ಭೀಮಾತೀರದ ಕಳ್ಳತನ ಪ್ರಕರಣಗಳ ಪತ್ತೆ, ರೂ.1.20 ಕೋಟಿಗೂ ಅಧಿಕ ಮೌಲ್ಯದ ಸಾಮಗ್ರಿ ವಶ

ಒಟ್ಟು 20 ಪ್ರಕರಣಗಳಲ್ಲಿ 42 ಆರೋಪಿಗಳನ್ನು ವಶಕ್ಕೆ ಪಡೆಯಲಾಗಿದೆ. ವಶಪಡಿಸಿಕೊಳ್ಳಲಾದ ವಸ್ತುಗಳ ಮೌಲ್ಯ 1,20,04,750 ರೂ.ಎಂದು ಅಂದಾಜಿಸಲಾಗಿದೆ. ಘಟನಾ ಸ್ಥಳದಲ್ಲಿ ದೊರೆತ ಕುರುಹು, ಸಿಸಿಟಿವಿ ದೃಶ್ಯಾವಳಿಗಳು, ಸ್ಥಳೀಯವಾಗಿ ದೊರೆತ ಮಾಹಿತಿ, ನವೀನ ತಂತ್ರಜ್ಞಾನ ಹೀಗೆ ವಿವಿಧ ತನಿಖಾ ಕೌಶಲಗಳನ್ನು ಉಪಯೋಗಿಸಿ ಪ್ರಕರಣಗಳನ್ನು ಪತ್ತೆ ಮಾಡಲಾಗಿದೆ ಎಂದು ಗುರುವಾರ ಸುದ್ದಿಗೋಷ್ಠಿಯಲ್ಲಿ ಅವರು ತಿಳಿಸಿದರು.

ಚಡಚಣ ಠಾಣೆ ವ್ಯಾಪ್ತಿಯ ಶಿರಾಡೋಣ ಗ್ರಾಮದ ಬೀರಪ್ಪ ದೇವಸ್ಥಾನದ ಬಾಗಿಲ ಕೀಲಿ ಮುರಿದು ಮೂರ್ತಿಯ ಮೇಲಿದ್ದ ಹಾಗೂ ಟ್ರೆಜರಿಯಲ್ಲಿದ್ದ ಸುಮಾರು 6,51,000 ರೂ.ಮೌಲ್ಯದ ಚಿನ್ನಾಭರಣ ಕಳ್ಳತನ ಮಾಡಲಾಗಿತ್ತು. ಪ್ರಕರಣಕ್ಕೆ ಸಂಬಂಧಿಸಿದಮಥೆ ಮಹಾರಾಷ್ಟ್ರ ಮೂಲದ ನಾಗೇಶ ಮಧುಕರ ಭೋಸಲೆ ಎಂಬಾತನನ್ನು ಬಂಧಿಸಿ ಒಟ್ಟು 6,42,000 ರೂ. ಮೌಲ್ಯದ ಚಿನ್ನಾಭರಣ ವಶಕ್ಕೆ ಪಡೆಯಲಾಗಿದೆ. 2026 ಮಾ.2 ರಂದು ರಾತ್ರಿ ಟಾಕಳಿ ಗ್ರಾಮದಲ್ಲಿ ಮಲ್ಲಿಕಾರ್ಜುನ ರಾಮಚಂದ್ರ ತೇಲಿ ಇವರ ಪೀಕಪ್ ಗೂಡ್ಸ ವಾಹನ ಕಳುವಾಗಿತ್ತು. ಈ ಪ್ರಕರಣದಲ್ಲಿ ಮಹಾರಾಷ್ಟ್ರ ಮೂಲದ ವಿಶಾಲ ಠಾಣಾಜಿ ಮೋಳೆ ಎಂಬಾತನನ್ನು ವಾಹನ ಸಮೇತ ವಶಕ್ಕೆ ಪಡೆಯಲಾಗಿದೆ ಎಂದರು.

ಸಿಂದಗಿಯ ಯರಗಲ್ಲ ಬಿಕೆ ಗ್ರಾಮದ ಲಕ್ಷ್ಮಿ ಶರಣಪ್ಪ ತಳವಾರ ಇವರ ಮನೆಯ ಕೀಲಿ ಮುರಿದು ಒಟ್ಟು 4,50,000 ರೂ.ಮೌಲ್ಯದ ಚಿನ್ನಾಭರಣ ಕಳ್ಳತನ ಮಾಡಲಾಗಿತ್ತು. ಈ ಪ್ರಕರಣದಲ್ಲಿ ಮಹಾರಾಷ್ಟ್ರ ಮೂಲದ ಶಂಕರ ಊರ್ಫ್ ಈಶ್ವರ ಊರ್ಫ್ ಕಾಶೀನಾಥ ಊರ್ಫ್ ಲಿಂಗಂ ಭೋಸ್ಲೆ ಎಂಬಾತನನ್ನು ಬಂಧಿಸಿ ರೂ.6.80 ಲಕ್ಷ ಮೌಲ್ಯದ ಒಟ್ಟು 162.930 ಗ್ರಾಂ ಚಿನ್ನಾಭರಣ ವಶಕ್ಕೆ ಪಡೆಯಲಾಗಿದೆ.

ಆಲಮೇಲ ಬಸ್ ನಿಲ್ದಾಣದಲ್ಲಿ 2026 ಫೆ. 8ರಂದು ನಡೆದ ಸವಿತಾ ಕಾಶಿರಾಯ ತೊರವಿ ಎಂಬುವರ ಚಿನ್ನದ ಸರ ಸುಲಿಗೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಹಾರಾಷ್ಟ್ರ ಮೂಲದ ದೀಪ ಪರಶುರಾಮ ಮಾಳಿ, ಅರಮಾನ ಬಾಬು ಮಿಥಡೆ, ಪ್ರಕಾಶ ರಾಮಚಂದ್ರ ಮಾತಂಗಿ, ಕುನಾಲ್ ಕುಲದೀಪ ಸಾಳುಂಕೆ, ಹರ್ಷದ ಊರ್ಫ್ ಓಂಕಾರ ರಾಜಾಸಿಂಗ್ ಬಡಗೂಜರ ಇವರನ್ನು ಬಂಧಿಸಿ ಒಟ್ಟು 2.90 ಲಕ್ಷ ರೂ.ಮೌಲ್ಯದ ಬೆಲೆಬಾಳುವ ಸಾಮಗ್ರಿ ವಶಕ್ಕೆ ಪಡೆಯಲಾಗಿದೆ ಎಂದು ಎಸ್‌ಪಿ ನಿಂಬರಗಿ ವಿವರಿಸಿದರು.

ಆಲಮೇಲ ಪಟ್ಟಣದ ದಾನೇಶ್ವರಿ ಫೈನಾನ್ಸ್‌ನಲ್ಲಿ ನಡೆದ ಕಳ್ಳತನ ಪ್ರಕರಣ ಪತ್ತೆ ಹೆಚ್ಚಿದ್ದು, 11 ಲಕ್ಷ ರೂಪಾಯಿ ವಶಕ್ಕೆ ಪಡೆಯಲಾಗಿದೆ. ಫೈನಾನ್ಸ್ ಮ್ಯಾನೇಜ್ ಸೋಮಣ್ಣ ಲಚ್ಚಪ್ಪ ಪೂಜಾರಿ ಹಾಗೂ ಸಿಪಾಯಿ ಚಂದ್ರಶೇಖರ ಕುಪೇಂದ್ರ ಗೌಂಡಿ ಬಂಧಿತ ಆರೋಪಿಗಳು. ಬೊಮ್ಮನಹಳ್ಳಿ ಕ್ರಾಸ್‌ದಲ್ಲಿ ಇಟ್ಟ ಟ್ರಾೃಕ್ಟರ್ ಕಳ್ಳತನ ಪ್ರಕರಣದಲ್ಲಿ ಮಹಾರಾಷ್ಟ್ರದ ಸುಧಾಕರ ಬಾನುದಾಸ ರಾಠೋಡ ಎಂಬಾತನನ್ನು ಬಂಧಿಸಲಾಗಿದೆ.

ಈತನಿಂದ 4,70,000ರೂ. ಮೌಲ್ಯದ ಸಾಮಗ್ರಿ ವಶಕ್ಕೆ ಪಡೆಯಲಾಗಿದೆ. ಇನ್ನು ಕಲಕೇರಿ ಠಾಣೆ ವ್ಯಾಪ್ತಿಯ ಗೋಲಗೇರಿಯಲ್ಲಿ 2026 ಜ.17ರಂದು ನಡೆದ ಜೆಸಿಬಿ ಕಳ್ಳತನ ಪ್ರಕರಣದಲ್ಲಿ ಮಹಾರಾಷ್ಟ್ರದ ಶಿವಾಜಿ ಬರಮು ರೈತಮುರೆ ಹಾಗೂ ಹೂವಣ್ಣ ರೇವಪ್ಪ ಬಂಡಗಾರ ಎಂಬುವರನ್ನು ಬಂಧಿಸಲಾಗಿದೆ ಎಂದು ತಿಳಿಸಿದರು.

ವಿಜಯಪುರ ನಗರದ ಪೊಲೀಸ್ ಸಭಾಭವನದಲ್ಲಿ ಎಸ್‌ಪಿ ಲಕ್ಷ್ಮಣ ನಿಂಬರಗಿ ಕಳ್ಳರಿಂದ ವಶಕ್ಕೆ ಪಡೆಯಲಾದ ಚಿನ್ನಾಭರಣ ಪರಿಶೀಲಿಸಿದರು. ಇಂಡಿ ಡಿಎಸ್‌ಪಿ ಸದಾಶಿವ ಕಟ್ಟೀಮನಿ ಇತರರಿದ್ದಾರೆ.

ಹೊರ್ತಿ ಪಟ್ಟಣದಲ್ಲಿ 2025 ಡಿ. 5ರಂದು ನಡೆದ ಚಿನ್ನದ ಸರ ಕಳ್ಳತನ ಪ್ರಕರಣದಲ್ಲಿ ಉತ್ತರ ಪ್ರದೇಶ ಮೂಲದ ಪುಷ್ಪೇಂದ್ರ ಗುಂಧಾರಿ ದೊಹಿರೆ ಎಂಬಾತನನ್ನು ಬಂಧಿಸಿ 2.60 ಲಕ್ಷ ರೂ.ಮೌಲ್ಯದ ಚಿನ್ನದ ಸರ ವಶಕ್ಕೆ ಪಡೆಯಲಾಗಿದೆ. ಪೊಲೀಸರ ಸೋಗಿನಲ್ಲಿ ಲಾರಿ ಅಡ್ಡಗಟ್ಟಿ ಚಾಲಕ ಮತ್ತು ಕ್ಲೀನರ್‌ಗೆ ಹೊಡಿಬಡಿ ಮಾಡಿ ಸುಲಿಗೆ ಮಾಡಿದ್ದಲ್ಲದೇ ಕಾರಿನ ಡಿಕ್ಕಿಯಲ್ಲಿ ಹಾಕಿಕೊಂಡು ಪುಣೆಗೆ ಹೋಗಿ ಬಿಟ್ಟಿದ್ದು, ಲಾರಿಯಲ್ಲಿದ್ದ ಸುಮಾರು 8,25,000 ರೂ. ಮೌಲ್ಯದ 600 ಅಕ್ಕಿ ಚೀಲಗಳು ನ್‌ಲೋಡ್ ಮಾಡಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ 9ಜನರನ್ನು ಬಂಧಿಸಿ ಲಾರಿ ಹಾಗೂ 1.25 ಲಕ್ಷ ರೂ. ನಗದು ವಶಕ್ಕೆ ಪಡೆಯಲಾಗಿದೆ.

ಝಳಕಿ ಪಟ್ಟಣದ ಜೇವೂರ ಗ್ರಾಮದ ಡಾಬಾ ಬಳಿ ಅನುಮಾನಾಸ್ಪದವಾಗಿ ನಿಂತಿದ್ದ ಮೂವರನ್ನು ವಿಚಾರಣೆಗೊಳಪಡಿಲಾಗಿ ಅಕ್ರಮವಾಗಿ 1.50 ಲಕ್ಷ ರೂ.ಮೌಲ್ಯದ 31 ಗ್ರಾಂ ಚಿನ್ನಾಭರಣ ಹೊಂದಿದ್ದು ಕಂಡು ಬಂದಿತು. ಇನ್ನು ಅಂಜುಟಗಿ ಗ್ರಾಮದಲ್ಲಿ 2025 ಸೆ.25ರಂದು ಭಾಗಣ್ಣ ಮಲಕಾರಿ ಇಚ್ಚೂರ ಎಂಬುವರ ಪತ್ರಾಸ್ ಶೆಡ್‌ನಲ್ಲಿದ್ದ 8 ಆಡು ಕಳ್ಳತನ ಮಾಡಲಾಗಿತ್ತು. ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಹಾರಾಷ್ಟ್ರ ಮೂಲದ ಮಾರುತಿ ಸೋಮನಿಂಗ ಮಾಳಿ ಹಾಘೂ ಇಂಡಿಯ ಕೂಡಗಿ ಗ್ರಾಮದ ಪ್ರವೀಣ ಅಶೋಕ ಮೈನಳ್ಳಿ ಎಂಬುವರನ್ನು ಬಂಧಿಸಿ ಕುರಿ ಹಾಗೂ ಕೃತ್ಯಕ್ಕೆ ಬಳಸಿದ ವಾಹನ ಸೇರಿ 38,45,000 ರೂ.ಮೌಲ್ಯದ ಸಾಮಗ್ರಿ ವಶಕ್ಕೆ ಪಡೆದಿರುವುದಾಗಿ ಎಸ್‌ಪಿ ನಿಂಬರಗಿ ವಿವರಿಸಿದರು.

ಎಎಸ್‌ಪಿ ರಾಮನಗೌಡ ಹಟ್ಟಿ, ಇಂಡಿ ಡಿಎಸ್‌ಪಿ ಸದಾಶಿವ ಕಟ್ಟೀಮನಿ ಇತರರು ಇದ್ದರು.