ಮಕ್ಕಳ ದಿನ ವಿನೂತನವಾಗಿ ಆಚರಣೆ, ಲಿಟಲ್ ಬ್ಲಿಸ್ ಶಾಲೆಯಲ್ಲಿ ಜನಮನಸೂರೆಗೊಂಡ ಆಹಾರ ಮೇಳ

ಮಕ್ಕಳ ದಿನಾಚರಣೆ ಅಂಗವಾಗಿ ಲಿಟಲ್ ಬ್ಲಿಸ್ ಶಾಲೆಯಲ್ಲಿ ಹಮ್ಮಿಕೊಂಡಿದ್ದ ಆಹಾರ ಮೇಳ ಅಕ್ಷರಶಃ ಮಾರುಕಟ್ಟೆ ವೈಭವ ಸೃಷ್ಠಿಸಿತಲ್ಲದೇ ಮಕ್ಕಳಲ್ಲಿ ಆ ಕುರಿತ ಜ್ಞಾನ ಮೂಡಿಸುವಲ್ಲಿ ಸಫಲವಾಯಿತು. ಮಕ್ಕಳಲ್ಲಿ ಆಹಾರದ ಕುರಿತು ಅರಿವು ಮೂಡಿಸುವ ನಿಟ್ಟಿನಲ್ಲಿ ಈ ಮೇಳ ಯಶಸ್ವಿಯಾಯಿತಲ್ಲದೇ ಪಾಲಕರು-ಪೋಷಕರ ಮೆಚ್ಚುಗೆಗೂ ಪಾತ್ರವಾಯಿತು. ಪಾಲಕರು ಅತ್ಯಂತ ಉತ್ಸುಕತೆಯಿಂದ ಚಿಣ್ಣರ ಜೊತೆಗೂಡಿ ಆಹಾರ ಪದಾರ್ಥಗಳನ್ನು ಸಿದ್ಧಪಡಿಸಿ ಪ್ರದರ್ಶಿಸಿದರು.

ಆಹಾರ ಮೇಳದಲ್ಲಿರುವ ಆಹಾರ ಪದಾರ್ಥಗಳ ‘ಮೆನು’ ಅಲ್ಲಿರುವ ತರಹೇವಾರಿ ಆಹಾರ ಪದಾರ್ಥಗಳ ಮಾಹಿತಿ ನೀಡಿತಲ್ಲದೇ ಸ್ಟಾರ್‌ಹೋಟೆಲ್‌ಗಳ ವೈಭವ ನೆನಪಿಸಿತು. ಡೋಕ್ಲಾ, ಆಲೂ ಪರೋಠಾ, ಆಲೂ ಸಮೋಸಾ, ಬ್ರೆಡ್ ಮಲಾಯಿ, ಮಸಾಲಾ ವಡಾ, ದಹಿ ವಡಾ, ಮಸಾಲಾ ಪಾಪಡ್, ಗೋಬಿ ಮಂಚೂರಿ, ಪಾನಿಪುರಿ, ಫಿಂಗರ್ ಚಿಪ್ಸ್, ಮಿಕ್ಸ್ಡ್ ಫ್ರುಟ್ ಸಲಾಡ್, ಚಾಕೊಲೇಟ್, ಮಿಲ್ಕ್ ಶೇಕ್, ವಿವಿಧ ಬಗೆಯ ಡೋನೆಟ್‌ಗಳು, ಸ್ಟಾಬೆರಿ, ಆರೆಂಜ್ ಮೊದಲಾದ ಬಗೆಯ ಐಸ್ ಕ್ರೀಂಗಳು, ಅನೇಕ ಬಗೆಯ ಸಿಹಿ ತಿನಿಸಿಗಳು, ವೆಜ್ ಬಿರ್ಯಾನಿ, ಝೀರಾ ರೈಸ್ ಸೇರಿದಂತೆ ಅನೇಕ ಬಗೆಯ ಆಹಾರ ಪದಾರ್ಥಗಳು ನೋಡುಗರ ಬಾಯಯಲ್ಲಿ ನೀರೂರಿಸಿದವು. ಪಾಲಕರು ಸಹ ಉತ್ಸಾಹದಿಂದ ಈ ಮೇಳಕ್ಕೆ ಕೈ ಜೋಡಿಸಿ ಮಕ್ಕಳಿಗೆ ಸಾಥ್ ನೀಡಿದರು.

ಮಕ್ಕಳಿಗೆ ಆಹಾರ ಪದಾರ್ಥಗಳ ಬಗ್ಗೆ ಅರಿವು ಮೂಡಿಸುವ ಈ ಕಾರ್ಯಕ್ರಮ ಆಯೋಜಿಸಲಾಗಿದೆ. ಮಕ್ಕಳಿಗೆ ಆಹಾರ ಪದ್ಧತಿಯ ಬಗ್ಗೆ ಪ್ರಾಯೋಗಿಕ ಅನುಭವ ಈ ಮೇಳದಿಂದ ಆಗಿದೆ ಎಂದು ಶಿಕ್ಷಣ ಸಂಸ್ಥೆಯ ಮುಖ್ಯ ಗುರು ತಾಹೇರಾಬಾನು ರೋಜಿಂದಾರ ವಿವರಿಸಿದರು.

ಮಕ್ಕಳು ಪರಿಸರದಿಂದ ಕಲಿಯಬೇಕು, ನಾವು ಸೇವಿಸುವ ಆಹಾರ ಯಾವ ರೀತಿ ತಯಾರಾಗುತ್ತದೆ, ಯಾವ ಪದಾರ್ಥಗಳನ್ನು ಅದರಲ್ಲಿ ಹಾಕಬೇಕು ಎಂಬಿತ್ಯಾದಿ ಪ್ರಾಥಮಿಕ ಜ್ಞಾನವನ್ನು ಈ ರೀತಿಯ ಆಹಾರ ಮೇಳಗಳಿಂದ ಮಕ್ಕಳಿಗೆ ನೀಡಬಹುದಾಗಿದೆ ಎಂದು ಪಾಲಕರಾದ ನಾಜಿಯಾ ಉಸ್ತಾದ ಅನಿಸಿಕೆ ವ್ಯಕ್ತಪಡಿಸಿದರು.