ಆಲಮೇಲದಲ್ಲಿ ಪಟ್ಟಣಕ್ಕೆ ಹೊಂದಿಕೊಂಡಂತೆ 178 ಎಕರೆ ಜಾಗ ಮೀಸಲಿದೆಯಾದರೂ ಯಾವುದೇ ಮೂಲ ಸೌಕರ್ಯಗಳಿಲ್ಲ. ಇದೇ ಕಾರಣಕ್ಕೆ ಪ್ರವೇಶ ಪ್ರಕ್ರಿಯೆ ನಡೆಯಲಿಲ್ಲ. ಆದರೆ, ತಿಡಗುಂದಿಯಲ್ಲಿ ಅವಶ್ಯಕವಿರುವ ಕಟ್ಟಡ, ಪ್ರಯೋಗಾಲಯ ಮತ್ತಿತರ ಮೂಲ ಸೌಲಭ್ಯಗಳಿವೆ. ಸಂಶೋಧನಾ ಕೇಂದ್ರವು ವಿಜಯಪುರ- ಸೊಲ್ಲಾಪುರ ರಾಷ್ಟ್ರೀಯ ಹೆದ್ದಾರಿ (ಎನ್ಎಚ್-52)ಗೆ ಹೊಂದಿಕೊಂಡು ಮಹಾನಗರದಿಂದ ಕೇವಲ 12 ಕಿ.ಮೀ. ಅಂತರದಲ್ಲಿದೆ.
ಆಲಮೇಲದಲ್ಲಾದರೆ ಸಿಬ್ಬಂದಿ ಸಂಬಳ, ಪ್ರಯೋಗಾಲಯ, ಕಾಲೇಜು ಕಟ್ಟಡ, ಗ್ರಂಥಾಲಯ, ವಿದ್ಯಾರ್ಥಿ ವಸತಿ ನಿಲಯ, ಸಾರಿಗೆ, ಯಂತ್ರೋಪಕರಣ ಸೇರಿ ಮತ್ತಿತರ ಸೌಲಭ್ಯ ಒದಗಿಸಲು 8415 ಲಕ್ಷ ರೂ. ಬೇಕು. ತಿಡಗುಂದಿಯಲ್ಲಾದರೆ ಕೇವಲ 3493 ಲಕ್ಷ ರೂ. ಸಾಕಾಗಲಿದೆ. ತಿಡಗುಂದಿಯಲ್ಲಿ ಈಗಾಗಲೇ ಅಗತ್ಯವಿರುವ ಗ್ರಂಥಾಲಯ, ಬೋಧನಾ ಕೊಠಡಿ, ಕ್ರೀಡಾಂಗಣ, ಬೆಳೆ ತಾಕುಗಳು, ಪ್ರಯೋಗಾಲಯ, ಸಾರಿಗೆ ಹೀಗೆ ಸಕಲ ಸೌಲಭ್ಯಗಳಿವೆ.
ತೋಟಗಾರಿಕೆ ಬೆಳೆಗೆ ಹೆಸರಾದ ವಿಜಯಪುರ ಜಿಲ್ಲೆಯ ರೈತರ ಹಾಗೂ ವಿದ್ಯಾರ್ಥಿಗಳ ಅನುಕೂಲಕ್ಕಾಗಿ ಕಾಲೇಜು ಅವಶ್ಯಕತೆ ಇದ್ದು, ಅದನ್ನು ಆಲಮೇಲಗಿಂತ ತಿಡಗುಂದಿಯಲ್ಲಿ ಸ್ಥಾಪಿಸುವುದೇ ಒಳಿತು ಎಂಬುದು ಸರ್ವರ ಅಭಿಪ್ರಾಯ. ಈ ನಿಟ್ಟಿನಲ್ಲಿ ಬಿಜೆಪಿ ಸರ್ಕಾರ ಯಾವ ನಿರ್ಧಾರ ತೆಗೆದುಕೊಳ್ಳುತ್ತದೋ ಕಾದು ನೋಡಬೇಕು.
