ಜಂಪರ್‌ನಲ್ಲಿ ಕಡಿತ-ಸೀರೆಯಲ್ಲಿ ಹಿಡಿತ, ಸಿದ್ದರಾಮಯ್ಯ ಆರ್ಥಿಕ ನೀತಿ ಕುರಿತು ಸಂಸದ ಜಿಗಜಿಣಗಿ ಲೇವಡಿ

ಗ್ರಾಮೀಣ ಭಾಗದಲ್ಲಿ ಬಟ್ಟೆ ವ್ಯಾಪಾರದಲ್ಲಿ ಸಾಮಾನ್ಯವಾಗಿ ಕೇಳಿ ಬರುವ ‘ಕುಪ್ಪಸದಲ್ಲಿ ರಿಯಾಯಿತಿ ನೀಡಿ ಸೀರೆಯಲ್ಲಿ ಹಿಡಿದ’ ಎಂಬ ಪದವನ್ನು ಮಾರ್ಮಿಕವಾಗಿ ಬಳಸಿದ ಸಂಸದರು, ಸಿದ್ದರಾಮಯ್ಯ ಆರ್ಥಿಕ ನೀತಿ ಕೂಡ ‘ಕುಪ್ಪಸದಲ್ಲಿ ಹಿಡಿದು ಸೀರೆಯಲ್ಲಿ ಬಿಟ್ಟ’ ಎಂಬಂತಾಗಿದೆ ಎಂದು ಲೇವಡಿ ಮಾಡಿದರು.

‘ಸಿದ್ರಾಮಣ್ಣನ ಆರ್ಥಿಕತೆ ಹೇಗಿದೆ ಎಂದರೆ-‘ಹೆಣ್ಮಕ್ಕಳಿಗೆ ಕೊಡುವ ಪಿಂಚಣಿ ಹಣಕ್ಕಾಗಿ ಗಂಡನ ಜೇಬಿಗೆ ಕೈ ಹಾಕಿದಂತಾಗಿದೆ, ಒಂದು ಕೈಯಿಂದ ಕೊಡೋದು ಇನ್ನೊಂದು ಕೈಯಿಂದ ಕಿತ್ತುಕೊಳ್ಳೋದು, ಮಾತೆತ್ತಿದರೆ ಗ್ಯಾರಂಟಿ ಕೊಟ್ಟಿರುವುದಾಗಿ ಹೇಳುವ ಸಿದ್ರಾಮಣ್ಣ ಅದನ್ನು ಹೊಂದಿಸಲು ಇನ್ನೊಂದು ಕಡೆ ಅದೇ ಕುಟುಂಬಕ್ಕೆ ತೆರಿಗೆ ಹೊರಹಾಕಿದ್ದಾರೆ’ ಎಂದು ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಅವರು ಕಿಚಾಯಿಸಿದರು.

ಮೂರು ವರ್ಷದ ಸಿದ್ದರಾಮಯ್ಯ ಆಡಳಿತದಲ್ಲಿ ಮುನ್ನೂರು ವೈಫಲ್ಯಗಳಿದ್ದು, ಆ ವೈಫಲ್ಯದ ಹಾರ ಹಾಕಿ ಅಭಿನಂದಿಸುವುದಾಗಿ ತಿಳಿಸಿದ ಸಂಸದರು, ಭ್ರಷ್ಟಾಚಾರ, ಹಗರಣ, ಅಕ್ರಮಗಳೇ ಸಿದ್ದರಾಮಯ್ಯ ಸರ್ಕಾರದ ಸಾಧನೆ. ಕುರ್ಚಿ ಕಿತ್ತಾಟದಲ್ಲೇ ಕಾಲಹರಣ ಮಾಡಿದ್ದು ಬಿಟ್ಟರೆ ಈ ಮೂರು ವರ್ಷದ ಆಡಳಿತಾವಧಿಯಲ್ಲಿ ಅಭಿವೃದ್ಧಿ ಎಂಬುದು ಶೂನ್ಯ. ಒಂದೇ ಒಂದು ಹೇಳಿಕೊಳ್ಳುವಂಥ ಅಭಿವೃದ್ಧಿ ಕಾರ್ಯಗಳಾಗಿಲ್ಲ. ರಸ್ತೆಗಳು ಹದಗೆಟ್ಟಿವೆ, ಮೂಲ ಸೌಕರ್ಯಗಳು ಮರೀಚಿಕೆಯಾಗಿವೆ, ಶಿಕ್ಷಣ ಮತ್ತು ಆರೋಗ್ಯ ಕ್ಷೇತ್ರಗಳು ಸಂಪೂರ್ಣ ಹಳ್ಳ ಹಿಡಿದಿವೆ ಎಂದು ಹರಿಹಾಯ್ದರು.

ರಾಜ್ಯದ ಜನ ಮೌನವಾಗಿದ್ದಾರೆಂದರೆ ಅದರ ಅರ್ಥ ಅವರು ಹೇಡಿಗಳು ಅಂತಲ್ಲ. ಅವರ ತಾಳ್ಮೆ ಪರೀಕ್ಷಿಸಬೇಡಿ. ಈಗಾಗಲೇ ಜನ ಬೇಸತ್ತಿದ್ದು, ಕಾಂಗ್ರೆಸ್‌ಗೆ ತಕ್ಕ ಪಾಠ ಕಲಿಸಲು ಸೂಕ್ತ ಸಂದರ್ಭಕ್ಕಾಗಿ ಎದುರು ನೋಡುತ್ತಿದ್ದಾರೆ ಎಂದು ಗಂಭೀರವಾಗಿ ನುಡಿದರು.

ದೇಶದಲ್ಲಿ ಬೆಲೆ ಏರಿಕೆಗೆ ಸಂಬಂಧಿಸಿದಂತೆ ಸುದ್ದಿಗಾರರ ಪ್ರಶ್ನೆಗಳಿಗೆ ಪ್ರತಿಕ್ರಿಯಿಸಿದ ಸಂಸದ ರಮೇಶ ಜಿಗಜಿಣಗಿ ಅವರು, ಪ್ರಧಾನಿ ನರೇಂದ್ರ ಮೋದಿ ಅವರ ಆಡಳಿತದಿಂದಾಗಿಯೇ ದೇಶ ಸುಭದ್ರವಾಗಿದೆ. ಹಾಗೊಂದು ವೇಳೆ ಕಾಂಗ್ರೆಸ್ ಕೇಂದ್ರದಲ್ಲಿ ಅಧಿಕಾರದಲ್ಲಿದ್ದಿದ್ದರೆ ಇಷ್ಟೊತ್ತಿಗಾಗಲೇ ದೇಶ ಸ್ಮಶಾನ ಆಗುತ್ತಿತ್ತು ಎಂದರು.

ಕರೊನಾ ಸಂದರ್ಭದಲ್ಲಿ ದೇಶವನ್ನು ಕಣ್ಣಲ್ಲಿ ಕಣ್ಣಿಟ್ಟು ಕಾಪಾಡಿದವರು ನರೇಂದ್ರ ಮೋದಿ. ದೇಶಕ್ಕೆ ಮಾತ್ರವಲ್ಲ ಪ್ರಪಂಚದ ಇತರೆ ರಾಷ್ಟ್ರಗಳಿಗೂ ಉಚಿತವಾಗಿ ಲಸಿಕೆ ನೀಡಿದ ಶ್ರೇಯಸ್ಸು ಮೋದಿ ಸರ್ಕಾರಕ್ಕೆ ಸಲ್ಲಬೇಕು. ಇದೀಗ ಅಂತಾರಾಷ್ಟ್ರೀಯ ವಿದ್ಯಮಾನಗಳಿಂದಾಗಿ ಸ್ವಲ್ಪ ಬೆಲೆ ಏರಿಕೆಯಾಗಿದ್ದು ನಿಜ. ಆದರೆ, ಎಲ್ಲೂ ತೈಲ ಅಭಾವವಾಗದಂತೆ ಮೋದಿ ನೋಡಿಕೊಳ್ಳುತ್ತಿದ್ದಾರೆ. ಮಿತವಾಗಿ ಬಳಸಲು ಕರೆ ಕೊಟ್ಟಿದ್ದಾರೆ ವಿನಃ ಮಾರಾಟ ಹಾಗೂ ಖರೀದಿಗೆ ನಿಷೇಧ ಹೇರಿಲ್ಲವೆಂದರು.

ಮುಖಂಡ ಕಾಸುಗೌಡ ಬಿರಾದಾರ ಮಾತನಾಡಿ, ರಾಜ್ಯ ಸರ್ಕಾರದ ಸಾಧನೆ ಹದಗೆಟ್ಟ ರಸ್ತೆಗಳಲ್ಲಿ ಕಾಣಬೇಕಿದೆ. ಒಂದೇ ಒಂದು ರಸ್ತೆ ಸರಿಯಿಲ್ಲ. ಇಂಡಿ ವಿಧಾನ ಸಭೆ ಕ್ಷೇತ್ರವನ್ನೊಮ್ಮೆ ಕಣ್ತುಂಬಿಕೊಂಡರೆ ಕಾಂಗ್ರೆಸ್‌ನ ಮೂರು ವರ್ಷದ ಸಾಧನೆ ಗೊತ್ತಾಗಲಿದೆ ಎಂದು ಕಿಚಾಯಿಸಿದರು.

ಮಾಜಿ ಸಚಿವ ಅಪ್ಪಾಸಾಹೇಬ ಪಟ್ಟಣಶೆಟ್ಟಿ, ಬಿಜೆಪಿ ಜಿಲ್ಲಾಧ್ಯಕ್ಷ ಗುರುಲಿಂಗಪ್ಪ ಅಂಗಡಿ, ಮುಖಂಡ ಸಂಜೀವ ಐಹೊಳಿ ಇತರರಿದ್ದರು.