ಪೈಪ್ ಲೈನ್ ಒಡೆದು ಭತ್ತದ ಬೆಳೆ ಹಾನಿ

ಗದ್ದೆಯಲ್ಲಿ ಹಾದು ಹೋಗಿದ್ದ ಏತ ನೀರಾವರಿ

ಯೋಜನೆಯ ಪೈಪ್ ಲೈನ್ ಒಡೆದು ಅಪಾರ

ಪ್ರಮಾಣದ ಭತ್ತದ ಬೆಳೆ ಹಾನಿಯಾಗಿರುವ ಘಟನೆ

ಸೋಮವಾರ ನಡೆದಿದೆ.

ತಳವಾರಘಟ್ಟ ಬಳಿಯ ತುಂಗಭದ್ರಾ ನದಿಯಿಂದ ತಾಲೂಕಿನ ಪಾಪಿನಾಯಕನಹಳ್ಳಿ ಗ್ರಾಮಕ್ಕೆ ಕಲ್ಪಿಸಲಾದ ಏತ ನೀರಾವರಿ ಯೋಜನೆಯ ಪೈಪ್ ಲೈನ್ ತಾಲೂಕಿನ ಕಮಲಾಪುರದಿಂದ ಸೀತಾರಾಮ ತಾಂಡಕ್ಕೆ ಹೋಗುವ ರಸ್ತೆಯಲ್ಲಿನ ಕಮಲಾಪುರ ನಿವಾಸಿ ಆರ್.ಬಾಲರಾಜ್ ಹಾಗೂ ಆರ್.ಗೋಪಾಲ ಎಂಬುವವರಿಗೆ ಸೇರಿದ ಭತ್ತದ ಗದ್ದೆಯಲ್ಲಿ ಹಾದು ಹೋಗಿದೆ. ಸೋಮವಾರ ಮಧ್ಯಾಹ್ನ ಒಡೆದು ಹೋಗಿ, ಬಾಲರಾಜ್ ಹಾಗೂ ಆರ್.ಗೋಪಾಲ್ ಭತ್ತದ ಗದ್ದೆ ಸೇರಿದಂತೆ ಸುತ್ತಮುತ್ತಲ ಪ್ರದೇಶದಲ್ಲಿ ಬೆಳೆಯಲಾದ ಭತ್ತದ ಗದ್ದೆಗಳಿಗೆ ನೀರು ನುಗ್ಗಿದೆ. ಅಪಾರ

ಪ್ರಮಾಣದ ಭತ್ತ ಸಂಪೂರ್ಣ ಜಲಾವೃತವಾಗಿದೆ. ಜಲಾವೃತಗೊಂಡಿರುವ ಗದ್ದೆಯಲ್ಲಿನ ಭತ್ತ ಕಟಾವಿಗೆ ಬಂದಿದ್ದು, ಎರಡ್ಮೂರು ದಿನದಲ್ಲಿ ಕಟಾವು ಮಾಡಲು ಸಿದ್ದತೆ ನಡೆದಿತ್ತು. ಪೈಪ್ ಲೈನ್ ಏಕಾಎಕಿ ಒಡೆದು ನೀರು ಗದ್ದೆಗಳಿಗೆ ನುಗ್ಗಿದ್ದು. ಭತ್ತದ ಗದ್ದೆಗಳು ಸಂಪೂರ್ಣ ಜಲಾವೃತವಾಗಿವೆ. ಭತ್ತ ಬೆಳೆದ ರೈತರ ಸ್ಥಿತಿ ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ ಎನ್ನುವಂತಾಗಿದೆ.

ವಾಲ್ ಬಂದ್ ಮಾಡಿದರು ಸಂಜೆ ವರೆಗೆ ಪೈಪ್ ಲೈನ್ ನೀರು ಗದ್ದೆಗಳಲ್ಲಿ ಹರಿಯುತ್ತಿದ್ದದ್ದು ಕಂಡು ಬಂದಿತು. ಪೈಪ್ ಲೈಲ್ ಒಡೆದಿದ್ದರಿಂದ ಈ ಭಾಗದ ಹತ್ತಾರು ಎಕರೆ ಪ್ರದೇಶದಲ್ಲಿನ ಭತ್ತ ಬೆಳೆ ಸಂಪೂರ್ಣ ಜಲಾವೃತವಾಗಿ ಕೆಸರುಮಯವಾಗಿದ್ದು. ರೈತರು ಗದ್ದೆಗಳಿಗೆ ಕಾಲಿಡದಂತಹ ಪರಿಸ್ಥಿತಿ ಎದುರಾಗಿದೆ. ಇದರಿಂದ ಲಕ್ಷಾಂತರ ರೂ ಹಾನಿಯಾಗಿದೆ.