ಹಳ್ಳ ಹಿಡಿದ ‘ಪಿಎಂಜಿಎಸ್‌ವೈ’ ರಸ್ತೆ, ಮಸಳಿಯಿಂದ ತಾಂಬಾವರೆಗೂ ಗುಂಡಿಗಳದ್ದೇ ದರ್ಬಾರ್

ಇಂಡಿ ತಾಲೂಕಿನ ಹಿರೇಮಸಳಿಯಿಂದ ತಾಂಬಾಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆಯ ದುಃಸ್ಥಿತಿ.

Published on:

03 Sep 2026, 12:34 pm

ಪ್ರಮುಖ ಮುಖ್ಯಾಂಶಗಳು

ಗುತ್ತಿಗೆದಾರನ ನಿರ್ಲಕ್ಷೃಕ್ಕೆ ಜನ ಹೈರಾಣ
ನಿರ್ವಹಣೆ ಕೊರತೆ
ಕಿತ್ತು ಹೋದ ಡಾಂಬರು

ವಿಜಯಪುರ: ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷಿ ‘ಪ್ರಧಾನ ಮಂತ್ರಿ ಗ್ರಾಮೀಣ ಸಡಕ್ ಯೋಜನೆ’ಯಡಿ ರಸ್ತೆಯೊಂದು ಸಂಪೂರ್ಣ ಹಾಳಾಗಿದ್ದರೂ ಈವರೆಗೂ ಕಠಿಣ ಕ್ರಮವಾಗಿಲ್ಲ.

ಇಂಡಿ ತಾಲೂಕಿನ ಹಿರೇಮಸಳಿಯಿಂದ ತಾಂಬಾಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆಯೊಂದು ಹಾಳಾಗಿ ಹಲವು ತಿಂಗಳುಗಳೇ ಗತಿಸಿದರೂ ಈವರೆಗೂ ನಿರ್ವಹಣೆ ಭಾಗ್ಯ ಕಂಡಿಲ್ಲ. ಗುತ್ತಿಗೆದಾರನ ನಿರ್ಲಕ್ಷೃವೋ...ಅಧಿಕಾರಿಗಳ ಬೇಜವಾಬ್ದಾರಿಯಿಂದಾಗಿಯೋ ರಸ್ತೆ ದುರಸ್ಥಿಗೊಳ್ಳದ ಕಾರಣ ಜನ ನಿತ್ಯ ನರಕಯಾತನೆ ಅನುಭವಿಸುವಂತಾಗಿದೆ. ಮಾತ್ರವಲ್ಲ, ಜನ ಹಾಕುತ್ತಿರುವ ಹಿಡಿಶಾಪ ಅಧಿಕಾರಿಗಳಿಗಾಗಲಿ ಹಾಗೂ ಸಂಬಂಧಿಸಿದ ಜನಪ್ರತಿನಿಧಿಗಳಿಗಾಗಲಿ ಕೇಳದಾಗಿದೆ ಎಂದು ಜನ ಅಸಮಾಧಾನ ಹೊರಹಾಕುತ್ತಿದ್ದಾರೆ.

ಆರಂಭದಲ್ಲಿಯೇ ಕಳಪೆ

ಕಾಮಗಾರಿಗೆ ಸಂಬಂಧಿಸಿದಂತೆ ಆರಂಭದಲ್ಲಿಯೇ ಕಳಪೆ ಕಂಡು ಬಂದಿದ್ದ ಬಗ್ಗೆ ‘ವಿಜಯವಾಣಿ’ ವಿಸ್ತೃತ ವರದಿ ಪ್ರಕಟಿಸಿತ್ತು. ಡಾಂಬರು ಕಿತ್ತು ಹೋಗುತ್ತಿರುವ ವಿಷಯದ ಕುರಿತು ಸರ್ಕಾರದ ಗಮನ ಸೆಳೆದಿತ್ತು. ಆಗ ಮರು ರಿಪೇರಿ ಮಾಡಲಾಗಿತ್ತಲ್ಲದೇ ಕೆಲವೇ ತಿಂಗಳಲ್ಲಿ ಈ ರಸ್ತೆ ಹಾಳಾಗಿತ್ತು. ಹೀಗಾಗಿ ಇದೊಂದು ಸಂಪೂರ್ಣ ಕಳಪೆ ಕಾಮಗಾರಿಯಾಗಿದೆ ಎಂಬುದು ಜನರ ಆರೋಪ.

ಇಷ್ಟಾದರೂ ರಸ್ತೆಯ ಗುಣಮಟ್ಟ ಕಾಪಾಡಿಕೊಳ್ಳಲಾಗದಿರುವುದು ವ್ಯವಸ್ಥೆಯ ದುರಂತವೇ ಸರಿ. ಅಧಿಕಾರಿಗಳ ಲಂಚಬಾಕ ಸಂಸ್ಕೃತಿಯಿಂದಲೋ...ಜನಪ್ರತಿನಿಧಿಗಳ ದಿವ್ಯ ನಿರ್ಲಕ್ಷೃದಿಂದಾಗಿಯೋ ಇಡೀ ರಸ್ತೆ ಹಾಳಾದರೂ ಕಿಂಚಿತ್ತೂ ಗಮನ ಹರಿಸದಿರುವುದು ಜನರ ಆಕ್ರೋಶಕ್ಕೆ ಕಾರಣವಾಗಿದೆ.

ಅಂದಾಜು 10 ಕಿಮೀ ಹಾಳು

ಹಿರೇಮಸಳಿಯಿಂದ ಚಿಕ್ಕಮಸಳಿ, ಗೊರನಾಳ, ತೆನ್ನಿಹಳ್ಳಿ ಕ್ರಾಸ್ ಮೂಲಕ ತಾಂಬಾಕ್ಕೆ ಸಂಪರ್ಕ ಕಲ್ಪಿಸುವ ಈ ರಸ್ತೆ ಸಂಪೂರ್ಣ ಹಾಳಾಗಿದ್ದು, ಜುರಬೀನು ಹಚ್ಚಿ ಡಾಂಬರು ಹುಡುಕುವ ಸ್ಥಿತಿ ಇದೆ. ಅಂದಾಜು 10 ಕಿಮೀ ಉದ್ದದ ಈ ರಸ್ತೆಯಲ್ಲಿ ತಗ್ಗು-ಗುಂಡಿಗಳಿಂದ ಆವೃತವಾಗಿದ್ದು ಮೂಲ ಸ್ವರೂಪ ಕಳೆದುಕೊಂಡಿದೆ. ಜಮೀನಿನ ಕೆಲಸ-ಕಾರ್ಯಗಳಿಗೆ ಹಾಗೂ ವ್ಯಾಪಾರ ವಹಿವಾಟಿಗಾಗಿ ಇದೇ ಮಾರ್ಗವನ್ನು ಬಳಸುತ್ತಾರೆ. ಇಂಡಿ ಹಾಗೂ ವಿಜಯಪುರಕ್ಕೆ ತೆರಳಲು ಈ ರಸ್ತೆಯೇ ಪ್ರಮುಖ ಆಧಾರವಾಗಿದೆ. ಹೀಗಾಗಿ ಕೂಡಲೇ ರಸ್ತೆ ರಿಪೇರಿಗೊಳಿಸಬೇಕೆಂಬುದು ಗ್ರಾಮಸ್ಥರ ಆಗ್ರಹ.

ಹಿರೇಮಸಳಿಯ ರಸ್ತೆಗೆ ಸಂಬಂಧಿಸಿದಂತೆ ಅಧಿಕಾರಿಗಳು ಸ್ಥಳ ಪರಿಶೀಲನೆ ನಡೆಸಿದ್ದಾರೆ. ನಿರ್ವಹಣೆಗೆ ಸಂಬಂಧಿಸಿದಂತೆ ಪ್ರತಿ ತಿಂಗಳು ಗುತ್ತಿಗೆದಾರರು ಬಿಲ್ ಸಲ್ಲಿಸುತ್ತಾರೆ. ಎರಡು ತಿಂಗಳಿಗೊಮ್ಮ ಇಲಾಖೆಯ ಸಿಬ್ಬಂದಿ ರಸ್ತೆಯ ಗುಣಮಟ್ಟ ಪರಿಶೀಲಿಸುತ್ತಾರೆ. ಹಿರೇಮಸಳಿ ರಸ್ತೆ ಹಾಳಾಗಿದ್ದು ನಿಜ. ಈ ಕುರಿತು ಗುತ್ತಿಗೆದಾರನಿಗೆ ನೋಟಿಸಲ್ ನೀಡಲಾಗಿದೆ. ಬಿಲ್ ಪಾವತಿ ಮಾಡಿಲ್ಲ. ನಿರ್ವಹಣೆ ಮಾಡಲು ತಿಳಿಸಲಾಗಿದೆ. ಶೀಘ್ರದಲ್ಲೇ ದುರಸ್ಥಿಗೊಳಿಸಲಾಗುವುದು.

ಇಡೀ ರಸ್ತೆ ಹಾಳಾಗಿದೆ. ಸಂಬಂಧಿಸಿದ ಅಧಿಕಾರಿಗಳು ಯಾರೊಬ್ಬರೂ ಈ ಕುರಿತು ಕ್ರಮ ಕೈಗೊಂಡಿಲ್ಲ. ಜನ ತೀವ್ರ ಹೈರಾಣಾಗುತ್ತಿದ್ದಾರೆ. ಈ ಕಾಮಗಾರಿಗೆ ಸಂಬಂಧಿಸಿದಂತೆ ತನಿಖೆ ನಡೆಸಬೇಕು. ತಪ್ಪಿತಸ್ಥ ಗುತ್ತಿಗೆದಾರರ ಮೇಲೆ ಕ್ರಮ ಕೈಗೊಳ್ಳಬೇಕು. ಇಲ್ಲದಿದ್ದಲ್ಲಿ ಹೋರಾಟ ಅನಿವಾರ್ಯ.

ಪಿಎಂಜಿಎಸ್‌ವೈ