ಹೊಸಪೇಟೆ: ರಾಜ ಮಹಾರಾಜರು ವೈಭವದಿಂದ ಆಳಿದ, ಇತಿಹಾಸದ ಪುಟಗಳಲ್ಲಿ ಸ್ವರ್ಣಾಕ್ಷರಗಳಿಂದ ಬರೆಯಲ್ಪಟ್ಟ ಐತಿಹಾಸಿಕ ವಿಜಯನಗರ ಸಾಮ್ರಾಜ್ಯದ ಹೃದಯಭಾಗವಾದ ಜಿಲ್ಲೆಗೆ ರಾಜ್ಯ ಸಚಿವ ಸಂಪುಟದಲ್ಲಿ ಈ ಬಾರಿಯೂ ಪ್ರಾತಿನಿಧ್ಯ ಸಿಗದಿರುವುದು ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ. ನೂತನ ಜಿಲ್ಲೆಯಾಗಿ ಹೊರಹೊಮ್ಮಿದ ಬಳಿಕ ರಾಜಕೀಯವಾಗಿ ಸಾಲು ಸಾಲು ಏರಿಳಿತಗಳನ್ನು ಕಂಡಿರುವ ಈ ಭಾಗಕ್ಕೆ ಸಂಪುಟದಲ್ಲಿ ಸ್ಥಾನ ಸಿಗದಿರುವುದು ಸ್ಥಳೀಯ ಜನತೆ ಹಾಗೂ ಬೆಂಬಲಿಗರಲ್ಲಿ ತೀವ್ರ ಅಸಮಾಧಾನ ಮತ್ತು ನಿರಾಶೆಯನ್ನು ಮೂಡಿಸಿದೆ.

ಕಳೆದ ಮೂರು ವರ್ಷಗಳಲ್ಲಿ ಕಾಂಗ್ರೆಸ್ ಸರ್ಕಾರಕ್ಕೆ ವಿಜಯನಗರ ಜಿಲ್ಲೆಯು ಪ್ರಮುಖ ರಾಜಕೀಯ ಭದ್ರಕೋಟೆಯಾಗಿ ಮತ್ತು ಆದ್ಯತೆಯ ಕ್ಷೇತ್ರವಾಗಿ ಗುರುತಿಸಿಕೊಂಡಿತ್ತು. ಶಾಸನಸಭೆ ಚುನಾವಣೆಗಳಲ್ಲಿ ಪಕ್ಷಕ್ಕೆ ಬಲವಾದ ಬೆಂಬಲ ನೀಡಿದ್ದರೂ, ಅಧಿಕಾರ ಹಂಚಿಕೆ ಮತ್ತು ಸಂಪುಟ ವಿಸ್ತರಣೆಯ ನಿರ್ಣಾಯಕ ಕ್ಷಣದಲ್ಲಿ ಈ ಜಿಲ್ಲೆಯನ್ನು ನಿರ್ಲಕ್ಷಿಸಲಾಗಿದೆ ಎಂಬ ಆರೋಪಗಳು ಕೇಳಿಬರುತ್ತಿವೆ.

ಸ್ಥಳೀಯ ನಾಯಕರಿಗೆ ಸಚಿವ ಸ್ಥಾನ ದೊರೆತಿದ್ದರೆ ಜಿಲ್ಲೆಯ ಚಿತ್ರಣವೇ ಬದಲಾಗುತ್ತಿತ್ತು ಎಂಬುದರಲ್ಲಿ ಸಂಶಯವಿಲ್ಲ. ಈ ಹಿಂದೆ ಬಿಜೆಪಿ ಸರ್ಕಾರದಲ್ಲಿ ಆನಂದ್ ಸಿಂಗ್ ಅವರು ಸಚಿವರಾದಾಗ ವಿಶೇಷ ಯೋಜನೆಗಳು ಬರಪೂರವಾಗಿದ್ದವು. ಜಿಲ್ಲೆಯ ಶಾಸಕರೊಬ್ಬರು ಸಚಿವರಾದರೆ ವಿಧಾನಸೌಧದ ಉನ್ನತ ಮಟ್ಟದ ಸಭೆಗಳಲ್ಲಿ ನೇರ ಪ್ರಭಾವ ಬೀರಬಹುದು. ವಿಶೇಷ ಅನುದಾನ, ನೂತನ ಮೂಲಸೌಕರ್ಯ ಯೋಜನೆಗಳು ಮತ್ತು ರಸ್ತೆ-ಸಾರಿಗೆ ಅಭಿವೃದ್ಧಿಗೆ ಶೀಘ್ರ ಮಂಜೂರಾತಿ ಪಡೆಯುವುದು ಸುಲಭವಾಗುತ್ತಿತ್ತು.

ಹಂಪಿ ಜಾಗತಿಕ ಮಟ್ಟದ ಪ್ರವಾಸಿ ಕೇಂದ್ರ. ಸ್ಥಳೀಯ ನಾಯಕನಿಗೆ ಸಚಿವ ಸ್ಥಾನ ದೊರೆತಿದ್ದರೆ ಪ್ರವಾಸೋದ್ಯಮ ಇಲಾಖೆಯ ಅನುದಾನವನ್ನು ಗರಿಷ್ಠ ಪ್ರಮಾಣದಲ್ಲಿ ಬಳಸಿ, ಹಂಪಿಯನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಇನ್ನಷ್ಟು ಎತ್ತರಕ್ಕೆ ಕೊಂಡೊಯ್ಯಲು ಮತ್ತು ವಿಶ್ವದರ್ಜೆಯ ಮೂಲಸೌಕರ್ಯ ಕಲ್ಪಿಸಲು ಅನುಕೂಲವಾಗುತ್ತಿತ್ತು. ತುಂಗಭದ್ರಾ ಜಲಾಶಯದ ಹೂಳಿನ ಸಮಸ್ಯೆ, ನೀರಾವರಿ ಕಾಲುವೆಗಳ ಆಧುನೀಕರಣ ಮತ್ತು ಕೃಷಿಕರ ನಿರಂತರ ನೀರು ನಿರ್ವಹಣೆಯ ಪ್ರಕ್ರಿಯೆಯಲ್ಲಿ ಸಚಿವರ ಮಟ್ಟದ ನಿರ್ಧಾರ ಮತ್ತು ಪ್ರಭಾವ ಅತ್ಯಗತ್ಯವಾಗಿತ್ತು. ಹೊಸಪೇಟೆ ಮತ್ತು ಸುತ್ತಮುತ್ತಲಿನ ಭಾಗಗಳು ಕಬ್ಬಿಣದ ಅದಿರು ಹಾಗೂ ಉಕ್ಕು ಕೈಗಾರಿಕೆಗಳಿಗೆ ಹೆಸರುವಾಸಿ. ಸ್ಥಳೀಯ ಯುವಕರಿಗೆ ಹೆಚ್ಚಿನ ಉದ್ಯೋಗಾವಕಾಶ ಕಲ್ಪಿಸಲು, ನೂತನ ಉದ್ಯಮಗಳನ್ನು ಆಕರ್ಷಿಸಲು ಹಾಗೂ ಪರಿಸರ ಸಮತೋಲನ ಕಾಯ್ದುಕೊಳ್ಳಲು ಸಚಿವರ ನೇರ ಮಧ್ಯಸ್ಥಿಕೆ ನೆರವಾಗುತ್ತಿತ್ತು. ಜಿಲ್ಲೆಯವರೇ ಸಚಿವರಾಗಿದ್ದಿದ್ದರೆ ಜಿಲ್ಲಾ ಮಟ್ಟದ ಅಧಿಕಾರಿಗಳ ಮೇಲೆ ಬಲವಾದ ಹಿಡಿತ ಸಾಧಿಸಲು, ಸಾರ್ವಜನಿಕರ ಕುಂದುಕೊರತೆಗಳನ್ನು ಶೀಘ್ರವಾಗಿ ಆಲಿಸಿ ಸ್ಥಳದಲ್ಲೇ ಪರಿಹರಿಸಲು ಸಾಧ್ಯವಾಗುತ್ತಿತ್ತು. ಆದರೆ, ಜಿಲ್ಲೆಗೆ ಸಚಿವ ಸ್ಥಾನ ನೀಡದ ಹಿನ್ನೆಲೆ ಇವೆಲ್ಲ ಕನಸಾಗಿ ಉಳಿಯುತ್ತದೆ.

ಚಾರಿತ್ರಿಕ ಹಿನ್ನೆಲೆ, ಗಣಿ ಸಮೃದ್ಧಿ ಹಾಗೂ ಅಪಾರ ಪ್ರವಾಸಿ ಸಾಮರ್ಥ್ಯ ಹೊಂದಿರುವ ವಿಜಯನಗರ ಜಿಲ್ಲೆಯನ್ನು ರಾಜ್ಯ ಮಟ್ಟದ ಆಡಳಿತಾತ್ಮಕ ನಿರ್ಧಾರಗಳಿಂದ ದೂರವಿಟ್ಟಿರುವುದು ಪ್ರಗತಿಯ ವೇಗಕ್ಕೆ ತಡೆ ಒಡ್ಡಿದಂತಾಗಿದೆ. ಕೈ ನಾಯಕರ ಈ ನಿರ್ಧಾರದಿಂದ ಕಳೆಗುಂದಿರುವ ಜಿಲ್ಲೆಯ ನಾಯಕರು ಹಾಗೂ ಜನತೆ, ಮುಂಬರುವ ದಿನಗಳಲ್ಲಾದರೂ ಸರ್ಕಾರ ತನ್ನ ನಿರ್ಧಾರವನ್ನು ಮರುಪರಿಶೀಲಿಸಿ ವಿಜಯನಗರಕ್ಕೆ ಅರ್ಹ ಸಂಪುಟ ಸ್ಥಾನ ನೀಡುವ ಮೂಲಕ ಪ್ರಗತಿಗೆ ವೇಗ ನೀಡಲಿ ಎಂದು ಕಾಯುತ್ತಿದ್ದಾರೆ.

ವಿಜಯನಗರ ಜಿಲ್ಲೆಗೆ ಸಚಿವ ಸ್ಥಾನ ಕೈತಪ್ಪಲು ಪಕ್ಷದ ಆಂತರಿಕ ಭಿನ್ನಮತ ಹಾಗೂ ಹೈಕಮಾಂಡ್‌ನ ನಿಯಮವೇ ಪ್ರಮುಖ ಕಾರಣ. ಕಾಂಗ್ರೆಸ್ ಹೈಕಮಾಂಡ್ ನಿಯಮದಂತೆ ನೂತನ ಶಾಸಕರಿಗೆ ಮಂತ್ರಿ ಸ್ಥಾನವಿಲ್ಲ. ಕೂಡ್ಲಿಗಿಯ ಎನ್.ಟಿ.ಶ್ರೀನಿವಾಸ್ ಹಾಗೂ ಹರಪನಹಳ್ಳಿಯ ಲತಾ ಮಲ್ಲಿಕಾರ್ಜುನ ಮೊದಲ ಬಾರಿಗೆ ವಿಧಾನಸಭೆ ಪ್ರವೇಶಿಸಿದ್ದು ರೇಸ್‌ನಿಂದ ಹೊರಬಿದ್ದರು. ಇನ್ನು ಎಚ್.ಆರ್.ಗವಿಯಪ್ಪ ತಾಂತ್ರಿಕವಾಗಿ ಎರಡನೇ ಬಾರಿಗೆ ಶಾಸಕರಾಗಿದ್ದರೂ, ಕಾಂಗ್ರೆಸ್‌ನಿAದ ಗೆದ್ದಿರುವುದು ಇದೇ ಮೊದಲ ಬಾರಿ! ಪಕ್ಷ ಸಂಘಟನೆಯಲ್ಲಿ ಸಕ್ರಿಯರಾಗದಿರುವುದು ಮತ್ತು ಹಿರಿಯ ನಾಯಕರೊಂದಿಗಿನ ವೈಮನಸ್ಸಿನಿಂದಾಗಿ ಶಾಸಕ ಗವಿಯಪ್ಪ ಅವರಿಗೆ ಸ್ಥಳೀಯ ಕಾರ್ಯಕರ್ತರ ಬೆಂಬಲವೇ ಸಿಗಲಿಲ್ಲ. ಸ್ವಂತ ಜಿಲ್ಲೆಯ ಶಾಸಕರ ಬದಲಿಗೆ ಹೊರ ಜಿಲ್ಲೆಯ ನಾಯಕರಿಗೆ ಮಂತ್ರಿ ಸ್ಥಾನ ನೀಡುವಂತೆ ಕಾರ್ಯಕರ್ತರೇ ಧ್ವನಿ ಎತ್ತುತ್ತಿದ್ದಾರೆ! ಜಿಲ್ಲಾ ಕಾಂಗ್ರೆಸ್‌ನಲ್ಲಿ ಒಂದಲ್ಲ, ಎರಡಲ್ಲ... ಬರೋಬ್ಬರಿ 6 ಪ್ರತ್ಯೇಕ ಬಣಗಳು (ಗವಿಯಪ್ಪ, ಇಮಾಮ್ ನಿಯಾಜಿ, ಸಿರಾಜ್ ಶೇಕ್, ಹಿಟ್ನಾಳ್ ಕುಟುಂಬ, ರಾಣಿ ಸಂಯುಕ್ತ ಹಾಗೂ ಭೀಮಾನಾಯ್ಕ ಬಣಗಳು) ಸಕ್ರಿಯವಾಗಿವೆ. ಹಿರಿಯ ನಾಯಕರ ಈ ಜಗಳ ಯುವ ಕಾಂಗ್ರೆಸ್‌ಗೂ ಹಬ್ಬಿದ್ದು, ಪಕ್ಷದ ಆಂತರಿಕ ಶಿಸ್ತು ಸಂಪೂರ್ಣ ಹದಗೆಟ್ಟಿರುವುದೇ ಸಂಪುಟ ಪ್ರವೇಶಕ್ಕೆ ದೊಡ್ಡ ಕಂಟಕವಾಯಿತು.

"

"