ್ಯಾಬಾಯಿ ಹೋಳ್ಕರ್ ಅವರು ಮುಸ್ಲಿಂ ದಾಳಿ ಸಂದರ್ಭ ಪ್ರತ್ಯೇಕವಾಗಿ ನಿರ್ಮಿಸಿದ ವಿಗ್ರಹ. ಈಗಲೂ ನಂದಿ ಮೂಲ ವಿಗ್ರಹದೆಡೆಗೆ ನೋಡುತ್ತಲೇ ಇದ್ದಾನೆ. ಹೀಗಾಗಿ ಕಾಶಿ ಕೂಡ ಮೂಲ ಸ್ವರೂಪ ಪಡೆಯುವ ದಿನಗಳು ಬರಲಿವೆ ಎಂದರು.

ದೇವಸ್ಥಾನಗಳು ಸರ್ಕಾರದ ನಿಯಂತ್ರಣದಲ್ಲಿವೆ. ತಿರುಪತಿ ತಿಮ್ಮಪ್ಪಗೆ ಲಡ್ಡು ಮಾಡಿಸಿ ಎಂದರೆ ಪ್ರಾಣಿಗಳ ಕೊಬ್ಬು ಹಾಕಿದ ತುಪ್ಪದಿಂದ ಲಡ್ಡು ಮಾಡಿಸುತ್ತಾರೆ. ಚಿನ್ನದ ಮೇಲ್ಪದರು ಕರಗಿಸಿ ಲೂಟಿ ಮಾಡುತ್ತಾರೆ. ನಮ್ಮ ದೇವಸ್ಥಾನಗಳ ರಕ್ಷಣೆಗೆ ಬಲವಾಗಿ ನಿಂತರೆ ಎಲ್ಲವೂ ಸಾಧ್ಯ. ಭೇದ ಮರೆತು ಒಟ್ಟಾದರೆ ಭಾರತ ಹಿಂದೂ ರಾಷ್ಟ್ರವಾಗುವ ದಿನಗಳು ದೂರವಿಲ್ಲ. ಒಗ್ಗಟ್ಟು ಕೇವಲ ವೇದಿಕೆ ಹಂಚಿಕೊಂಡರೆ ಬರಲ್ಲ. ಹೃದಯದಿಂದ ಒಟ್ಟಾಗಬೇಕು. ನಮ್ಮೆಲ್ಲರ ನಡುವಿನ ಭೇದ ಕಿತ್ತು ಹಾಕಿ ನಾವೆಲ್ಲ ಹಿಂದೂ ಆಗಬೇಕು ಎಂದು ಸೂಲಿಬೆಲೆ ಮಾರ್ಮಿಕವಾಗಿ ನುಡಿದರು.

‘ದ ಸ್ಟೋರಿ ಆಫ್ ಸಿವಿಲೈಜೇಶನ್’ ಗ್ರಂಥದಲ್ಲಿ ಭಾರತದ ಮೇಲೆ ಮುಸ್ಲಿಂರು ನಡೆಸಿದ ಆಕ್ರಮಣಕ್ಕಿಂತ ಕರಾಳ ಇತಿಹಾಸ ಬೇರೊಂದಿಲ್ಲವೆಂದು ಉಲ್ಲೇಖಿಸಲಾಗಿದೆ. ನಲಂದ ವಿಶ್ವ ವಿದ್ಯಾಲಯದ ಮೇಲೆ ಆಕ್ರಮಣ ಮಾಡಿದ ಖಿಲ್ಜಿ ಗ್ರಂಥಾಲಯ ಸುಟ್ಟು ಹಾಕಿದ. ಮಹ್ಮದ್ ಘಜ್ನಿ, ಘೋರಿ ಆಕ್ರಮಣ ಮಾಡಿ ದೇಶವನ್ನೇ ಕೊಳ್ಳೆ ಹೊಡೆದರು. ಹಿಂದೂ ಹೆಣ್ಣುಮಕ್ಕಳನ್ನು ಅಪಹರಿಸಿದರು. ಅರಬ್ಬರಿಗೆ ಮಾರಾಟ ಮಾಡಿದರು. ರಾಣಿ ಪದ್ಮಿನಿ ತನ್ನ ಪಾವಿತ್ರೃತೆ ಉಳಿಸಿಕೊಳ್ಳಲು ಚಿತೆಗೆ ಹಾರಿದಳು. ಸ್ತ್ರೀಯರನ್ನು ದೇವರೆಂದು ಕಾಣುವ ಧರ್ಮ ಹಿಂದೂ ಎಂದರು.

ಹಿಂದು ಧರ್ಮ ಜಗತ್ತಿಗೆ ಉಪನಿಷತ್ ಕೊಟ್ಟಿತು. ಜಗತ್ತಿನ ಶ್ರೇಷ್ಟ ಜ್ಞಾನಿಗಳು ಭಾರತದ ಉಪನಿಷತ್‌ಗೆ ಮಾರು ಹೋದರು. ಯಾವುದಾದರೂ ಉಪನಿಷತ್ ಬೇರೊಬ್ಬರನ್ನು ಕೊಲ್ಲಿ ಎಂದು ಹೇಳಿದೆಯಾ? ಕೆಲವು ಮತಗಳು ಯಾರು ತನ್ನ ದೇವರನ್ನು ಒಪ್ಪುವುದಿಲ್ಲವೋ ಅವರ ತಲೆ ಕತ್ತರಿಸಿ ಹಾಕಿ ಎನ್ನುತ್ತವೆ. ಆದರೆ, ಹಿಂದೂ ಧರ್ಮ ಮಾತ್ರ ಸ್ತ್ರೀಯರನ್ನು, ಗೋವು, ನದಿಗಳನ್ನು ಸಹ ತಾಯಿ ಎಂದು ಮತ್ತು ದೇವರೆಂದು ಪೂಜಿಸುತ್ತದೆ.

ವಿಶ್ವಾಮಿತ್ರ, ಅತ್ರಿ, ಭರದ್ವಾಜ, ಕಬೀರ, ಬಸವ, ಅಲ್ಲಮನಂಥ ಅನೇಕ ಮಹಾತ್ಮರನ್ನು ಭಾರತ ಕೊಟ್ಟಿತು. ಜಗತ್ತಿಗೆ ಗಣಿತ, ವಿಜ್ಞಾನ ಕೊಟ್ಟಿದ್ದು ಭಾರತ. ಜಗತ್ತಿನಲ್ಲಿ ರಷ್ಯಾ-ಅಮೇರಿಕದಂಥ ಕ್ರಿಶ್ಚಿಯನ್ ರಾಷ್ಟ್ರಗಳು, ಇರಾನ್-ಇರಾಕ್‌ನಂಥ ಮುಸ್ಲಿಂ ರಾಷ್ಟ್ರಗಳು ಕಿತ್ತಾಡುತ್ತವೆ. ಆದರೆ, ಭಾರತದಲ್ಲಿ ಜಾತಿಗಳಿದ್ದರೂ ಎಲ್ಲ ಹಿಂದೂಗಳು ಒಗ್ಗಟ್ಟಾಗಿದ್ದೇವೆ ಎಂದರು.

ಇರಾನ್ ಕಂಡರೆ ಸೌದಿಗೆ ಆಗಲ್ಲ, ಸೌದಿ ಸಿರಿಯಾ ಕಂಡರೆ ಆಗಲ್ಲ, ಪಾಕಿಸ್ತಾನ ಪ್ಯಾಲಿಸ್ತಾನ್ ಮೇಲೆ ಯುದ್ದಕ್ಕೆ ಸಿದ್ಧವಾಗುತ್ತದೆ. ಆದರೆ, ಹಿಂದುಗಳು ಮಾತ್ರ ಒಗ್ಗಟ್ಟಾಗಿರುತ್ತಾರೆ. ಅಂತೆಯೇ ಇಂದು ಭಾರತ ಜಗತ್ತಿನ ನಾಲ್ಕನೇ ಶ್ರೀಮಂತ ರಾಷ್ಟ್ರವಾಗಿ ಹೊರಹೊಮ್ಮಿದೆ. ಹುಚ್ಚು ದೊರೆ ಟ್ರಂಪ್ ಸಹಿತ ಏಕಾಏಕಿ ಶೇ.18ಕ್ಕೆ ತೆರಿಗೆ ಇಳಿಸುತ್ತಾನೆಂದರೆ ಭಾರತದ ಶಕ್ತಿ ಹೇಗಿರಬೇಡ? ಭಾರತದಲ್ಲಿ ತರಕಾರಿ ಮಾರುವ ಪ್ರತಿಯೊಬ್ಬ ಹೆಣ್ಣುಮಗಳು ಸಹ ಯುಪಿಐ ಕಾರ್ಡ್ ಇರಿಸಿಕೊಂಡಿದ್ದಾಳೆ. ಭಾರತದ ಸೈನ್ಯ ಬಲಿಷ್ಠವಾಗಿದೆ. 1971ರಲ್ಲಿ ಪಾಕಿಸ್ತಾನ ಮಣಿಸಲು 14 ದಿನ ಬೇಕಾಯಿತು. ಆದರೆ, ಈಗ ಪಾಕಿಸ್ತಾನದೊಂದಿಗೆ ನಾಲ್ಕೇ ದಿನದಲ್ಲಿ ಯುದ್ದ ಮುಗಿಸಲಾಯಿತು. ಬ್ರಹ್ಮೋಸ್‌ನಂಥ ಕ್ಷಿಪಣಿಗಳು ಇಂದು ಭಾರತದ ಶಕ್ತಿ ಹೆಚ್ಚಿಸಿದ್ದು, ಕೇಲವೇ ದಿನಗಳಲ್ಲಿ ಭಾರತ ಜಗತ್ತಿನ 3ನೇ ಶ್ರೀಮಂತರ ರಾಷ್ಟ್ರ ಎನ್ನಿಸಿಕೊಳ್ಳಲಿದೆ ಎಂದರು.

ಸಂಚಲನಾ ಸಮಿತಿ ಅಧ್ಯಕ್ಷ ಶಂಕರ ಬನ್ನೂರ, ಸುನಿತಾ ಪಾಟೀಲ, ವಿಜಯ ಎಸ್. ಚವಾಣ್ ಮತ್ತಿತರರಿದ್ದರು.

ಸಮಾವೇಶಕ್ಕೂ ಮುನ್ನ ನಗರದ ವಿವಿಧ ಭಾಗಗಳಲ್ಲಿ ಬೃಹತ್ ಮೆರವಣಿಗೆ ನಡೆಯಿತು.