ಕಮಲಾಪುರ ಕೆರೆ ಅಭಿವೃದ್ಧಿಗೆ ಶುಕ್ರದೆಸೆ

ಮಂಜುನಾಥ ಅಯ್ಯಸ್ವಾಮಿ ಹೊಸಪೇಟೆ

ಹಂಪಿ ಸಮೀಪದ ಐತಿಹಾಸಿಕ ಕಮಲಾಪುರ ಕೆರೆಯ ಸೌಂದರೀಕರಣ ಮಾಡಲು ಜಿಲ್ಲಾಡಳಿತ ಚಿಂತನೆ ನಡೆಸಿದೆ.

ಹಂಪಿ ಪರಿಸರದ ಪ್ರವಾಸಿ ತಾಣಗಳಲ್ಲಿ ಕಮಲಾಪುರ ಕೆರೆ ಕೂಡ ಒಂದಾಗಿದೆ. ಸೂರ್ಯೋದಯ ಹಾಗೂ ಸೂರ್ಯಾಸ್ತ ವೀಕ್ಷಣೆಗೆ ಪ್ರವಾಸಿಗರು ಕೆರೆಗೆ ಭೇಟಿ ನೀಡುತ್ತಾರೆ. ಕೆರೆ ಏರಿ ಮೇಲಿಂದ ಪ್ರಕೃತಿ ಸೌಂದರ್ಯ ಸವಿಯುವುದೇ ಚಂದ. ಕೆರೆಯಲ್ಲಿ ದೋಣಿ ವಿಹಾರ ನಡೆಸಲು ಹಂಪಿ ಪ್ರದೇಶಾಭಿವೃದ್ಧಿ ನಿರ್ವಹಣಾ ಪ್ರಾಧಿಕಾರದಿಂದ ಟೆಂಡ‌ರ್ ಕರೆಯಲಾಗಿದೆ.

ಮತ್ತೊಂದು ಕಡೆ ಕೆರೆಯ ಗಡಿ ಗುರುತಿಸಿ ರಿಂಗ್ ರೋಡ್ ನಿರ್ಮಾಣಕ್ಕೆ ಸಿದ್ಧತೆ ನಡೆದಿದೆ. ಇದರಿಂದ ಕೆರೆಗೆ ಭೇಟಿ ನೀಡುವವರ ವಾಯು ವಿಹಾರಕ್ಕೆ ಅನುಕೂಲ ಆಗಲಿದೆ. ಕೆರೆಯ ಸುತ್ತ ರಿಂಗ್ ರಸ್ತೆ ನಿರ್ಮಿಸಲು ಕ್ರಿಯಾಯೋಜನೆ ರೂಪಿಸಿ ಸರ್ಕಾರಕ್ಕೆ ವರದಿ ನೀಡಲಾಗಿದೆ. ಕಮಲಾಪುರ ಕೆರೆ 476 ಎಕರೆ ವಿಸ್ತೀರ್ಣವಿದೆ. 7.25 ಕಿಮೀ ರಸ್ತೆ ನಿರ್ಮಾಣಕ್ಕೆ ಕ್ರಿಯಾಯೋಜನೆ ರೂಪಿಸಲಾಗಿದೆ. ಕಮಲಾಪುರ ಕೆರೆ ತಾಂಡಾದಿಂದ ಕೆರೆ ಕಡೆಕೋಡಿವರೆಗೆ ಮೂರು ಕಿಮೀ. ರಸ್ತೆ ಇದೆ. ಇನ್ನು 4.25 ಕಿಮೀ ರಸ್ತೆ ನಿರ್ಮಾಣ ಮಾಡಬೇಕಿದೆ. ರಸ್ತೆಯ ಎರಡು ಬದಿಯಲ್ಲಿ ಸಸಿ ನೆಟ್ಟು ಉದ್ಯಾನ ನಿರ್ಮಾಣ ಮಾಡಲಾಗುತ್ತದೆ. ವಾಯುವಿಹಾರ ಮಾಡಲು ಪಾದಚಾರಿ ಮಾರ್ಗ ನಿರ್ಮಾಣ ಮಾಡಲಾಗುತ್ತದೆ.

ಕಮಲಾಪುರ ಕೆರೆಯ ಉತ್ತರ ದಿಕ್ಕಿನಲ್ಲಿ ಕೃಷಿ ಜಮೀನುಗಳಿಗೆ ಹೋಗಲು ಸೂಕ್ತ ರಸ್ತೆಯಿಲ್ಲ. ಕೆರೆಯನ್ನು ಸೌಂದರೀಕರಣ ಮಾಡಲು ರಸ್ತೆ ನಿರ್ಮಾಣ ಮಾಡಿದರೆ, ಈ ಭಾಗದ ರೈತರಿಗೆ ಕಬ್ಬು, ಬಾಳೆ, ಭತ್ತ ಸಾಗಾಣೆ ಮಾಡಲು ಅನುಕೂಲ ಆಗಲಿದೆ. ಪ್ರವಾಸೋದ್ಯಮದೊಂದಿಗೆ ಕೃಷಿ ಕ್ಷೇತ್ರ ಬೆಳವಣಿಗೆಗೂ ಸಹಕಾರ ಆಗಲಿದೆ.

ಹಂಪಿಗೆ ಎರಡು ಬಾರಿ ಭೇಟಿ ನೀಡಿದ್ದ ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್, ಕಮಲಾಪುರ ಕೆರೆಯನ್ನು ಕೂಡ ವೀಕ್ಷಿಸಿದ್ದರು. ಈ ವೇಳೆ ಟೂರಿಸಂ ಹಬ್ ರಿಂಗ್ ರಸ್ತೆ ನಿರ್ಮಾಣ ಮಾಡಿದರೆ ಪ್ರವಾಸಿಗರಿಗೆ ಅನುಕೂಲ ಆಗಲಿದೆ ಎಂದು ಅಧಿಕಾರಿಗಳಿಗೆ ಸೂಚಿಸಿದ್ದರು.

"

"