ಮಂಜುನಾಥ ಅಯ್ಯಸ್ವಾಮಿ ​ಹೊಸಪೇಟೆ

ಒಂದೆಡೆ ಜಿಲ್ಲಾಡಳಿತಗಳಿಂದ ಕುಡಿಯಲು ಮಾತ್ರ ನೀರು ವಾರ್ನಿಂಗ್... ಇನ್ನೊಂದೆಡೆ ಪ್ರಕೃತಿಯ ಕೃಪಾಕಟಾಕ್ಷ! ಕಂಗಾಲಾಗಿದ್ದ ತುಂಗಭದ್ರಾ ಜಲಾಶಯ ಅಚ್ಚುಕಟ್ಟು ಪ್ರದೇಶದ ರೈತರಿಗೆ ಮೊದಲ ಬೆಳೆಗೆ ಮರುಜೀವ ನೀಡಲು ಭೋರ್ಗರೆದು ಧುಮುಕುತ್ತಿದ್ದಾನೆ ಮಳೆರಾಯ!

ಕುಡಿಯುವ ನೀರಿಗೆ ಮಾತ್ರ ಜಲಾಶಯದ ನೀರು ಎಂದಿದ್ದ ಜಿಲ್ಲಾಡಳಿತಗಳಿಗೆ ಪ್ರಕೃತಿಯೇ ಉತ್ತರ ಕೊಟ್ಟಂತಿದೆ. ಮಲೆನಾಡು ಭಾಗದಲ್ಲಿ ಮಳೆರಾಯ ಮತ್ತೆ ಅಬ್ಬರಿಸಿ ಬೊಬ್ಬೆಯಿರಿಯುತ್ತಿದ್ದು, ನದಿ-ನಾಲೆಗಳು ಮೈದುಂಬಿ ಹರಿಯುತ್ತಿವೆ. ತುಂಗಾ ಜಲಾಶಯಕ್ಕೆ ಬರೋಬ್ಬರಿ 55,197 ಕ್ಯೂಸೆಕ್ ನೀರು ಒಳಹರಿವು ದಾಖಲಾಗಿದ್ದು, ಭೋರ್ಗರೆಯುವ ಕಾವೇರಿದ ನೀರನ್ನು ಹತೋಟಿಯಲ್ಲಿಡಲು 52,950 ಕ್ಯೂಸೆಕ್ ನೀರನ್ನು ನದಿಗೆ ಹರಿಸಲಾಗುತ್ತಿದೆ. ಈ ನದಿ ನೀರು ತುಂಗಭದ್ರಾ ಜಲಾಶಯಕ್ಕೆ ಹರಿದು ಬರುತ್ತಿದ್ದು, ಹರಿದು ಬರುವ ನೀರನ್ನು ಕಂಡು ರಾಜ್ಯ ಸೇರಿದಂತೆ ಆಂದ್ರ, ತೆಲಂಗಾಣ ರಾಜ್ಯಗಳದ ರೈತರಲ್ಲಿ ಹೊಸ ಆಶಾಭಾವನೆ ಚಿಗುರೊಡೆದಿದೆ. ಕೃಷಿ ಚಟುವಟಿಕೆಗಳು ಬಾರಿ ವೇಗದಲ್ಲಿ ಚುರುಕುಗೊಂಡಿವೆ. ನೀರು ಬರಿ ಕುಡಿಯೋಕೆ ಮಾತ್ರ ಅಂತ ಆಡಳಿತ ಆದೇಶ ಹೊರಡಿಸಿದರು, ಹರಿದು ಬರ್ತಿರೋ ಜೀವಜಲ ನೋಡಿ ರೈತನ ಮುಖದಲ್ಲಿ ಮಂದಹಾಸ ಮೂಡಿದೆ.

​ಇತ್ತೀಚೆಗಷ್ಟೇ ಜಿಲ್ಲಾಡಳಿತವು, ಜಲಾಶಯದಲ್ಲಿರುವ ನೀರನ್ನು ಕೇವಲ ಕುಡಿಯುವ ನೀರಿನ ಉದ್ದೇಶಕ್ಕೆ ಮಾತ್ರ ಕಾಯ್ದಿರಿಸಲಾಗುವುದು, ಕೃಷಿಗೆ ನೀರು ಹರಿಸಲು ಸದ್ಯಕ್ಕೆ ಸಾಧ್ಯವಿಲ್ಲ ಎಂದು ಸೂಚನೆ ನೀಡಿ ರೈತರ ಗಾಯದ ಮೇಲೆ ಬಿಸಿಬಿಸಿ ಖಾರದ ಪುಡಿ ಚೆಲ್ಲಿತ್ತು. ​ಬೀಜ ಬಿತ್ತಿ, ಸಸಿ ನೆಟ್ಟು ಮೊದಲ ಬೆಳೆಯ ನಿರೀಕ್ಷೆಯಲ್ಲಿದ್ದ ತ್ರಿವಳಿ ರಾಜ್ಯಗಳ ರೈತರು ಜಿಲ್ಲಾಡಳಿತಗಳ ಈ ನಿರ್ಧಾರದಿಂದ ಕಂಗಾಲಾಗಿದ್ದರು. ಆದರೆ, ಈಗ ಪ್ರಕೃತಿಯೇ ಮುನಿಸು ಮರೆತು ಜಲಧಾರೆ ಎರೆಯುತ್ತಿರುವುದು ರೈತರ ಮುಖದಲ್ಲಿ ಹರ್ಷ ತಂದಿದೆ. ನದಿಗೆ ಅಪಾರ ಪ್ರಮಾಣದ ನೀರು ಹರಿದು ಬರುತ್ತಿದ್ದಂತೆ, ಆಡಳಿತದ ಬಿಗಿ ಆದೇಶದ ನಡುವೆಯೂ ಅಚ್ಚುಕಟ್ಟು ಪ್ರದೇಶದ ರೈತರು ಮತ್ತೆ ಭೂಮಿಯತ್ತ ಹೆಜ್ಜೆ ಹಾಕಿದ್ದಾರೆ. ಜಲಾಶಯ ತುಂಬಿ ನದಿಗೆ ನೀರು ಹರಿಯುತ್ತಿರುವುದರಿಂದ ಕೆರೆ-ಕಟ್ಟೆಗಳು ಹಾಗೂ ನಾಲೆಗಳಿಗೆ ನೀರು ತಲುಪುವ ಭರವಸೆ ಮೂಡಿದೆ. ಮೊದಲ ಬೆಳೆಗೆ ಅಗತ್ಯವಿರುವ ನೀರಾವರಿ ಸಿದ್ಧತೆಗಳಲ್ಲಿ ರೈತರು ಬ್ಯುಸಿಯಾಗಿದ್ದಾರೆ.

​ಬರಿ ಕೃಷಿ ಮಾತ್ರವಲ್ಲದೆ, ನಗರ ಸೇರಿದಂತೆ ತ್ರಿವಳಿ ರಾಜ್ಯದ ಜನರಿಗೆ ಕುಡಿಯುವ ನೀರಿನ ಬಗೆಗಿನ ಆತಂಕವೂ ಈಗ ದೂರವಾಗಿದೆ. ಜಲಾಶಯಗಳ ಮಟ್ಟ ಗಣನೀಯವಾಗಿ ಹೆಚ್ಚಿರುವುದರಿಂದ ಮುಂಬರುವ ದಿನಗಳಲ್ಲಿ ನೀರಿನ ಅಭಾವ ತಲೆದೂರುವ ಸಾಧ್ಯತೆ ತೀರಾ ಕಡಿಮೆ ಎನ್ನಲಾಗಿದೆ. ​ಒಟ್ಟಾರೆಯಾಗಿ, ಮಲೆನಾಡಿನ ಮಳೆಯ ಕೃಪೆಯಿಂದ ತುಂಗಭದ್ರಾ ಜಲಾಶಯ ಪ್ರದೇಶದಲ್ಲಿ ಮತ್ತೆ ಹಸಿರು ಕ್ರಾಂತಿಯ ಭರವಸೆ ಮೂಡಿದ್ದು, ಕೃಷಿ ಚಟುವಟಿಕೆಗಳು ಕಳೆಗಟ್ಟಿವೆ.

ತುಂಗಭದ್ರಾ ಜಲಾಶಯದಿಂದ ಎಚ್.ಎಲ್‌.ಸಿ. 320 ಕ್ಯೂಸೆಕ್ ಪ್ರಮಾಣದ ನೀರನ್ನು ಬಿಡುಗಡೆ ಮಾಡಲಾಗಿದೆ. ಜಲಾಶಯದಲ್ಲಿ ನೀರಿನ ಮಟ್ಟ ಏರಿಕೆಯಾಗುತ್ತಿರುವ ಬೆನ್ನಲ್ಲೇ ಅಧಿಕಾರಿಗಳು ಕಾಲುವೆಗೆ ನೀರು ಹರಿಸಲು ಕ್ರಮ ಕೈಗೊಂಡಿದ್ದಾರೆ. ಈ ನೀರು ಪ್ರಮುಖವಾಗಿ ಕುಡಿಯುವ ನೀರಿನ ಅಭಾವ ತಗ್ಗಿಸಲು ಮತ್ತು ಕಾಲುವೆ ವ್ಯಾಪ್ತಿಯ ಕೃಷಿ ಭೂಮಿಗೆ ವರವಾಗಲಿದೆ. ವಿಶೇಷವಾಗಿ ಬಳ್ಳಾರಿ ಹಾಗೂ ಸುತ್ತಮುತ್ತಲಿನ ಜಿಲ್ಲೆಗಳ ರೈತರಿಗೆ ಈ ಕ್ರಮದಿಂದ ದೊಡ್ಡ ರಿಲೀಫ್ ಸಿಕ್ಕಂತಾಗಿದೆ. ಪ್ರಸ್ತುತ ಆರಂಭಿಕ ಹಂತದಲ್ಲಿ 320 ಕ್ಯೂಸೆಕ್ ನೀರು ಹರಿಸಲಾಗುತ್ತಿದ್ದು, ಜಲಾಶಯಕ್ಕೆ ಒಳಹರಿವು ಹೆಚ್ಚಾದಂತೆ ನೀರಿನ ಪ್ರಮಾಣವನ್ನು ಮತ್ತಷ್ಟು ಹೆಚ್ಚಿಸುವ ಸಾಧ್ಯತೆಯಿದೆ ಎಂದು ನೀರಾವರಿ ಇಲಾಖೆಯ ಮೂಲಗಳು ತಿಳಿಸಿವೆ.

"

"

​