ಪ್ರಧಾನಿ ಮೋದಿ ದೇಶ ಕಂಡ ಅಪೂರ್ವ ನಾಯಕ, ಸಂಸದ ರಮೇಶ ಜಿಗಜಿಣಗಿ ಬಣ್ಣನೆ

ನಗರದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ 76ನೇ ಜನ್ಮ ದಿನೋತ್ಸವದ ಹಿನ್ನೆಲೆ ಬಿಜೆಪಿಯಿಂದ ಶುಕ್ರವಾರ ಸಂಜೆ ಹಮ್ಮಿಕೊಂಡಿದ್ದ 5001 ಭವ್ಯ ದೀಪೋತ್ಸವಕ್ಕೆ ಚಾಲನೆ ನೀಡಿ ಅವರು ಮಾತನಾಡಿದರು.

‘ನರೇಂದ್ರ ಮೋದಿ ಅವರು ರಾಜಕಾರಣಕ್ಕೆ ಆಗಮಿಸದೇ ಹೋಗಿದ್ದರೆ ಈ ದೇಶದಲ್ಲಿ ಐತಿಹಾಸಿಕ ಸಾಧನೆಗಳು ಅಸಾಧ್ಯವಾಗುತ್ತಿದ್ದವು. ಸ್ವಾತಂತ್ರಾೃ ನಂತರದ ಮರೀಚಿಕೆಯಾಗಿದ್ದ ಮಹತ್ತರ ಬೇಡಿಕೆಗಳೆಲ್ಲವೂ ಕೈಗೂಡುತ್ತಲೇ ಇರಲಿಲ್ಲ. ಅವರ ಆಗಮನ ಭಾರತದ ದಿಕ್ಕನ್ನೇ ಬದಲಿಸಿದೆ. ವಿಶ್ವ ಗುರು ಎಂಬ ಉಪಮೇಯ ಹೊತ್ತಿದೆ. ಪ್ರಪಂಚದ ಬಲಾಢ್ಯ ರಾಷ್ಟ್ರಗಳ ಪಟ್ಟಿಗೆ ಸೇರ್ಪಡೆಯಾಗಿದೆ. ಅಂಥ ಮಹಾ ಚೇತನದ ಅಧಿಕಾರವಧಿಯಲ್ಲಿ ಸಂಸದನಾಗಿರುವುದು ನಿಜಕ್ಕೂ ನನ್ನ ಸೌಭಾಗ್ಯ’ ಎಂದರು.

‘ಪ್ರಾಮಾಣಿಕತೆ ಹಾಗೂ ಜನಪರ ಕಾಳಜಿ ಮೂಲಕ ಎಲ್ಲರ ಮನ ಗೆದ್ದ ನಾಯಕ ಮೋದಿ. ದೇಶದ ಪ್ರಗತಿಗೆ ಹಗಲಿರುಳು ಶ್ರಮಿಸುತ್ತಿರುವ ಮೋದಿಗೆ ಮೋದಿಯೇ ಸಾಟಿ. ಸದಾ ದೇಶದ ಹಿತದ ಬಗ್ಗೆ ಯೋಚಿಸುವ ನರೇಂದ್ರ ಮೋದಿ ಅವರ ದೇಶಾಭಿಮಾನ, ದೇಶದ ಪ್ರಗತಿಯ ಬಗ್ಗೆ ಕಾಳಜಿ ಎಲ್ಲರಿಗೂ ಮಾದರಿ ಮತ್ತು ಪ್ರೇರಣೆ’ ಎಂದರು.

ಮಾಜಿ ಸಚಿವ ಅಪ್ಪಾಸಾಹೇಬ ಪಟ್ಟಣಶೆಟ್ಟಿ ಮಾತನಾಡಿ, ‘ದೇಶದ ಪ್ರಗತಿಯನ್ನೇ ಉಸಿರಾಗಿಸಿಕೊಂಡಿರುವ ಪ್ರಧಾನಿ ಮೋದಿ ಅವರ ಬದ್ಧತೆ ಪ್ರತಿಯೊಬ್ಬ ಯುವಕರಿಗೆ ಸ್ಪೂರ್ತಿ’ ಎಂದರು.

ಬಿಜೆಪಿ ಜಿಲ್ಲಾಧ್ಯಕ್ಷ ಗುರುಲಿಂಗಪ್ಪ ಅಂಗಡಿ, ವಿಧಾನ ಪರಿಷತ್ ಮಾಜಿ ಸದಸ್ಯ ಅರುಣ ಶಹಾಪೂರ, ಬಿಜೆಪಿ ನಗರ ಮಂಡಳ ಅಧ್ಯಕ್ಷ ಸಂದೀಪ ಪಾಟೀಲ, ಡಾ.ಸುರೇಶ ಬಿರಾದಾರ, ಉಮೇಶ ಕಾರಜೋಳ, ಕೃಷ್ಣ ಗುನ್ನಾಳಕರ, ರಮೇಶ ಬಿದನೂರ, ರವಿಕಾಂತ ಬಗಲಿ, ನಗರಸಭೆ ಮಾಜಿ ಅಧ್ಯಕ್ಷ ಪರಶುರಾಮ ಸಿಂಗ್ ರಜಪೂತ, ಭೀಮಾಶಂಕರ ಹದನೂರ, ರಾಘವ ಅಣ್ಣಿಗೇರಿ, ಪಾಪು ಸಿಂಗ್ ರಜಪೂತ , ಚಿನ್ನು ಚಿನಗುಂಡಿ, ಭರತ್ ಕೋಳಿ, ಕಾಂತು ಶಿಂಧೆ ಇತರರಿದ್ದರು.

ನಗರದ ಬೊಂಬಳ ಅಗಸಿ, ಸಾಯಿನಾಥ ನಗರ, ಎಪಿಎಂಸಿ ಕೋಟೆಗೋಡೆ ಹತ್ತಿರ, ಇಂಡಿ ರಸ್ತೆ, ಗಜಾನನ ಉತ್ಸವ ಮಹಮಂಡಲ ಶಿವಾಜಿ ಸರ್ಕಲ್, ಶ್ರೀ ಸಿದ್ದೇಶ್ವರ ಗಜಾನನ ಮಂಡಳ, ಗೋಡಬೋಳೆ ಮಾಳಾ ಮತ್ತಿತರ ಕಡೆ ದೀಪೋತ್ಸವ ನಡೆಯಿತು.