ಬಬಲಾದಿ ಮಾರ್ಗವಾಗಿ ಬೆಂಗಳೂರಿಗೆ ನೇರ ಬಸ್

ಬುಧವಾರದಿಂದ ಬಸ್ ಸಂಪರ್ಕ ಆರಂಭವಾಗಿದ್ದು, ಇದರಿಂದಾಗಿ ಬಬಲಾದ, ಹಳಗುಣಕಿ, ಸಾವಳಸಂಗ ಮತ್ತು ಬಸನಾಳ ಗ್ರಾಮಗಳ ಒಡಲ ಧ್ವನಿ ಒಕ್ಕೂಟದ ಮಹಿಳೆಯರಿಗೆ ಬಹಳ ಅನುಕೂಲವಾಗಿದೆ. ನಮ್ಮ ಮನವಿಗೆ ಸ್ಪಂದಿಸಿದ ವಿಜಯಪುರದ ಕಲ್ಯಾಣ ಕರ್ನಾಟಕ ಸಾರಿಗೆ ವಿಭಾಗೀಯ ನಿಯಂತ್ರಣಾಧಿಕಾರಿ ನಾರಾಯಣ ಹಿರೇಕುರುಬರ ಅವರಿಗೆ ಆಭಾರಿಯಾಗಿರುವುದಾಗಿ ಅವರು ತಿಳಿಸಿದ್ದಾರೆ.

ಒಡಲ ಧ್ವನಿ ಮಹಿಳಾ ಒಕ್ಕೂಟದಿಂದ ಮಹಿಳೆಯರು ಬೆಳೆದ ಜೋಳ, ಸಜ್ಜೆ, ಹಾಗೂ ಶೇಂಗಾ ಬಳಸಿದ ಮೌಲ್ಯವರ್ಧಿತ ಆಹಾರ ಉತ್ಪನ್ನಗಳಾದ ಸಜ್ಜೆ ರೊಟ್ಟಿ, ಜೋಳದ ರೊಟ್ಟಿ, ಶೇಂಗಾ ಚಟ್ನಿ, ಅಗಸಿ ಚಟ್ನಿ, ಶೇಂಗಾ ಹೋಳಿಗೆ, ಶೇಂಗಾ ಉಂಡೆ ಹಾಗೂ ಜೋಳದ ದಪಾಟಿಯನ್ನು ತಯಾರಿಸುತ್ತಿದ್ದು, ಈ ಉತ್ಪನ್ನಗಳನ್ನು ಬೆಂಗಳೂರಿನ ಪ್ರಸಿದ್ಧ ಸಾವಯವ ಮತ್ತು ಸುಸ್ಥಿರ ಸಂತೆ ’ರಾಗಿಕಣ’ದಲ್ಲಿ ಮಾರಾಟ ಮಾಡಲು ತೆರಳುತ್ತಿದ್ದರು.

ಆದರೆ ಬಬಲಾದಿ ಗ್ರಾಮದಿಂದ ನೇರವಾಗಿ ಬೆಂಗಳೂರಿಗೆ ಬಸ್ ಇಲ್ಲದ್ದರಿಂದ ಒಕ್ಕೂಟದಲ್ಲಿ ಸಿದ್ಧವಾದ ಎಲ್ಲಾ ಪದಾರ್ಥಗಳನ್ನು ತೆಗೆದುಕೊಂಡು ಇಂಡಿ ಬಸ್‌ನಿಲ್ದಾಣಕ್ಕೆ ತೆರಳಿ ಅಲ್ಲಿಂದ ಬೆಂಗಳೂರು ಬಸ್‌ಗೆ ಹೋಗಬೇಕಿತ್ತು. ಹೆಚ್ಚಿನ ಲಗೇಜ್ ಇದ್ದುದರಿಂದ ಮಹಿಳೆಯರಿಗೆ ಬಹಳ ತೊಂದರೆ ಆಗುತ್ತಿತ್ತು.

ಹೀಗಾಗಿ ಈ ಬಗ್ಗೆ ವಿಭಾಗೀಯ ನಿಯಂತ್ರಣಾಧಿಕಾರಿ ನಾರಾಯಣ ಹಿರೇಕುರುಬರ ಅವರ ಗಮನಕ್ಕೆ ತಂದು, ಬಬಲಾದಿ ಗ್ರಾಮದ ಮಾರ್ಗವಾಗಿ ಬೆಂಗಳೂರಿಗೆ ಬಸ್ ಓಡಿಸಲು ಮನವಿ ಮಾಡಿಕೊಳ್ಳಲಾಗಿತ್ತು.

ಶ್ರಮಜೀವಿ ಮಹಿಳೆಯರಿಗೆ ಅನುಕೂಲವಾಗುವ ದೃಷ್ಟಿಯಿಂದ ಅವರ ಮನವಿಗೆ ಸ್ಪಂದಿಸಿದ ನಿಯಂತ್ರಣಾಧಿಕಾರಿ ನಾರಾಯಣ ಹಿರೇಕುರುಬರ ಬಸ್ ವ್ಯವಸ್ಥೆ ಕಲ್ಪಿಸಿ, ಅನುಕೂಲ ಮಾಡಿಕೊಟ್ಟಿದ್ದಾರೆ ಎಂದು ಸಂಘದ ಅಧ್ಯಕ್ಷೆ ಭುವನೇಶ್ವರಿ ಕಾಂಬಳೆ ಮಾಹಿತಿ ನೀಡಿದ್ದಾರೆ.