ಶಿಕ್ಷಣ ಇಲಾಖೆಯಿಂದ 16 ಶಾಲೆ ಆರಂಭಗೊಳ್ಳದಂತೆ ಕ್ರಮ, ಇದು ವಿಜಯವಾಣಿಯ ಬಿಗ್ ಇಂಪ್ಯಾಕ್ಟ್

2026-27ನೇ ಸಾಲಿಗೆ ಖಾಸಗಿ ಶಾಲೆಗಳಿಗೆ ಹೊಸದಾಗಿ ನೋಂದಣಿ ಪಡೆಯಲು ಆನ್‌ಲೈನ್ ಮೂಲಕ ಅರ್ಜಿಗಳನ್ನು ಆಹ್ವಾನಿಸಲು ಅವಕಾಶ ನೀಡಲಾಗಿತ್ತು. 2026 ಫೆ. 3 ರಿಂದ ಮೇ 30ರವರೆಗೆ ಅರ್ಜಿ ಸಲ್ಲಿಸಲು ಕಾಲಮಿತಿ ನಿಗದಿಪಡಿಸಲಾಗಿತ್ತು. ಮುಂದುವರಿದು ಜು. 15ರವರೆಗೆ ಕಾಲಮಿತಿ ವಿಸ್ತರಿಸಲಾಗಿತ್ತು. ಈ ವೇಳೆ ಆನ್‌ಲೈನ್ ಮೂಲಕ ಅಗತ್ಯ ದಾಖಲೆಗಳನ್ನು ನಿರ್ವಹಿಸುತ್ತಿರಬೇಕಾದರೆ, ಆನ್‌ಲೈನ್‌ನಲ್ಲಿ ಅರ್ಜಿ ತಿರಸ್ಕರಿಸಿದರೂ ಡಿಡಿಪಿಐ ಲಾಗಿನ್ ದುರುಪಯೋಗಪಡಿಸಿಕೊಂಡು 16 ಶಾಲೆಗಳಿಗೆ ಅನಧಿಕೃತವಾಗಿ ಅನುಮೋದನೆ ನೀಡಲಾಗಿದೆ. ಈ ಕುರಿತು ದೂರು ದಾಖಲಿಸುವ ಪ್ರಕ್ರಿಯೆ ಜಾರಿಯಲ್ಲಿದೆ.

ಹೀಗಾಗಿ 2026-27 ನೇ ಸಾಲಿನ ಶೈಕ್ಷಣಿಕ ವರ್ಷದಲ್ಲಿ ಯಾವುದೇ ಕಾರಣಕ್ಕೂ ಈ 16 ಶಾಲೆಗಳನ್ನು ಆರಂಭವಾಗದಂತೆ ಮುನ್ನೆಚ್ಚರಿಕೆ ವಹಿಸಲು ಕ್ರಮ ಜರುಗಿಸಲಾಗಿದೆ. ಕ್ಷೇತ್ರ ಶಿಕ್ಷಣಾಧಿಕಾರಿಗಳನ್ನೊಳಗೊಂಡ ತಂಡವು ಆಯಾ ಶಾಲೆಗಳ ಸ್ಥಳಕ್ಕೆ ಹಾಜರಾಗಿ ಕ್ರಮ ವಹಿಸಿ ವರದಿ ಸಲ್ಲಿಸಲು ಆದೇಶವೂ ನೀಡಲಾಗಿದೆ. ಅನಧಿಕೃತವಾಗಿ ದಾಖಲಿಸಿಕೊಂಡ ಎಲ್ಲ ಮಕ್ಕಳನ್ನು ಅವರ ಪಾಲಕರ ಗಮನಕ್ಕೆ ತಂದು ಸಮೀಪದ ಸರ್ಕಾರಿ ಶಾಲೆಗೆ ಅಥವಾ ಪಾಲಕರು ಇಚ್ಛಿಸುವ ಶಾಲೆಗೆ ದಾಖಲಿಸಬೇಕು. ಪಾಲಕರು ಕೂಡ ಯಾವುದೇ ಅನಧಿಕೃತ ಶಾಲೆಗಳಲ್ಲಿ ಪ್ರವೇಶವನ್ನು ಪಡೆದಿದ್ದಲ್ಲಿ ಅವರೇ ನೇರವಾಗಿ ಜವಾಬ್ದಾರರಾಗುತ್ತಾರೆ. ಇದಕ್ಕೆ ಇಲಾಖೆ ಜವಾಬ್ದಾರಿ ಆಗಿರುವುದಿಲ್ಲ ಎಂದು ಇಲಾಖೆ ತಿಳಿಸಿದೆ.