‘ಶರಣರ ಕಗ್ಗೊಲೆ’ ಅಧ್ಯಯನವಾಗಬೇಕು, ತರ್ಕಕ್ಕೆ ಹಚ್ಚಿದ ಬಿಜೆಪಿ ಮುಖಂಡರ ಜಂಟಿ ಹೇಳಿಕೆ

‘ಬಸವಣ್ಣನವರು ಕಾಯಕ ಸಮಾಜಗಳನ್ನು ಒಗ್ಗೂಡಿಸದರಷ್ಟೇ, ಅವರು ಮೇಲು-ಕೀಳು ತಾರತಮ್ಯದ ವಿರುದ್ಧ ಧ್ವನಿ ಎತ್ತಿದರು, ಕಲ್ಯಾಣದ ಕ್ರಾಂತಿ ಕೇವಲ ವೈಚಾರಿಕವಾಗಿದ್ದು ಲಿಂಗಾಯತ ಕೂಡ ಹಿಂದೂ ಧರ್ಮದ ಭಾಗವೇ. ಬಸವಣ್ಣ ಹೇಳಿದ್ದಲ್ಲವೂ ವೇದೋಪನಿಷತ್‌ಗಳಲ್ಲಿದೆ. ಹೀಗಾಗಿ ಬಸವಣ್ಣನವರ ಹೆಸರು ಬಂಡವಾಳ ಮಾಡಿಕೊಳ್ಳಲು ಹೊರಟಿರುವವರನ್ನು ಕನ್ಹೇರಿ ಶ್ರೀಗಳು ‘ಬಸವ ತಾಲಿಬಾನಿಗಳು’ ಎಂದಿದ್ದಾರೆ ವಿನಃ ಬಸವಣ್ಣನವರ ತತ್ವವನ್ನು ವಿರೋಧಿಸಿಲ್ಲವೆಂದು ಬಿಜೆಪಿ ಮುಖಂಡ ಸುರೇಶ ಬಿರಾದಾರ ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ಜೂ.28 ಕ್ಕೆ ಬಸವಕಲ್ಯಾಣದಲ್ಲಿ ಬಸವಾದಿ ಶರಣರ ಹಿಂದೂ ಸಮಾವೇಶಕ್ಕೆ ಅನುಮತಿ ನಿರಾಕರಿಸಲಾಗಿದೆ. ಈ ಹಿಂದೆ ವಿಜಯಪುರದಲ್ಲಿಯೂ ನಿರಾಕರಿಸಲಾಗಿತ್ತು. ವಿಜಯಪುರದಿಂದಲೇ ಇದು ಆರಂಭಗೊಂಡಿದೆ. ಕಾಂಗ್ರೆಸ್‌ನವರು ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನೇ ಬುಡಮೇಲು ಮಾಡಲು ಹೊರಟಿದ್ದಾರೆ. ಬಬಲೇಶ್ವರ, ಶಹಾಪುರ, ಗದಗ ಮುಂತಾದ ಭಾಗಗಲ್ಲಿ ಬಸವಾದಿ ಶರಣರ ಹಿಂದೂ ಸಮಾವೇಶ ಅರ್ಥಪೂರ್ಣವಾಗಿಯೇ ಜರುಗಿದೆ. ಅಭೂತಪೂರ್ವ ಬೆಂಬಲ ದೊರಕಿದೆ. ಹೀಗಾಗಿ ಬಸವಕಲ್ಯಾಣದಲ್ಲಿಯೂ ಶಾಂತಿಯುತವಾಗಿಯೇ ನೆರವೇರುತ್ತಿತ್ತು. ಆದರೆ, ಕೋಮುಗಲಭೆ ಹೆಸರಲ್ಲಿ ಅನುಮತಿ ನಿರಾಕರಿಸಿರುವುದು ಸರಿಯಲ್ಲ ಎಂದು ಹರಿಹಾಯ್ದರು.

ಬಿಜೆಪಿ ಜಿಲ್ಲಾಧ್ಯಕ್ಷ ಗುರುಲಿಂಗಪ್ಪ ಅಂಗಡಿ ಮಾತನಾಡಿ, ಬುರುಡೆ ಗ್ಯಾಂಗ್ ಬಿಟ್ಟು ಧರ್ಮಸ್ಥಳದ ಗುರುಗಳ ತೇಜೋವಧೆ ಮಾಡುವ ಹುನ್ನಾರದ ರೀತಿಯಲ್ಲಿ ಕಾಂಗ್ರೆಸ್ ಬೆಂಬಲಿಗರು ಕನ್ಹೇರಿ ಶ್ರೀಗಳ ತೇಜೋವಧೆ ಮಾಡುವ ಪ್ರಯತ್ನ ನಡೆದಿದೆ, ಈ ರೀತಿ ಸಂತ ಮಹಾಂತರನ್ನು ಅವಮಾನಿಸುತ್ತಿರುವುದಕ್ಕೆ ಕಾಂಗ್ರೆಸ್ ಪಕ್ಷ ಮೊದಲು ಬಹಿರಂಗ ಕ್ಷಮೆಯಾಚಿಸಬೇಕು ಎಂದರು.

ಮುಖಂಡ ಮಂಜುನಾಥ ಮೀಸೆ ಮಾತನಾಡಿ, ಕನ್ಹೇರಿ ಶ್ರೀಗಳ ಬಗ್ಗೆ ಸರಿಯಾದ ಮಾಹಿತಿ ಇದ್ದರೆ ಮಾತನಾಡಿ ಅದನ್ನು ಬಿಟ್ಟು ಇಲ್ಲಸಲ್ಲದ ಮಾತು ಬೇಡ. ಆರ್‌ಎಸ್‌ಎಸ್ ಎಂದಿಗೂ ಇತರೆ ವರ್ಗವನ್ನು ಎತ್ತಿ ಕಟ್ಟುವ ಕೆಲಸ ಮಾಡಿಲ್ಲ. ಸಂಘದಲ್ಲಿ ಜಾತಿ ಇಲ್ಲ, ಅಡಿವಪ್ಪ ಸಾಲಗಲ್ಲ ಹಾಗೂ ಚೆನ್ನು ಕಟ್ಟಿಮನಿ ಅವರು ಇದನ್ನು ಅರಿಯಬೇಕು. ವ್ಯಕ್ತಿ ನಿರ್ಮಾಣ, ರಾಷ್ಟ್ರ ನಿರ್ಮಾಣ ಕೆಲಸ ಆರ್‌ಎಸ್‌ಎಸ್ ಮಾಡುತ್ತಿದೆ ಎಂದರು.

ಮುಖಂಡ ಚಿದಾನಂದ ಚಲವಾದಿ ಮಾತನಾಡಿ, ಅಡಿವೆಪ್ಪ ಸಾಲಗಲ್ಲ ಹಾಗೂ ಚನ್ನು ಕಟ್ಟಿಮನಿ ಅವರು ಹಿಂದೂ ದೇವರನ್ನು ಅವಮಾನಿಸುತ್ತಾರೆ. ಅವರು ಸಹ ದೇವರ ಜಾತ್ರೆ ಮಾಡುತ್ತಾರೆ. ಆದರೂ ಕನ್ಹೇರಿ ಶ್ರೀಗಳ ಬಗ್ಗೆ ಮಾತನಾಡುತ್ತಾರೆ. ಕನ್ಹೇರಿ ಮಠದಲ್ಲಿ ಇಬ್ಬರು ದಲಿತರೇ ಪ್ರಮುಖ ಆಡಳಿತ ನೋಡಿಕೊಳ್ಳುತ್ತಾರೆ. ದಲಿತ ಮಕ್ಕಳೂ ಅಲ್ಲಿ ಕಲಿಯುತ್ತಾರೆ. ಬೇಕಾದರೆ ಚೆನ್ನು ಹಾಗೂ ಅಡಿವೆಪ್ಪ ಟೀಂ ಹೋಗಿ ನೋಡಿಕೊಂಡು ಬರಲಿ. ದಲಿತರಾದ ಮಾತ್ರಕ್ಕೆ ಏನು ಬೇಕಾದರೂ ಮಾತನಾಡಬಹುದೆಂದಿದ್ದರೆ ಸರಿಯಲ್ಲ ಎಂದರು.

ಬಿಜೆಪಿ ಮಾಧ್ಯಮ ಪ್ರಮುಖ ವಿಜಯ ಜೋಷಿ ಇದ್ದರು.