ಬಸವೇಶ್ವರ-ಅಕ್ಕಮಹಾದೇವಿ ಅವಹೇಳನ

ರಮಾಕಾಂತ ಎಂ. ಎಂಬಾತನ ಫೆಸ್‌ಬುಕ್ ಖಾತೆಯಲ್ಲಿ ಮಹಾತ್ಮ ಬಸವೇಶ್ವರ ಹಾಗೂ ಅಕ್ಕಮಹಾದೇವಿ ಕುರಿತು ಅಶ್ಲೀಲವಾಗಿ ಬರೆದು ಅವಮಾನಿಸಲಾಗಿದೆ. ಈ ಕುರಿತು ಈಗಾಗಲೇ ಬಸವನಬಾಗೇವಾಡಿ ಪೊಲೀಸ್ ಠಾಣೆಯಲ್ಲಿ ಎಫ್ಐ‌ಆರ್ ದಾಖಲಿಸಲಾಗಿದ್ದು, ಗುರುವಾರ ಜಿಲ್ಲಾಡಳಿತದ ಮೂಲಕ ಗೃಹ ಸಚಿವರಿಗೆ ಮನವಿ ಕೂಡ ಸಲ್ಲಿಸಲಾಯಿತು.

ಮುಖಂಡ ಅರವಿಂದ ಕುಲಕರ್ಣಿ ಹಾಗೂ ಮಾನವ ಬಂಧುತ್ವ ವೇದಿಕೆಯ ಜಿಲ್ಲಾ ಸಂಚಾಲಕ ಪ್ರಭುಗೌಡ ಪಾಟೀಲ ಮಾತನಾಡಿ, ಸಾಮಾಜಿಕ ಸಮಾನತೆಯ ಕನಸು ಕಂಡ ಕ್ರಾಂತಿಕಾರಿ ಮನಸ್ಸುಳ್ಳ ೧೨ನೇ ಶತಮಾನದ ಮಹಾ ಮಾನವತಾವಾದಿ ವಿಶ್ವಗುರು ಬಸವಣ್ಣನವರು ಹಾಗೂ ಶರಣೆ, ವೈರಾಗ್ಯ ನಿಧಿ ಅಕ್ಕಮಹಾದೇವಿ ಕುರಿತು ರಮಾಕಾಂತ ಎಂ. ಎಂಬ ವ್ಯಕ್ತಿ ಕೀಳುಮಟ್ಟದ ಅಶ್ಲೀಲ ಭಾಷೆಯಿಂದ ಬರೆದು ಜಾಲತಾಣದಲ್ಲಿ ಹರಿಬಿಟ್ಟಿದ್ದಾನೆ.

ಇದನ್ನು ಗೀತಾ ಎಂ. ಹಿರೋಳಿ ಎಂಬ ಮಹಿಳೆ ಫೆಸ್‌ಬುಕ್ ನೋಡಿ ಹಂಚಿಕೊಂಡಿದ್ದಾರೆ. ಅದರಲ್ಲಿ ಬರೆದ ಭಾಷೆ ಅತಿ ಕೀಳುಮಟ್ಟದಿಂದ ಕೂಡಿದೆ. ಇದರಿಂದ ಬಸವಾಭಿಮಾನಿಗಳ ಮನಸ್ಸಿಗೆ ನೋವುಂಟಾಗಿದೆ ಎಂದು ತಿಳಿಸಿದರು.

ರಮಾಕಾಂತ ಎಂ. ಎಂಬ ಹೆಸರಿನ- ಫೆಸ್‌ಬುಕ್ ಬಳಕೆದಾರನು ಸಾಮಾಜಿಕ ಜಾಲತಾಣವನ್ನು ದುರುಪಯೋಗ ಪಡಿಸಿಕೊಂಡಿದ್ದಾನೆ. ಆ ಮೂಲಕ ಒಂದು ಸಮುದಾಯ, ಜನಾಂಗದ ಧರ್ಮ ಮತ್ತು ಧಾರ್ಮಿಕ ಭಾವನೆಗಳಿಗೆ ಧಕ್ಕೆಯನ್ನುಂಟು ಮಾಡಿದ್ದಾನೆ. ಆತನ ಮೇಲೆ ಕೂಡಲೇ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದರು.

ಜಾಗತಿಕ ಲಿಂಗಾಯತ ಮಹಾಸಭಾದ ಅಧ್ಯಕ್ಷ ಬಸನಗೌಡ ಹರನಾಳ, ಭೋಗೇಶ ಸೋಲಾಪುರ, ಶಿವಾನಂದ ಬಿರಾದಾರ, ಶಿವಪ್ಪ ಮಾಳಗೊಂಡ, ಅಪ್ಪಾಸಾಹೇಬ ಶೇನಖೇಡ, ಅಡಿವೆಪ್ಪ ಸಾಲಗಲ್ಲ, ಚಂದ್ರಶೇಖರ ಘಂಟೆಪ್ಪಗೋಳ, ಮಹಾದೇವ ಬನಸೋಡೆ, ಕಿರಣ ಮೇಲಿನಕೇರಿ, ಎನ್.ಕೆ. ಕುಂಬಾರ, ಶ್ರೀನಿವಾಸ ರಾಜಗೋಪಾಲ ಶಹಾಪೂರ, ಮಲ್ಲಿಕಾರ್ಜುನ ಬಟಗಿ, ಶಶಿಕಲಾ ಕೊಟಗಿ, ವಿದ್ಯಾರಾಣಿ ತುಂಗಳ, ಸವಿತಾ ವಗ್ಗರ, ಸಂಗೀತಾ ಪೂಜಾರಿ, ರಾಜೇಶ್ವರಿ ಚೋಳಕೆ ಮತ್ತಿತರರಿದ್ದರು.