ಕಮಲಾಪುರ ಕೆರೆಯಲ್ಲಿ ದೋಣಿ ವಿಹಾರ

ಹೊಸಪೇಟೆ ತಾಲೂಕಿನ ಕಮಲಾಪುರ ಕೆರೆ

Published on:

30 Nov 2025, 3:36 pm

ಪ್ರಮುಖ ಮುಖ್ಯಾಂಶಗಳು

ಹಂಪಿ ಪ್ರದೇಶ ನಿರ್ವಹಣಾ ಪ್ರಾಧಿಕಾರದಿಂದ ಸಿದ್ಧತೆ
ಮೀನುಗಾರರ ಆಕ್ಷೇಪ
ವಿಜಯನಗರ ಅರಸರ ಕಾಲದ ಕಮಲಾಪುರ ಕೆರೆ

ಮಂಜುನಾಥ ಅಯ್ಯಸ್ವಾಮಿ ಹೊಸಪೇಟೆ

ವಿಜಯನಗರ ಅರಸರ ಕಾಲದ ಕಮಲಾಪುರ ಕೆರೆಯಲ್ಲಿ ದೋಣಿ ವಿಹಾರಕ್ಕೆ ಹಂಪಿ ವಿಶ್ವ ಪರಂಪರೆ ಪ್ರದೇಶ ನಿರ್ವಹಣಾ ಪ್ರಾಧಿಕಾರದಿಂದ ಸಿದ್ಧತೆ ನಡೆದಿದ್ದು, ಇದಕ್ಕೆ ಮೀನುಗಾರರಿಂದ ಆಕ್ಷೇಪ ವ್ಯಕ್ತಪವಾಗುತ್ತಿದೆ.

ಹಂಪಿ ಸುತ್ತಮುತ್ತಲಿನ ಪ್ರವಾಸಿ ತಾಣಗಳಲ್ಲಿ ಕಮಲಾಪುರ ಕೆರೆ ಕೂಡ ಒಂದಾಗಿದೆ. ಹಂಪಿ ಉತ್ಸವದಲ್ಲಿ ಮಾತ್ರ ದೋಣಿ ವಿಹಾರ ನಡೆಯುತ್ತಿತ್ತು. ಈಗ ನಿತ್ಯ ದೋಣಿ ವಿಹಾರಕ್ಕೆ ಹಂಪಿ ವಿಶ್ವ ಪರಂಪರೆ ಪ್ರದೇಶ ನಿರ್ವಹಣಾ ಪ್ರಾಧಿಕಾರ ಸಿದ್ಧತೆ ನಡೆಸಿದ್ದು, ತಿಂಗಳ ಆದಾಯದಲ್ಲಿ ಶೇ.20 ಅಥವಾ ಐದು ಲಕ್ಷ ರೂ.ಗಿಂತ ಅಧಿಕ ಆದಾಯ ಬಂದರೆ ಶೇ.25 ಹಂಪಿ ವಿಶ್ವ ಪರಂಪರೆ ಪ್ರದೇಶ ನಿರ್ವಹಣಾ ಪ್ರಾಧಿಕಾರಕ್ಕೆ ನೀಡಬೇಕೆಂಬ ಒಪ್ಪಂದದೊಂದಿಗೆ ಉತ್ತರ ಕನ್ನಡ ಜಿಲ್ಲೆ ಹೊನ್ನಾವರದ ಖಾಸಗಿ ಕಂಪನಿಯೊಂದಿಗೆ ಗುತ್ತಿಗೆ ಅಂತಿಮವಾಗಿದೆ.

ಕೆರೆಯ ಗಂಗಮ್ಮ ದೇಗುಲದ ಬಳಿ ದೋಣಿ ವಿಹಾರ ಕೇಂದ್ರ ಆರಂಭಿಸಲು ಯೋಜನೆ ರೂಪಿಸಲಾಗಿದೆ. ಬೆಳಗ್ಗೆ 7 ರಿಂದ ಸಂಜೆ 6 ರ ವರೆಗೆ ಪ್ರವಾಸಿರು ದೋಣಿ ವಿಹಾರ ಕೈಗೊಳ್ಳಬಹುದಾಗಿದೆ. ಆದರೆ, ಮೀನುಗಾರರು ಈ ಯೋಜನೆಗೆ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ದೋಣಿ ವಿಹಾರದಿಂದ ಸದ್ಯಕ್ಕೆ ಯಾವುದೇ ಸಮಸ್ಯೆ ಆಗದಿರಬಹುದು. ಭವಿಷ್ಯದಲ್ಲಿ ನಮ್ಮ ಜೀವನ ಅತಂತ್ರ ಸ್ಥಿತಿಯತ್ತ ಸಾಗಲಿದೆ ಎಂಬುದು ಮೀನುಗಾರರ ಆತಂಕ ಆಗಿದೆ.

149 ಕುಟುಂಬಗಳಿಗೆ ಸಂಕಷ್ಟ

ಕಮಲಾಪುರ ಕೆರೆ 476 ಎಕರೆ ವಿಸ್ತೀರ್ಣ ಹೊಂದಿದ್ದು, ಹೂಳು ತುಂಬಿದೆ. ಕೃಷಿ, ಮೀನುಗಾರಿಕೆಯೊಂದಿಗೆ ದೇಶ-ವಿದೇಶದ ಪಕ್ಷಿ ಸಂಕುಲಕ್ಕೂ ಆಸರೆಯಾಗಿದೆ. ದೋಣಿ ವಿಹಾರದಿಂದ ಕೆರೆಯಲ್ಲಿ ಮೀನಿನ ಬಲೆ ಬಿಡಲು ಆಗುವುದಿಲ್ಲ. ಇದರಿಂದಾಗಿ ಮೀನುಗಾರಿಕೆ ನಂಬಿರುವ 149 ಕುಟುಂಬಗಳ ಜೀವನ ಸಂಕಷ್ಟಕ್ಕೆ ಸಿಲುಕಲಿದೆ. ಈ ಹಿಂದೆ ಕೆರೆಯಲ್ಲಿ ನಡೆದ ಹಲವು ಘಟನೆಗಳಲ್ಲಿ ಬದುಕುಳಿದ ಸಂಖ್ಯೆ ವಿರಳವಾಗಿದೆ.

ಡಿಸೆಂಬರ್‌ನಲ್ಲಿ ಆರಂಭ ಸಾಧ್ಯತೆ

ಕೆರೆಯಲ್ಲಿ ದೋಣಿ ವಿಹಾರ ಡಿ.6 ಅಥವಾ 7ಕ್ಕೆ ಆರಂಭ ಆಗುವ ಸಾಧ್ಯತೆಯಿದೆ. ಸೌರಶಕ್ತಿ ಮತ್ತು ಚಾರ್ಜಿಂಗ್ ಬ್ಯಾಟರಿ ಆಧಾರಿತ ದೋಣಿಗಳನ್ನು ಬಳಸಲಾಗುತ್ತದೆ. 8 ಮತ್ತು 16 ಆಸನದ ತಲಾ ಒಂದು ವಾಹನ ಕಾರ್ಯನಿರ್ವಹಿಸಲಿವೆ. ಗಂಗಮ್ಮ ದೇಗುಲದ ಬಳಿ ಪ್ರವಾಸಿಗರಿಗೆ ತಾತ್ಕಾಲಿಕ ಟೆಂಟ್ ಹಾಕಲಾಗುತ್ತದೆ. ಪ್ರವಾಸಿಗರ ಸ್ಪಂದನೆ ಆಧರಿಸಿ ಬೋಟ್‌ಗಳ ಸಂಖ್ಯೆ ಹೆಚ್ಚಿಸಲಾಗುವುದು. ಗುತ್ತಿಗೆ ಪಡೆದ ಕಂಪನಿ ದರ ನಿಗದಿಪಡಿಸಲಿದ್ದು, ಇನ್ನೂ ನಿರ್ಧಾರವಾಗಿಲ್ಲ ಎಂದು ಹಂಪಿ ವಿಶ್ವ ಪರಂಪರೆ ಪ್ರದೇಶ ನಿರ್ವಹಣಾ ಪ್ರಾಧಿಕಾರದ ಆಯುಕ್ತ ರಮೇಶ್ ವಟಗಲ್ ತಿಳಿಸಿದರು.

ಹಂಪಿಗೆ ಬರುವ ಪ್ರವಾಸಿಗರಿಗೆ ಇಲ್ಲಿ ಇರುವ ಕಮಲಾಪುರ ಕೆರೆ ಕೂಡ ಆಕರ್ಷಣೀಯ ತಾಣವಾಗಿದೆ. ಇನ್ನಷ್ಟು ಆಕರ್ಷಣೆಯಾಗಿಸಲು ಕಾಯಂ ದೋಣಿ ವಿಹಾರ ಸೌಲಭ್ಯ ಕಲ್ಪಿಸಲಾಗುತ್ತಿದೆ. ಶೇ.20ರಿಂದ 25 ಲಾಭಾಂಶದಲ್ಲಿ ಇಲಾಖೆಗೆ ಬರಲಿದೆ.

ಕಮಲಾಪುರ ಕೆರೆ ಮೀನುಗಾರರಿಗೆ ಜೀವಾಳವಾಗಿದೆ. ಮೀನು ಹಿಡಿದು ಜೀವಾನ ಸಾಗಿಸಬೇಕು. ದೋಣಿ ವಿಹಾರದಿಂದ ಮೀನು ಹಿಡಿಯಲು ಸಮಸ್ಯೆ ಆಗಲಿದೆ. ಬಲೆಗಳು ಹಾಕಲು ಆಗಲ್ಲ. ಮೀನುಗಳು ಬೆಳವಣಿಗೆ ಸಮಸ್ಯೆ ಆಗಲಿದೆ. ಈ ಕೆಲಸ ಬಿಟ್ಟರೆ ಬೇರೆ ಗತಿಯಿಲ್ಲ. ನಮಗು ಕುಟುಂಬಗಳಿವೆ ಅಧಿಕಾರಿಗಳು ಇತ್ತ ಗಮನ ಹರಿಸಲಿ.

hospet