ದಾಸಿಮಯ್ಯನ ಚಿಂತನೆ ಅಳವಡಿಸಿಕೊಳ್ಳೋಣ

ಹೊಸಪೇಟೆ: ಬಟ್ಟೆ ನೇಯ್ದು ಜೀವನ ನಡೆಸುತ್ತಿದ್ದ ದೇವರದಾಸಿಮಯ್ಯ ನವರು ಸಂಪತ್ತು ಬೇಡ ಎಂದ ಮಹಾಶರಣ. ವಚನಕಾರನಾಗಿ, ತತ್ವಜ್ಞಾನಿಯಾಗಿ, ಚಿಂತಕನಾಗಿ ಅವರು ನಮಗೆ ಕಾಣುತ್ತಾರೆ ಎಂದು ನಿವೃತ್ತ ಪ್ರಾಧ್ಯಾಪಕ ಡಾ.ಮೃತ್ಯುಂಜಯ ರುಮಾಲೆ ಹೇಳಿದರು.

ಕನ್ನಡ ವಿವಿ ಪಂಪ ಸಭಾಂಗಣದಲ್ಲಿ ಮಂಗಳವಾರ ದೇವರದಾಸಿಮಯ್ಯ ಅಧ್ಯಯನ ಪೀಠದಿಂದ ಆಯೋಜಿಸಲಾಗಿದ್ದ ದಾಸಿಮಯ್ಯ ವಚನಗಳಲ್ಲಿ ವಸ್ತು ಮತ್ತು ಆಶಯ ಕುರಿತು ಉಪನ್ಯಾಸದಲ್ಲಿ ಮಾತನಾಡಿದರು.

ದಾಸಿಮಯ್ಯ ಮತ್ತು ಬಸವಣ್ಣನವರು ಮುಖಾಮುಖಿ ಭೇಟಿಯಾಗಿಲ್ಲ. ದಾಸಿಮಯ್ಯನ ಜೀವನದಲ್ಲಿ ನಡೆದ ಬಹುಮುಖ್ಯ ಘಟನೆಗಳು ಬಸವಣ್ಣನವರು ನನ್ನ ಮೇಲೆ ಪ್ರಭಾವ ಬೀರಿವೆ ಎಂದು ಹೇಳುತ್ತಾರೆ. ವಚನ ಮತ್ತು ವಚನೇತರ ಸಾಹಿತ್ಯವನ್ನು ಒಟ್ಟಿಗೆ ನೋಡಿದಾಗ ಮಾತ್ರ ನಮಗೆ ಇಂದಿನ ಗೊಂದಲಗಳಿಗೆ ಪರಿಹಾರ ಸಿಗುತ್ತದೆ ಎಂದರು.

ಕುಲಪತಿ ಡಾ.ಡಿ.ವಿ.ಪರಮಶಿವಮೂರ್ತಿ ಮಾತನಾಡಿ, ದೇವರ ದಾಸಿಮಯ್ಯನವರ ಕುರಿತು ಮೂಲಭೂತ ಸಂಶೋಧನೆ ಅಗತ್ಯವಿದೆ. ಜೀವನದ ಮೇಲೆ ಪ್ರೀತಿ ಹೊಂದಿದವರೇ ವಚನಕಾರರು. ದೊಡ್ಡ ವಚನಕಾರರಿಗೆ ಅನೇಕ ಅರಸರ, ಅಧಿಕಾರಿಗಳ ಬೆಂಬಲವಿದ್ದು, ಅಂಥವರ ನಡುವೆ ದಾಸಿಮಯ್ಯನವರ ವಚನಗಳನ್ನು ಇಂದಿಗೂ ನಾವು ನೆನಪಿಸಿಕೊಳ್ಳುತ್ತಿರುವುದು, ಅವರ ವಚನಗಳಲ್ಲಿನ ಸತ್ವದ ಮಹತ್ವವನ್ನು ತೋರಿಸುತ್ತದೆ ಎಂದರು.