ವನ್ಯಜೀವಿಗಳಿಗೆ ಸಮ್ಮರ್ ಸ್ಪೆಷಲ್

ಮಂಜುನಾಥ ಅಯ್ಯಸ್ವಾಮಿ ಹೊಸಪೇಟೆ

ದಿನೇದಿನೆ ಏರುತ್ತಿರುವ ತಾಪಮಾನದ ಬೇಗೆಯಿಂದ ಮೂಕಪ್ರಾಣಿಗಳು ಕಂಗೆಡಬಾರದು ಎಂದು ಹಂಪಿ ಸಮೀಪದ ಅಟಲ್ ಬಿಹಾರಿ ವಾಜಪೇಯಿ ಮೃಗಾಲಯದಲ್ಲಿ ಈಗ ‘ಕೂಲ್ ಕೂಲ್’ ಪ್ಲಾನ್ ಮಾಡಲಾಗಿದೆ. ಮೃಗಾಲಯದ ಅತಿಥಿಗಳಿಗೆ ಬಿಸಿಲಿನ ದಣಿವು ಆವರಿಸದಂತೆ ಒಂದೆಡೆ ಎಳನೀರು, ತಾಜಾ ಹಣ್ಣಿನ ರಸದ ಔತಣ ನೀಡಲಾಗುತ್ತಿದ್ದರೆ, ಮತ್ತೊಂದೆಡೆ ಸ್ಪ್ರಿಂಕ್ಲರ್ ಹಾಗೂ ಫಾಗರ್ಸ್‌ಗಳ ಮೂಲಕ ಮಂಜಿನ ನಗರಿಯಂತಹ ತಂಪು ವಾತಾವರಣ ಸೃಷ್ಟಿಸಿ ವಿಶೇಷ ಆರೈಕೆ ಮಾಡಲಾಗುತ್ತಿದೆ.

ಸದ್ಯ ಹಂಪಿ ಪರಿಸರದಲ್ಲಿ 22ರಿಂದ 38 ಡಿಗ್ರಿ ಸೆಲ್ಸಿಯಸ್ ಉಷ್ಣಾಂಶ ದಾಖಲಾಗುತ್ತಿರುವುದನ್ನು ಮನಗಂಡಿರುವ ಅಧಿಕಾರಿಗಳು, ವನ್ಯಜೀವಿಗಳ ಜತೆಗೆ ಪ್ರವಾಸಿಗರಿಗೂ ತಂಪಾದ ಅನುಭವ ನೀಡುವ ಪರಿಸರ ಸ್ನೇಹಿ ಸೌಲಭ್ಯಗಳನ್ನು ಕಲ್ಪಿಸಿದ್ದಾರೆ. ಮೃಗಾಲಯದ ಪ್ರಾಣಿಗಳು ವಾಸವಿರುವ ತಾಣವನ್ನು ಹಸಿರಿನಿಂದ ತಂಪಾಗಿ ಇಡಲಾಗಿದೆ. ಹುಲಿ, ಸಿಂಹ, ಆನೆ, ಚೀತಾ ಸೇರಿದಂತೆ ಇತರ ಪ್ರಾಣಿಗಳ ಮನೆಗೆ ಸ್ಪ್ರಿಂಕ್ಲರ್ ಮೂಲಕ ನಿತ್ಯ ನೀರು ಹಾಯಿಸಲಾಗುತ್ತಿದೆ. ಹಲವು ಪ್ರಾಣಿಗಳು ನೀರಿನಲ್ಲಿ ಆಟವಾಡಲು ಇಷ್ಟಪಡುವುದರಿಂದ ಅವುಗಳಿಗಾಗಿ ಪ್ರತ್ಯೇಕ ನೀರಿನ ಕೊಳಗಳನ್ನು ನಿರ್ಮಿಸಲಾಗಿದೆ. ನಾನಾ ಪ್ರಾಣಿಗಳ ಮರಿಗಳಿಗೆ ಎಲೆಕ್ಟ್ರೋಲೈಟ್ ಹಾಗೂ ಗ್ಲೂಕೋಸ್ ಮಿಶ್ರಿತ ನೀರನ್ನು ನೀಡಲಾಗುತ್ತಿದೆ. ದೇಹದಲ್ಲಿ ದ್ರಾವಣಾಂಶಗಳ ಕೊರತೆಯಾಗದಂತೆ ಮುನ್ನೆಚ್ಚರಿಕೆ ವಹಿಸಿ ನಾನಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ವಿಜಯವಾಣಿಗೆ ತಿಳಿಸಿದರು.

ಬೇಸಿಗೆಯ ಬೇಗೆ ಪ್ರಾಣಿಗಳ ಆರೋಗ್ಯದ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತದೆ. ಆದ್ದರಿಂದ ಮೃಗಾಲಯದ ಸಿಬ್ಬಂದಿ ಪ್ರಾಣಿ-ಪಕ್ಷಿಗಳಿಗೆ ನೀಡುವ ಆಹಾರದಲ್ಲಿ ವಿಶೇಷ ಕಾಳಜಿ ವಹಿಸುತ್ತಿದ್ದಾರೆ. ನಿಯಮಿತವಾಗಿ ನೀಡುವ ಆಹಾರ ಪದ್ಧತಿಯಲ್ಲಿ ತುಸು ಬದಲಾವಣೆ ಮಾಡಿಕೊಳ್ಳಲಾಗಿದೆ. ಸಾಧ್ಯವಾದಷ್ಟೂ ದೇಹದಲ್ಲಿ ನೀರಿನ ಅಂಶವನ್ನು ಹೆಚ್ಚಿಸುವ ಆಹಾರ ಪದಾರ್ಥಗಳನ್ನೇ ನೀಡಲಾಗುತ್ತಿದೆ. ಎಳನೀರು ಹಾಗೂ ತಾಜಾ ಹಣ್ಣುಗಳನ್ನು ಮಧ್ಯಾಹ್ನದ ವೇಳೆ ನೀಡಲಾಗುತ್ತಿದೆ. ಜಿರಾಫೆ ಮತ್ತು ಕರಡಿಗಳಿಗೆ ಐಸ್ ಕ್ಯೂಬ್‌ಗಳೊಂದಿಗೆ ತಾಜಾ ಹಣ್ಣುಗಳನ್ನು ಪೂರೈಸಲಾಗುತ್ತಿದೆ. ವಿಶೇಷವಾಗಿ ಕಲ್ಲಂಗಡಿ, ಮೂಸಂಬಿ, ಬಾಳೆಹಣ್ಣು, ಕರ್ಬೂಜ, ದ್ರಾಕ್ಷಿ, ದಾಳಿಂಬೆ ಹಾಗೂ ಕಿತ್ತಳೆ ಹಣ್ಣುಗಳನ್ನು ಪ್ರಾಣಿಗಳು ಸವಿಯುತ್ತಿವೆ.

ಜಿಂಕೆ ಸಫಾರಿಯಲ್ಲಿ ವಿಶೇಷವಾಗಿ ‘ಮಡ್ ಬಾತ್’ (ಕೆಸರು ಸ್ನಾನ) ವ್ಯವಸ್ಥೆ ಮಾಡಲಾಗಿದೆ. ನಾಲ್ಕೈದು ಕಡೆ ಕರಿಮಣ್ಣಿನಲ್ಲಿ ನೀರು ಬಿಟ್ಟು ಕೆಸರಿನ ಅಡ್ಡಗಳನ್ನು ನಿರ್ಮಿಸಲಾಗಿದೆ. ಕಪ್ಪು ಮಣ್ಣಿನಲ್ಲಿ ನೀರು ಬೇಗ ಇಂಗುವುದಿಲ್ಲವಾದ್ದರಿಂದ ತೇವಾಂಶ ಬಹಳ ದಿನಗಳವರೆಗೆ ಉಳಿಯುತ್ತದೆ. ಮಣ್ಣಿನಲ್ಲಿ ಕಬ್ಬಿಣದ ಅಂಶ ಇರುವುದರಿಂದ ಜಿಂಕೆಗಳಿಗೆ ಗಾಯಗಳಿದ್ದರೆ ಗುಣವಾಗಲು ಸಹಕಾರಿಯಾಗುತ್ತದೆ. ಹಕ್ಕಿಗಳ ಗೂಡುಗಳಲ್ಲಿ ಫಾಗರ್ಸ್ ಮೂಲಕ ತಂಪು ಹವೆ ಹರಿಯುವಂತೆ ನೋಡಿಕೊಳ್ಳಲಾಗುತ್ತಿದೆ. ಪ್ರಾಣಿಗಳ ಬೋನ್ ಹಾಗೂ ಕೋಣೆಗಳಿಗೂ ನಿರಂತರ ನೀರು ಸಿಂಪರಣೆ ಮಾಡಲಾಗುತ್ತಿದೆ.

ಬೇಸಿಗೆಯ ನಡುವೆಯೂ ಮೃಗಾಲಯಕ್ಕೆ ಪ್ರವಾಸಿಗರು ಹೆಚ್ಚಿನ ಸಂಖ್ಯೆಯಲ್ಲಿ ಬರುತ್ತಿದ್ದಾರೆ. ಬಿಸಿಲಿನ ತಾಪ ಹೆಚ್ಚಿರುವುದರಿಂದ ಪ್ರವಾಸಿಗರ ಹಿತದೃಷ್ಟಿಯಿಂದ ಫಾಗರ್ಸ್ ವ್ಯವಸ್ಥೆ ಮಾಡಲಾಗಿದೆ. ಪ್ರಾಣಿಗಳನ್ನು ವೀಕ್ಷಿಸುವ ಮಾರ್ಗದುದ್ದಕ್ಕೂ ಮಂಜಿನ ಸಿಂಚನದಂತಹ ತಂಪು ವಾತಾವರಣವನ್ನು ನಿರ್ಮಿಸಿ ಪ್ರವಾಸಿಗರನ್ನು ಆಕರ್ಷಿಸಲು ಜೂ ಅಧಿಕಾರಿಗಳು ಕ್ರಮ ಕೈಗೊಂಡಿದ್ದಾರೆ.

"