ವಿಜಯಪುರ: ಇಲ್ಲಿನ ಶ್ರೀ ಸಿದ್ಧೇಶ್ವರ ದೇವಾಲಯದ ಎದುರು ಜಮಾಯಿಸಿದ ಸಹಸ್ರಾರು ಸಂಖ್ಯೆಯ ಭಕ್ತಾದಿಗಳ ಸಮ್ಮುಖದಲ್ಲಿ ಶ್ರೀ ಸಿದ್ಧೇಶ್ವರ-ಕುಂಬಾರ ಕನ್ಯೆ ಗುಂಡವ್ವಳಿಗೆ ಅಕ್ಷತಾರ್ಪಣೆ ಮಾಡಿ ಭಕ್ತಿ ಭಾವದಲ್ಲಿ ಮಿಂದೆದ್ದರು.
ನಾಡಿನ ಸುಪ್ರಸಿದ್ಧ ಜಾತ್ರಾ ಮಹೋತ್ಸವವಾಗಿರುವ ಶ್ರೀಸಿದ್ಧೇಶ್ವರ ಜಾತ್ರೆಯಲ್ಲಿ ಮಂಗಳವಾರ ನಡೆದ ‘ಅಕ್ಷತಾರ್ಪಣೆ ಭೋಗಿ’ ಕಾರ್ಯಕ್ರಮ ತನ್ನದೇ ಆದ ವಿಶಿಷ್ಟತೆ ಪಡೆದುಕೊಂಡಿತ್ತು.
ಶ್ರೀ ಶಿವಯೋಗಿ ಸಿದ್ಧರಾಮೇಶ್ವರ ಚರಿತ್ರೆ ಓದುವ ಮೂಲಕ ಅಕ್ಷತಾರ್ಪಣೆ ಕಾರ್ಯಕ್ರಮ ನೆರವೇರಿಸಲಾಯಿತು. ಸಂಪ್ರದಾಯದಂತೆ ಬಸನಗೌಡ ಪಾಟೀಲ ಯತ್ನಾಳ ಕುಟುಂಬ ವರ್ಗದವರ ನೇತೃತ್ವದಲ್ಲಿ ಅಕ್ಷತಾರ್ಪಣೆ -ಬೋಗಿ ಕಾರ್ಯಕ್ರಮ ಸಂಭ್ರಮದಿಂದ ನೆರವೇರಿತು.
ಅಕ್ಷತೆಯ ವಿಧಿ ವಿಧಾನದ ಕಾರ್ಯಕ್ರಮವನ್ನು ವೇದಮೂರ್ತಿ ಮುರಗಯ್ಯ ಸಂಗನಬಸಯ್ಯ ಗಚ್ಚಿನಮಠ, ಸಂಗಯ್ಯ ಹಿರೇಮಠ, ಮಲ್ಲಯ್ಯ ಪೂಜಾರಿ, ಸಂದಾನಂದ ಪೂಜಾರಿ, ಸಚಿನ ಹಿರೇಮಠ, ನೀಲಕಂಠಯ್ಯ ಪೂಜಾರಿ ಮೊದಲಾದವರು ಶಾಸೋಕ್ತವಾಗಿ ನೆರವೇರಿಸಿದರು.
ನಾಡಿನ ವಿವಿಧೆಡೆ ಭೋಗಿಯ ದಿನ ಸುಮಂಗಲಿಯರು ಹೊಸ ಬೆಳೆ, ತರಕಾರಿ, ಕೊಬ್ಬರಿ ಎಣ್ಣೆ, ಬೆಣ್ಣೆ, ತುಪ್ಪ, ಸೀರೆ-ಕುಪ್ಪಸ ಸಹಿತವಾಗಿ ಬಾಗಿನ ನೀಡುವ ಸಂಪ್ರದಾಯವಿದೆ. ಕುಂಬಾರ ಗುಂಡವ್ವಳ ಮದುವೆ ನಂತರ ಸಂಪ್ರದಾಯದಂತೆ ಈ ಬಾರಿಯೂ ಸುಮಂಗಲಿಯರು ಪರಸ್ಪರ ಅರಿಷಿಣ-ಕುಂಕುಮ ನೀಡಿದರು.
ಬಸಯ್ಯ ಎಸ್. ಹಿರೇಮಠ, ಸದಾನಂದ ದೇಸಾಯಿ, ಸದಾಶಿವ ಗುಡ್ಡೋಡಗಿ, ಎಸ್. ಎಚ್. ನಾಡಗೌಡ, ಗುರು ಗಚ್ಚಿನಮಠ, ಮಹಾದೇವ ಹತ್ತಿಕಾಳ, ಬಾಗಪ್ಪ ಕನ್ನೋಳ್ಳಿ, ಎಸ್. ಸಿ. ಉಪ್ಪಿನ, ಎಸ್. ಎಚ್. ನಾಡಗೌಡ, ಶರಣು ಸಬರದ, ಬಸು ಗಣಿ, ಪ್ರವೀಣ ಬಿಜ್ಜರಗಿ, ಶಶಿಕಾಂಥ ಮುದಕಾಮಠ, ವಿರೇಶ ಮುದಕಾಮಠ, ಉಮೇಶ ವಂದಾಲ, ಶಿವಾನಂದ ಭುಯ್ಯರ ಇನ್ನಿತರರು ಪಾಲ್ಗೊಂಡಿದ್ದರು.
