ಐತಿಹಾಸಿಕ ನಗರಿಯಲ್ಲಿ ‘ಈದ್ ಮಿಲಾದುನ್ನಬಿ’ ವಿಜೃಂಭಣೆಯ ಆಚರಣೆ, ಬೃಹತ್ ಶಾಂತಿಯಾತ್ರೆ

ಪ್ರಮುಖ ಮುಖ್ಯಾಂಶಗಳು

• ಪ್ರವಾದಿ ಹಜರತ್ ಮೊಹ್ಮದ್ ಪೈಗಂಬರ್ ಅವರ ಜಯಂತ್ಯುತ್ಸವ
• ಭಾವೈಕ್ಯತೆ ಮೆರೆದ ಹಿಂದೂ ಮಠಾಧೀಶರು
• ಶಾಂತಿಯಾತ್ರೆಯಲ್ಲಿ ಭಾಗವಹಿಸಿ ಗಮನ ಸೆಳೆದ ಧಾರ್ಮಿಕ ಮುಖಂಡರು

ವಿಜಯಪುರ: ಆದಿಲ್ ಶಾಹಿ ಸುಲ್ತಾರ ರಾಜಧಾನಿಯಾಗಿದ್ದ ಐತಿಹಾಸಿಕ ವಿಜಯಪುರ ನಗರದಲ್ಲಿ ಮಂಗಳವಾರ

ಪ್ರವಾದಿ ಹಜರತ್ ಮೊಹ್ಮದ್ ಪೈಗಂಬರ್ ಅವರ 1500 ನೇ ಜಯಂತ್ಯುತ್ಸವ ಈದ್ ಮಿಲಾದುನ್ನಬಿ ಪ್ರಯುಕ ಅದ್ದೂರಿಯಾಗಿ ಮತ್ತು ಶಾಂತಿಯುತವಾಗಿ ಮೆರವಣಿಗೆ ನಡೆಸಲಾಯಿತು.

ಮಠಾಧೀಶರು ಸಾಥ್

ಹಿಂದೂ ಸಮಾಜದ ಅನೇಕ ಮಠಾಧೀಶರು ಶಾಂತಿಯಾತ್ರೆಯಲ್ಲಿ ಪಾಲ್ಗೊಂಡಿದ್ದರು. ಆಲಮೇಲ ವಿರಕ್ತ ಮಠದ ಜಗದೇವ ಮಲ್ಲಿಬೊಮ್ಮಯ್ಯ ಸ್ವಾಮೀಜಿ, ದೇವರಹಿಪ್ಪರಗಿ ಅವುಗೇಶ್ವರ ತಪೋವನ ಪರದೇಸಿ ಮಠದ ಶಿವಯೋಗಿ ಶಿವಾಚಾರ್ಯರು, ದೇವರ ಹಿಪ್ಪರಗಿ ಜಡಿಮಠದ ಜಡಿಸಿದ್ದೇಶ್ವರ ಸ್ವಾಮೀಜಿ, ವಿರಕ್ತ ಮಠ ಮಸಬಿನಾಳದ ಸಿದ್ಧರಾಮಶಿವಾಚಾರ್ಯರು, ಮಮದಾಪುರವಿರಕ್ತಮಠದ ಮುರುಘೇಂದ್ರ ಸ್ವಾಮೀಜಿ ಸೇರಿ ಅನೇಕ ಮಠಾಧೀಶರು ಪಾಲ್ಗೊಂಡು ಭಾವೈಕ್ಯತೆ ಮೆರೆದರು.

ಆಸಾರ್ ಮಹಲ್‌ನಲ್ಲಿ ಸಂದಲ್

ಐತಿಹಾಸಿಕ ಆಸಾರ್ ಮಹಲ್‌ನಲ್ಲಿ ಸಂದಲ್ ಕಾರ್ಯಕ್ರಮ ವಿಜೃಂಭಣೆಯಿಂದ ನೆರವೇರಿತು. ಪ್ರವಾದಿ ಹಜರತ್ ಮೊಹ್ಮದ್ ಪೈಗಂಬರ್ ಅವರ ಪವಿತ್ರ ಕೇಶಗಳನ್ನು ಇರಿಸಲಾಗಿರುವ ಪವಿತ್ರ ಪೆಟ್ಟಿಗೆಯನ್ನು ಸಾವಿರಾರು ಯುವಕರು ದರ್ಶನ ಮಾಡಿದರು. ಮುಶ್ರೀಫ್, ತಾವೀಲ್ದಾರ್ ಕುಟುಂಬಗಳ ಪ್ರಮುಖರು ಸಾಂಪ್ರದಾಯಿಕ ಹಾಗೂ ಶಾಹಿ ಕಿಲೀಕೈ ಮೂಲಕ ಕೋಣೆಯ ಬಾಗಿಲನ್ನು ತೆರೆದರು. ಎಲ್ಲ ಐತಿಹಾಸಿಕ ಸ್ಮಾರಕಗಳು ಬಣ್ಣದ ದೀಪಗಳಿಂದ ಕಂಗೊಳಿಸಿದವು. ಶಾಸ್ತ್ರಿ ಮಾರುಕಟ್ಟೆ, ಕೆಸಿ ಮಾರುಕಟ್ಟೆ, ಟಿಪ್ಪು ಸುಲ್ತಾನ್ ವೃತ್ತ, ಮಹಾತ್ಮ ಗಾಂಧಿ ವೃತ್ತದಿಂದ ಬಸವೇಶ್ವರ ವೃತ್ತದವರೆಗೆ ಬಣ್ಣದ ಬಲ್ಬ್‌ಗಳು ರಾರಾಜಿಸಿದವು. ಬೃಹತ್ ಕಟೌಟ್‌ಗಳು ಗಮನ ಸೆಳೆದವು.