ನದಿಯಲ್ಲಿ ನೀರಿನ ಮಟ್ಟ ಕುಸಿಯುತ್ತಿರುವುದರಿಂದ ಹಿನ್ನೀರಿಗೂ ಬರ ಬಂದೊದಗಲಿದೆ. ಪಟ್ಟಣ ಸೇರಿ ಕೂಡ್ಲಿಗಿ ಮತ್ತು ಕೊಟ್ಟೂರು ಪಟ್ಟಣಗಳಿಗೆ ಬನ್ನಿಗೋಳದ ಹತ್ತಿರ ತುಂಗಭದ್ರಾ ನದಿಯ ಹಿನ್ನೀರಿನ ವ್ಯಾಪ್ತಿಯಲ್ಲಿ ಜಾಕ್ವೆಲ್ ಮಾಡಿಸಿದ್ದು, ಇಲ್ಲಿಂದ ಪಂಪ್ ಮಾಡಿ ಪಟ್ಟಣದ ನೀರು ಶುದ್ಧೀಕರಣ ಘಟಕಕ್ಕೆ ಪೂರೈಕೆ ಮಾಡಲಾಗುತ್ತಿದೆ. ಬಳಿಕ ಶುದ್ಧೀಕರಣಗೊಂಡು ಮೂರು ಪಟ್ಟಣಗಳಿಗೆ ಸರಬರಾಜಾಗುತ್ತಿರುವ ಕುಡಿಯುವ ನೀರಿನ ಬೃಹತ್ ಯೋಜನೆಯಾಗಿದೆ. ಇದರಿಂದ ಕುಡಿಯುವ ನೀರಿಗೆ ಬರವಿಲ್ಲದೆ ಪೂರೈಕೆಯಾಗುತ್ತಿತ್ತು. ಈಗ ತುಂಗಭದ್ರಾ ಒಡಲಿನಲ್ಲಿಯೇ ನೀರಿನ ಕುಸಿತ ಕಂಡುಬಂದು, ಕೊರತೆ ಎದುರಾಗಿದ್ದು, ಬಹುತೇಕ ಜಾಕ್ವೆಲ್ನಲ್ಲಿ ಪಂಪ್ಗಳಿಗೆ ನೀರು ಸಿಗುತ್ತಿಲ್ಲ. ಪರಿಣಾಮ ಈಗಾಗಲೇ ಪಟ್ಟಣದ ಹಲವು ವಾರ್ಡ್ಗಳಲ್ಲಿ ದಿನನಿತ್ಯದ ನೀರಿನ ಸರಬರಾಜು ವ್ಯತ್ಯಯವಾಗುತ್ತಿದೆ. ಜನರು ಕುಡಿಯುವ ನೀರಿಗೆ ಪರದಾಡುತ್ತಿರುವುದು ಕಂಡುಬರುತ್ತಿದೆ.
