ವಿಜಯಪುರ: ಯೂಕ್ರೇನ್ ವಿರುದ್ಧ ರಷ್ಯಾ ಯುದ್ಧ ಸಾರಿದ ಹಿನ್ನೆಲೆಯಲ್ಲಿ ಈಗ ಜಗತ್ತಿನಾದ್ಯಂತ ಆತಂಕದ ಕಾರ್ಮೋಡ ಆವರಿಸಿದೆ. ವಿಜಯಪುರ ಜಿಲ್ಲೆ ಏಳು ಜನರು ಯೂಕ್ರೇನ್ನಲ್ಲಿ ನೆಲೆಸಿದ್ದು, ಅವರ ಪಾಲಕರಲ್ಲಿ ತಳಮಳ ಉಂಟು ಮಾಡಿದೆ.ತಾಳಿಕೋಟೆ ತಾಲೂಕಿನ ತಮದಡ್ಡಿ ಗ್ರಾಮದ ಸುಚಿತ್ರಾ ಮಲ್ಲನಗೌಡ ಕವಡಿಮಟ್ಟಿ ಸೇರಿದಂತೆ ಏಳು ಜನರು ಯೂಕ್ರೇನ್ನಲ್ಲಿ ಇದ್ದಾರೆ. ಬಹುತೇಕರು ಎಂಬಿಬಿಎಸ್ ವ್ಯಾಸಂಗ ಮಾಡುತ್ತಿದ್ದಾರೆ. ಡಿಸಿಸಿ ಬ್ಯಾಂಕ್ ನೌಕರ ಮಲ್ಲನಗೌಡ ಕವಡಿಮಟ್ಟಿ ಅವರ ಪುತ್ರಿ ಸುಚಿತ್ರಾ ಎಂದು ತಿಳಿದು ಬಂದಿದೆ. ಇನ್ನುಳಿದಂತೆ ಹಿರಿಯ ಪತ್ರಕರ್ತ ಅಲ್ಲಮಪ್ರಭು ಮಲ್ಲಿಕಾರ್ಜುನಮಠ ಹಾಗೂ ಬೆಂಗಳೂರಿನ ಬಿಎಂಎಸ್ಟಿ ಕಾಲೇಜಿನ ಕಂಪ್ಯೂಟರ್ ವಿಭಾಗದ ಮುಖ್ಯಸ್ಥೆ ಡಾ.ಭುವನೇಶ್ವರಿ ಅವರ ಪುತ್ರಿ ವಿವಿಧಾ ಅಲ್ಲಮಪ್ರಭು ಮಲ್ಲಿಕಾರ್ಜುನಮಠ ಅವರು 3ನೇ ವರ್ಷದ ಎಂಬಿಬಿಎಸ್ ವ್ಯಾಸಂಗ ಮಾಡುತ್ತಿದ್ದಾರೆ. ಅವರಲ್ಲದೆ ಜಿಲ್ಲೆಯ ಶ್ರದ್ಧಾ ದುಂಡಪ್ಪ ನಾಯ್ಕರ, ಪೂಜಾ ರಮೇಶ ಲೋಣಿ, ಅಮನ್ ಮಮದಾಪುರ, ರಕ್ಷಾ ಶಿವಪ್ಪ ಕಂಭಾಗಿ ಹಾಗೂ ಪ್ರೀತಿ ನಾಡಗೌಡ ಅವರು ಯೂಕ್ರೇನ್ನಲ್ಲಿ ನೆಲೆಸಿದ್ದಾರೆ. ಬಹುತೇಕರು ವೈದ್ಯಕೀಯ ವ್ಯಾಸಂಗಕ್ಕಾಗಿ ತೆರಳಿದ್ದಾರೆ.
