ಕೊಲೆ ಅಪರಾಧಿಗೆ ಕಠಿಣ ಜೀವಾವಧಿ ಶಿಕ್ಷೆ; ಲಕ್ಷ ರೂಪಾಯಿ ದಂಡ

ಸ್ಥಳೀಯ ಟಕ್ಕೆ ಬಳಿಯ ಶಾಸ್ತ್ರಿ ನಗರದ ನಿವಾಸಿ ಮರೆಪ್ಪ ಕರೆಪ್ಪ ಸಿಂಗಾಡಿ ಶಿಕ್ಷೆಗೆ ಗುರಿಯಾಗಿದ್ದಾನೆ. 2019 ಜು. 5 ರಂದು ಸೋಮಲಿಂಗ ಹೊನ್ನಪ್ಪ ಬಾಗೇವಾಡಿ ಎಂಬಾತನನ್ನು ಕೊಲೆ ಮಾಡಿದ್ದನು. ಮೃತ ಸೋಮಲಿಂಗ ಭಾಗ್ಯಶ್ರೀ ನೀಲಕಂಠ ದೊಡ್ಡಮನಿ ಎಂಬುವಳೊಂದಿಗೆ ಸಲುಗೆಯಿಂದ ಇದ್ದುದ್ದನ್ನು ಕಂಡ ಮರೆಪ್ಪ ಭಾಗ್ಯಶ್ರೀಯೊಂದಿಗೆ ಸಲುಗೆಯಿಂದ ಇರಬೇಡವೆಂಬುದಾಗಿಯೂ, ಹಾಗೆ ಮಾಡಿದರೆ ಕೊಲೆ ಮಾಡುವುದಾಗಿಯೂ ಬೆದರಿಕೆ ಹಾಕಿದ್ದನು. ಆದರೆ, ಭಾಗ್ಯಶ್ರೀ ಹಾಗೂ ಸೋಮನಿಂಗ ಪರಸ್ಪರ ಮಾತನಾಡುತ್ತಾ ನಿಂತಾಗ ಮಾರಕಾಸ್ತ್ರಗಳಿಂದ ಹಲ್ಲೆ ನಡೆಸಿದ್ದನು. ಗಾಯಗೊಂಡ ಸೋಮಲಿಂಗ ಚಿಕಿತ್ಸೆ ಫಲಿಸದೇ ಆಸ್ಪತ್ರೆಯಲ್ಲಿ ಅಸುನೀಗಿದ್ದನು.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಸೋಮಲಿಂಗನ ಸಹೋದರ ದೂರು ದಾಖಲಿಸಿದ್ದನು. ಸಿಪಿಐ ರವೀಂದ್ರ ಕೆ. ನಾಯ್ಕೋಡಿ ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು. ಪ್ರಕರಣವ ವಿಚಾರಣೆ ಕೈಗೆತ್ತಿಕೊಂಡ 4ನೇ ಅಧಿಕ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶ ಮದ್ವೇಶ ದುಬೇರ ಅವರು ಮರೆಪ್ಪನಿಗೆ ಕಠಿಣ ಜೀವಾವಧಿ ಶಿಕ್ಷೆ ಹಾಗೂ ದಂಡ ವಿಧಿಸಿ ತೀರ್ಪು ಪ್ರಕಟಿಸಿದ್ದಾರೆ. ಸರ್ಕಾರದ ಪರವಾಗಿ ಅಭಿಯೋಜಕ ವಿ.ಜಿ. ಮಾಮನಿ ವಾದ ಮಂಡಿಸಿದ್ದರು.