ದೇಶ ಆಳಲು ಬಾರದವರು ವಿಶ್ವಗುರುವೇ? ಪ್ರಧಾನಿ ಮೋದಿ ವಿರುದ್ಧ ಶಾಸಕ ಯಶವಂತರಾಯಗೌಡ ಪಾಟೀಲ ವಾಗ್ದಾಳಿ

ದೇಶವನ್ನು ನಿಭಾಯಿಸಲಾಗದವರು ವಿಶ್ವ ಗುರು ಆಗಲು ಸಾಧ್ಯವೇ ಎಂದ ಅವರು, ಕರೋನಾ ಸಮಯದಲ್ಲಿ ದೀಪ ಹಚ್ಚಿ ಅಂದರು. ವಿಜ್ಞಾನ ಯುಗದಲ್ಲೂ ಆ ಕಾಲಕ್ಕೆ ಹೊರಟಿರಿ ಎಂದರೆ ಏನು ಹೇಳೋದು? ನೋಟು ಅಮಾನ್ಯೀಕರಣ ಸಮಯದಲ್ಲಿಯೂ ಇಂಥದ್ದೇ ಹೇಳಿಕೆ ಪುನರಾವರ್ತನೆಯಾಯಿತು. ಇದೀಗ ಎರಡು ದಿನದಿಂದ ಪ್ರಧಾನಿ ಮೋದಿ ನೀಡುತ್ತಿರುವ ಹೇಳಿಕೆ ಏಕೋ ಸರಿಯಲ್ಲ ಎಂದರು.

ದೇಶದಲ್ಲಿ ಅಘೋಷಿತ ತುರ್ತು ಪರಿಸ್ಥಿತಿ ಇದೆ. ಈ ಮಾತು ಸ್ವತಃ ಎಲ್.ಕೆ. ಅದ್ವಾನಿಯವರೇ ಹೇಳಿದ್ದಾರೆ. ಸಾಂವಿಧಾನಿಕ ಸಂಸ್ಥೆಗಳನ್ನು ದುರಪಯೋಗಪಡಿಸಿಕೊಂಡು ರಾಜ್ಯವನ್ನು ಆಳುವ ಪ್ರಯತ್ನ ನಡೆಯುತ್ತಿದೆ, ಐಟಿ-ಇಡಿ ಮೊದಲಾದವುಗಳ ದುರಪಯೋಗ ಆದರೆ ದೇಶ ಎತ್ತ ಸಾಗಬೇಕು? ಎಂದ ಶಾಸಕರು, ನಿಮ್ಮಲ್ಲಿ ಆರ್ಥಿಕತೆ ನಿಭಾಯಿಸುವ ಸಾಮರ್ಥ್ಯ ಇಲ್ಲದೇ ಇದ್ದರೆ ಬಿಡಬೇಕು. ಆದರೂ ಅಂಧ ಭಕ್ತರು ವಿಶ್ವಗುರು ಎನ್ನುತ್ತಾರೆ. ದೇಶವನ್ನೇ ನಡೆಸಲಾಗದವರು ಎಂಥ ವಿಶ್ವ ಗುರು ಎಂದರು.

ವಿವೇಕದಿಂದ ದೇಶ ಆಳಬೇಕು. ಜನರಲ್ಲಿ ಭಯ ಹುಟ್ಟಿಸಬಾರದು. ನಾಲ್ಕೈದು ರಾಜ್ಯಗಳಲ್ಲಿ ಚುನಾವಣೆ ಇದ್ದಾಗ ಮಹಿಳಾ ಮೀಸಲಾತಿ ಬಗ್ಗೆ ಮಾತನಾಡುತ್ತಾರೆ. ಇದು ಚುನಾವಣೆ ನೀತಿ ಸಂಹಿತೆಯ ಉಲ್ಲಂಘನೆಯಲ್ಲವೇ? ಪ್ರಧಾನಮಂತ್ರಿಗಳ ಕಚೇರಿ ಚುನಾವಣೆ ಕೇಂದ್ರಿತವಾಗಬಾರದು, ಚುನಾವಣಾ ಆಯೋಗಕ್ಕೆ ಜೀವವೇ ಇಲ್ಲದಂತಾಗಿದೆ ಎಂದರು.

ಮಹಾತ್ಮ ಗಾಂಧಿ ಉದ್ಯೋಗ ಖಾತ್ರಿ ಯೋಜನೆಯನ್ನೇ ಕೊಂದರು. ಇದೀಗ ಚಿನ್ನ ಖರೀದಿಸಬೇಡಿ, ನಡೆದುಕೊಂಡು ಹೋಗಿ ಎಂದಿರುವ ಪ್ರಧಾನಿ ಹೇಳಿಕೆ ಜನರಲ್ಲಿ ಅಭದ್ರತೆ ಮತ್ತು ಭಯ ಮೂಡಿಸಿದೆ ಎಂದರು.

ರಾಜ್ಯದಲ್ಲಿ ಸಿಎಂ-ಡಿಸಿಎಂ ಬದಲಾವಣೆ ಕೇವಲ ಮಾಧ್ಯಮ ಸೃಷ್ಠಿ ಎಂದ ಶಾಸಕ ಯಶವಂತರಾಯಗೌಡ ಪಾಟೀಲರು, ಇನ್ನು ಉಳಿದಿರೋದು ಕೇವಲ ಎರಡು ವರ್ಷ. ಇಂಥ ಸಂದರ್ಭದಲ್ಲಿ ಸಚಿವ ಸಂಪುಟ ವಿಸ್ತರಣೆಯಾಗಬೇಕು ಎಂಬುದು ಹಿರಿಯರ ಬೇಡಿಕೆ, ಆದರೆ ಇನ್ನುಳಿದಿರುವುದೇ ಎರಡು ವರ್ಷದ ಅವಧಿ. ಈಗ ಸಚಿವ ಸ್ಥಾನ ತೆಗೆದುಕೊಂಡು ಏನು ಮಾಡುವುದು ಎಂಬ ಉದಾಸೀನತೆ ಹೊರಹಾಕಿದರು.

ಸಚಿವ ಸಂಪುಟ ವಿಸ್ತರಣೆ ಹೈಕಮಾಂಡ್‌ಗೆ ಕೇಳಬೇಕಾದ ಪ್ರಶ್ನೆ, ಅಭಿವೃದ್ಧಿ ವಿಷಯವಾಗಿ ನವದೆಹಲಿಗೆ ಹೋಗಿದ್ದೆವು; ಮಂತ್ರಿ ಮಂಡಳ ವಿಷಯವಾಗಿ ಅಷ್ಟೇ ಅಲ್ಲ. ಮಾಧ್ಯಮಗಳಲ್ಲಿ ಅಭಿವೃದ್ಧಿ ವಿಷಯವಾಗಿ ಭೇಟಿಯಾದ ಬಗ್ಗೆ ಚರ್ಚೆಯೇ ಆಗುವುದಿಲ್ಲ, ರಾಜಕೀಯ ವಿಷಯವೇ ಪ್ರಧಾನವಾಗಿ ಬಿಂಬಿತವಾಗುತ್ತದೆ ಎಂದರು.