ವಿಜಯಪುರದಲ್ಲಿನ ಬಿಸಿಲು, ಹವಾಮಾನ ಹಾಗೂ ವಾತಾವರಣ ದ್ರಾಕ್ಷಿ ಬೆಳೆಯಲು ಪೂರಕವಾಗಿದ್ದು, ಇಲ್ಲಿ ನಂಬರ್ ಒನ್ ಒಣದ್ರಾಕ್ಷಿ ತಯಾರಾಗುತ್ತದೆಯಲ್ಲದೇ, ವಿದೇಶಗಳಿಗೂ ರಫ್ತಾಗುತ್ತದೆ. ಜಿಲ್ಲೆಯಲ್ಲಿ ಲಕ್ಷಕ್ಕೂ ಅಧಿಕ ದ್ರಾಕ್ಷಿ ಬೆಳೆಗಾರರಿದ್ದು, ಸುಮಾರು 15 ಸಾವಿರ ಹೆಕ್ಟೆರ್ ಪ್ರದೇಶದಲ್ಲಿ ದ್ರಾಕ್ಷಿ ಬೆಳೆಯಲಾಗುತ್ತಿದೆ. ಸರಿಸುಮಾರು ವಾರ್ಷಿಕ ಎರಡು ಸಾವಿರ ಕೋಟಿ ರೂ. ನಷ್ಟು ವಹಿವಾಟು ನಡೆಯುತ್ತದೆ. ಆದರೆ ಸೂಕ್ತ ಮಾರುಕಟ್ಟೆ ವ್ಯವಸ್ಥೆ ಇಲ್ಲದ ಕಾರಣ ಕೇವಲ ಬೆರಳೆಣಿಕೆಯಷ್ಟು ಏಜೆಂಟರು ರೈತರಿಂದ ಕಡಿಮೆ ಬೆಲೆಗೆ ಒಣದ್ರಾಕ್ಷಿ ಖರೀದಿಸಿ, ನಂತರ ವಿವಿಧೆಡೆ ವಹಿವಾಟು ನಡೆಸುವ ಮೂಲಕ ಶೇ. 40ರಷ್ಟು ಹೆಚ್ಚಿನ ಲಾಭಾಂಶ ಪಡೆಯುತ್ತಾರೆ ಎಂಬ ಅಂದಾಜಿದೆ ಎನ್ನುತ್ತಾರೆ ದ್ರಾಕ್ಷಿ ಬೆಳೆಗಾರರಾದ ಕೆ.ಎಚ್. ಭೂಮರೆಡ್ಡಿ.
ಹೀಗಾಗಿಯೇ ಒಣ ದ್ರಾಕ್ಷಿ ಮಾರಾಟಕ್ಕೆ ಆನ್ಲೈನ್ ವ್ಯವಸ್ಥೆ ಮಾಡಬೇಕು ಎಂದು ನಿರ್ಧರಿಸಿ ನಗರದ ಕೇಂದ್ರ ಪ್ರದೇಶದಲ್ಲಿಯೇ ಆನ್ಲೈನ್ ಮಾರಾಟಕ್ಕೆ ಸೂಕ್ತವಾದ ಕಟ್ಟಡ, ವ್ಯವಸ್ಥೆ ಮಾಡಿದ್ದರೂ ಕೆಲವು ಪಟ್ಟಭದ್ರ ಹಿತಾಸಕ್ತಿಗಳ ಕೈವಾಡದಿಂದಾಗಿ ಆನ್ಲೈನ್ ವಹಿವಾಟಿಗೆ ನಿರಂತರ ಚಾಲನೆಯೇ ಸಿಗದಿರುವಂತೆ ಮಾಡಿದ್ದಾರೆ. ಇದರ ಪರಿಣಾಮ ಕಷ್ಟ ಪಟ್ಟು ದ್ರಾಕ್ಷಿ ಬೆಳೆದ ಬೆಳೆಗಾರರ ಪಾಲಿಗೆ ಸಿಹಿಯಾದ ಒಣದ್ರಾಕ್ಷಿ ‘ಹುಳಿ’ಯಾಗಿರುವುದು ನಗ್ನಸತ್ಯ.
ಅತೀ ಶೀಘ್ರದಲ್ಲಿ ಒಣದ್ರಾಕ್ಷಿ ಆನ್ಲೈನ್ ಮಾರ್ಕೆಟ್ ಆರಂಭಿಸಬೇಕು ಹಾಗೂ ವಿಜಯಪುರದಲ್ಲೇ ದ್ರಾಕ್ಷಿ ನಿಗಮ ಮಂಡಳಿ ನಿರ್ಮಿಸಬೇಕು ಎಂದು ದ್ರಾಕ್ಷಿ ಬೆಳೆಗಾರರು ಒತ್ತಾಯಿಸಿದ್ದಾರೆ. ದಶಕದಿಂದ ತುಕ್ಕು ಹಿಡಿದ ಮಾರುಕಟ್ಟೆಗೆ ಚಾಲನೆ ಸಿಗುವುದೇ ಎಂಬುದನ್ನು ಕಾದು ನೋಡಬೇಕಿದೆ.
