ತಿಕೋಟಾದಲ್ಲಿ ರೈತ ಕ್ಷೇತ್ರೋತ್ಸವ, 67 ಹಳ್ಳಗಳಿಗೆ 206 ಚೆಕ್‌ಡ್ಯಾಂ ನಿರ್ಮಿಸುವ ಭರವಸೆ, ಸಚಿವ ಎಂ.ಬಿ. ಪಾಟೀಲರಿಗೆ ಕೃಷಿ ಉತ್ಪನ್ನಗಳಿಂದ ತುಲಾಭಾರ

ತಿಕೋಟಾದ ಹಳಚಾಪುರ ರಸ್ತೆಯ ಸಾತಲಿಂಗಯ್ಯ ಸಾಲಿಮಠ ಅವರ ತೋಟದಲ್ಲಿ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ ತಿಕೋಟಾ ತಾಲೂಕು ಘಟಕದಿಂದ ಭಾನುವಾರ ಆಯೋಜಿಸಿದ್ಧ ರೈತ ಕ್ಷೇತ್ರೋತ್ಸವ ಮತ್ತು ಜಿಲ್ಲೆಯ ಸಮಸ್ತ ಕಬ್ಬು ಬೆಳೆಗಾರರಿಗೆ ವಿಶೇಷ ತಜ್ಞರಿಂದ ಚಿಂತನಗೋಷ್ಠಿ, ಕೃಷಿಗೆ ಸಂಬಂಧಿಸಿದಂತೆ ಉಪನ್ಯಾಸ ಮತ್ತು ಕೃಷಿ ಉತ್ಪನ್ನಗಳಿಂದ ತುಲಾಭಾರ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಬಬಲೇಶ್ವರ ಮತ್ತು ತಿಕೋಟಾ ತಾಲೂಕುಗಳಲ್ಲಿ 67 ಹಳ್ಳಗಳಿಗೆ 206 ಚೆಕ್‌ಡ್ಯಾಂ ನಿರ್ಮಿಸಲಾಗುವುದು. ಇದರಿಂದ ಅಂತರ್ಜಲವೂ ಹೆಚ್ಚಾಗಲಿದೆ ಎಂದರು.

ತಿಕೋಟಾ- ಹಳಚಾಪುರ ರಸ್ತೆಯನ್ನು ರೂ. 3.50 ಕೋಟಿ ವೆಚ್ಚದಲ್ಲಿ ಅಭಿವೃದ್ಧಿ ಪಡಿಸಲಾಗುವುದು. ರೂ. 350 ಕೋಟಿ ವೆಚ್ಚದಲ್ಲಿ 750 ಕಿಮೀ ಹೊಲಗಾಲುವೆ ಕಾಮಗಾರಿ ಪೂರ್ಣಗೊಳಿಸಲಾಗುತ್ತಿದೆ. ರೈತರು ಹಂತಹಂತವಾಗಿ ಸಾವಯವ ಕೃಷಿ ಅಳವಡಿಸಿಕೊಳ್ಳಬಹುದು. ಹನಿ ನೀರಾವರಿ ಮೂಲಕ ಕಬ್ಬು ಬೆಳೆದರೆ ನೀರು ಉಳಿತಾಯ, ಇಳುವರಿ ಹೆಚ್ಚಳ, ಕೃಷಿ ಭೂಮಿಯ ಗುಣಮಟ್ಟ ಉಳಿಸಿಕೊಳ್ಳಲು ಸಾಧ್ಯ. ರೈತರಿಗೆ ಹನಿ ನೀರಾವರಿ ಸಲಕರಣೆ ಒದಗುಸಲು ಸಕ್ಕರೆ ಕಾರ್ಖಾನೆಗಳ ಜೊತೆಗೆ ಒಡಂಬಡಿಕೆ ಮಾಡಿಕೊಳ್ಳಲು ರೂಪುರೇಷೆ ಸಿದ್ಧಪಡಿಸಲಾಗುವುದು. ಬಾಬಾನಗರ ಬಳಿ ರೂ. 567 ಕೋಟಿ ವೆಚ್ಚದಲ್ಲಿ ಬೃಹತ್ ಜಲಸಂಗ್ರಹಾಲಯ ನಿರ್ಮಿಸಲಾಗುತ್ತಿದೆ ಎಂದರು.

ರೈತ ಸಂಘ ಮತ್ತು ಹಸಿರು ಸೇನೆ ರಾಜ್ಯಾಧ್ಯಕ್ಷ ಚುನ್ನಪ್ಪ ಪೂಜೇರಿ ಮಾತನಾಡಿ, ಕುಡಿಯುವ ನೀರಿಗೂ ಪರದಾಡುತ್ತಿದ್ದ ವಿಜಯಪುರ ಜಿಲ್ಲೆಯಲ್ಲಿ ಈಗ ನೀರಾವರಿ ಮಾಡಿದ್ದಾರೆ. ರೈತರ ಬದುಕು ಹಸನಾಗಿಸಿದ್ದಾರೆ. ರಾಜ್ಯದಿಂದ ಸಂಗ್ರಹವಾಗುವ ತೆರಿಗೆಗೆ ತಕ್ಕಷ್ಟು ಕೇಂದ್ರ ಸರ್ಕಾರ ಪರಿಹಾರ ನೀಡುತ್ತಿಲ್ಲ. ಸಚಿವರು ರೈತಪರ ಚಿಂತಕರಾಗಿದ್ದಾರೆ ಎಂದರು.

ಸಂಘದ ತಾಲೂಕು ಘಟಕದ ಅಧ್ಯಕ್ಷ ಸಾತಲಿಂಗಯ್ಯ ಸಾಲಿಮಠ ಮಾತನಾಡಿ, ಹುಲ್ಲು ಕಡ್ಡಿ ಬೆಳೆಯದ ಈ ಭಾಗದಲ್ಲಿ ಈಗ ಕೊಳವೆ ಭಾವಿಗಳಲ್ಲಿ ನೀರು ಬಂದಿದೆ. ಕುಡಿಯುವ ನೀರಿಗಾಗಿ ಪರದಾಡುತ್ತಿದ್ದ ನಾವು ಇಂದು ಹೊಲದಲ್ಲಿ ಕಬ್ಬು ಬೆಳೆಯುತ್ತಿದ್ದೇವೆ. ನಮ್ಮ ಭಾಗದ ರೈತರ ಬಾಳು ಹಸನು ಮಾಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಸಚಿವ ಎಂ.ಬಿ. ಪಾಟೀಲ ಅವರನ್ನು ಕೃಷಿ ಉತ್ಪನ್ನಗಳಿಂದ ತುಲಾಭಾರ ಮಾಡುವ ಕಾರ್ಯಕ್ರಮ ಆಯೋಜಿಸಿದ್ದೇವೆ ಎಂದು ಹೇಳಿದರು.

ಸಂಘದ ರಾಜ್ಯ ಗೌರವಾಧ್ಯಕ್ಷ ಶಶಿಕಾಂತ ಗುರೂಜಿ, ಗುಣದಾಳ ಕಲ್ಯಾಣ ಹಿರೇಮಠದ ಡಾ. ವಿವೇಕಾನಂದ ದೇವರು, ಶಿರಸ್ಯಾಡ ಹಿರೇಮಠದ ಅಭಿನವ ಮುರುಗೇಂದ್ರ ಶಿವಾಚಾರ್ಯರು ಹಾಗೂ ತಿಕೋಟಾ ಹಿರೇಮಠದ ಶಿವಬಸವ ಶಿವಾಚಾರ್ಯರು ಮಾತನಾಡಿದರು.

ರೈತರು ಸಚಿವರಿಗೆ ಅಡಕೆ, ಪಪ್ಪಾಯಿ, ಕಬ್ಬು, ಸೀತಾಫಲ, ಪೇರು, ದ್ರಾಕ್ಷಿ, ಒಣದ್ರಾಕ್ಷಿ, ಅಂಜೂರು ಹಾಗೂ ನೆಲ್ಲಿಕಾಯಿ ಕೃಷಿ ಉತ್ಪನ್ನಗಳಿಂದ ತುಲಾಭಾರ ನೆರವೇರಿಸಿದರು.

ಸಂಘದ ಜಿಲ್ಲಾಧ್ಯಕ್ಷ ಸಂಗಮೇಶ ಸಗರ, ಮುಖಂಡರಾದ ಸಿದ್ದು ಗೌಡನವರ, ಸೋಮನಾಥ ಬಾಗಲಕೋಟ, ಭೀಮರಾವ ತಮ್ಮಣ್ಣ ಹಂಗರಗಿ, ಮಲ್ಲಿಕಾರ್ಜುನ ಹಂಜಗಿ, ಬಸಯ್ಯ ಗುರಯ್ಯ ವಿಭೂತಿ, ಜಗದೀಶಗೌಡ ಎಂ. ಪಾಟೀಲ, ವಿಜಯಕುಮಾರ ಎಂ. ಪಾಟೀಲ, ಪ್ರತಿಭಾ ಜಗದೀಶಗೌಡ ಪಾಟೀಲ, ಶೋಭಾ ಮಹಾರುದ್ರ ಹಲ್ಯಾಳ, ಲೇಪು ರೇವಣಸಿದ್ಧ ಕೊಣ್ಣೂರ, ಭಾಗೀರಥಿ ಚಂ. ತೇಲಿ, ಸಿದಗೊಂಡ ರುಗ್ರಗೌಡ, ಎಚ್.ಎಂ. ಬಾಗವಾನ, ನಾರಾಯಣ ಶಂಕರ ಪರಮಾಜಿ, ಕಲ್ಲು ಸೊನ್ನದ, ರಾಹುಲ್ ಕುಬಕಡ್ಡಿ, ಗಿರೀಶ ಕುಲಕರ್ಣಿ, ಸಿದ್ರಾಮ ಪೂಜಾರಿ, ಸಿದ್ದಪ್ಪ ಭೊಸಗೊಂಡ, ರಾಮು ಮಾಳಿ, ಸಾಹೇಬಗೌಡ ಕೆಂಪವಾಡ, ಮಾನಿಂಗಪ್ಪ ಮಂಟೂರ, ಮಮ್ಮುಲಾಲ ಮುಜಾವರ, ಸದಾಶಿವಯ್ಯ ಅರಕೇರಿಮಠ ಮತ್ತಿತರರಿದ್ದರು.