ಮಳೆಗಾಗಿ ಪ್ರಾರ್ಥಿಸಿ ಕಪ್ಪೆ-ಕತ್ತೆಗಳ ಮದುವೆ

ಪೇಟೆ ಬಸವೇಶ್ವರ ದೇವಸ್ಥಾನದ ಬಳಿ ಸೇರಿದ ದೈವಸ್ಥರು ಪೇಟೆ ಬಸವೇಶ್ವ ಸ್ವಾಮಿಗೆ ಪೂಜೆ ನೆರವೇರಿಸಿದರು. ನಂತರ ಮಹಿಳೆಯರು ದೇವಸ್ಥಾನದ ಮುಂದೆ ರಂಗೋಲಿ ಹಾಕಿ, ಮಣ್ಣಿನ ಮಡಕೆಯಲ್ಲಿ ಕಳಸ ಹಾಗೂ ಗುರ್ಜಿಯನ್ನು ಪ್ರತಿಷ್ಠಾಪನೆ ಮಾಡಿದರು. ಎರಡು ಕಪ್ಪೆಗಳಿಗೆ ನೀರೆರೆದು ಅರಿಷಿಣ, ಕುಂಕಮ ಹಚ್ಚಿ ಸಿಂಗಾರ ಮಾಡಿದರು.

ಪುರುಷರು ಎರಡು ಕತ್ತೆಗಳನ್ನು ತಂದು ಹೆಣ್ಣು ಕತ್ತೆಗೆ ಸೀರೆ ಉಡಿಸಿ ಉಡಿ ತುಂಬಿದರು. ಗಂಡು ಕತ್ತೆಗೆ ಪಂಚೆ, ಟವಲ್ ಹಾಕಿ ಎರಡೂ ಕತ್ತೆಗಳಿಗೆ ಕಂಕಣ ಕಟ್ಟಿ ಹೂವಿನ ಹಾರ ಹಾಕಿ ಸಿಂಗರಿಸಿದರು. ನಂತರ ಕಪ್ಪೆ ಹಾಗೂ ಕತ್ತೆಗಳಿಗೆ ಹರಿಷಿಣ ಕೊಂಬು ಕಟ್ಟುವ ಮೂಲಕ ಮದುವೆ ನೆರವೇರಿಸಿದರು. ನೆರೆದಿದ್ದ ಮಹಿಳೆಯರು ಶಾಸ್ತ್ರೋಕ್ತವಾಗಿ ಆರತಿ ಬೆಳಗಿದರು. ಸಕಲ ವಾದ್ಯಗಳೊಂದಿಗೆ ಪಟ್ಟಣದಲ್ಲಿ ಮೆರವಣಿಗೆ ಮಾಡಲಾಯಿತು.

ಮುಂಗಾರಿನಲ್ಲಿ ಮಳೆ ಬಾರದಿದ್ದಾಗ ಕಪ್ಪೆ ಹಾಗೂ ಕತ್ತೆಗಳ ಮದುವೆ ಮಾಡಿದರೆ ಮಳೆ ಬರುತ್ತದೆ ಎಂಬ ನಂಬಿಕೆಯಿಂದ ಈ ಸಂಪ್ರದಾಯ ಪಾಲಿಸಿಕೊಂಡು ಬರಲಾಗುತ್ತಿದೆ ಎಂದು ವಿಭೂತಿ ವೀರಣ್ಣ ಹೇಳಿದರು. ಪ್ರಮುಖರಾದ ಬಾಣದ ಕೊತ್ಲಪ್ಪ, ತುಪ್ಪಳ್ಳಿ ಬಣಕಾರ ಮೂಗಣ್ಣ, ಬಾಣದ ರಾಮಣ್ಣ, ಗುರಿಕಾರ ಮಂಜುನಾಥ, ಸಿರಿವಲ್ಲಮ್ಮ, ಕೆಂಚೀರವ್ವ, ಬೋರಮ್ಮ, ವೆಂಕಮ್ಮ, ಸೋಗಿ ಗುರುಸಿದ್ದಪ್ಪ, ಮಡಿವಾಳ ತಿರುಕಪ್ಪ, ತುಪ್ಪಳ್ಳಿ ಕೊಟ್ರೇಶ್, ಮಾದೈನರು ವೀರಣ್ಣ, ಕಾಯಿಕೆಡುವ ಮಂಜಣ್ಣ, ರುದ್ರಣ್ಣ, ಉತ್ತಂಗಿ ವೀರೇಶ್ ಇತರರಿದ್ದರು.

ಗುರುವಾರ ಸಂಜೆ ಮಳೆಗಾಗಿ ಪ್ರಾರ್ಥಿಸಿ ಪೇಟೆ ಬಸವೇಶ್ವರ ದೈವಸ್ಥರು ಹಾಗೂ ರಾಮಲಿಂಗೇಶ್ವರ ದೇವಸ್ಥಾನದ ದೈವಸ್ಥರು ಅಹೋರಾತ್ರಿ ಭಜನೆ ಮಾಡಿದರು.